އިނގިރޭސިވިލާތުގައި ކޮވިޑް ޖެހިގެން މަރުވި މީހުންގެ އަދަދު 150،000ށް އަރައިފި
އިނގިރޭސިވިލާތުގައި ކޮވިޑް ޖެހިގެން މަރުވި މީހުންގެ އަދަދު ވަނީ 150،057ށް އަރާފައި
ރޯޔަލް ލަންޑަން ހޮސްޕިޓަލް ކައިރީގައި އެމްބިޔުލަންސްތައް ހަރަކާތްތެރިވަނީ
އޮމިކްރޯން ވޭރިއަންޓާއެކު އިނގިރޭސިވިލާތަށް ކޮވިޑް-19ގެ ސަރޖެއް ކުރިމަތިވެފައިވާއިރު އެގައުމުގައި ކޮވިޑް ޖެހިގެން މަރުވި މީހުންގެ އަދަދު 150،000ށް އަރައިފިއެވެ.
ހޮނިހިރު ދުވަހު އެގައުމުން ކޮވިޑް ޖެހިގެން 313 މީހުން ވަނީ މަރުވެފައެވެ. އެއާއެކު އިނގިރޭސިވިލާތުގައި ކޮވިޑް ޖެހިގެން މަރުވި މީހުންގެ އަދަދު ވަނީ 150،057ށް އަރާފައެވެ. އިނގިރޭސިވިލާތުގައި ކޮވިޑް ޖެހިގެން މަރުވި މީހުންގެ އަދަދު 150،000ށް އެރިކަން ހާމަކުރައްވާ އެގައުމުގެ ބޮޑުވަޒީރު ބޮރިސް ޖޯންސަން ނެރުއްވި ބަޔާނެއްގައި ވިދާޅުވެފައިވަނީ މިޕެންޑަމިކުން އަރައިގަތުމަށް އޮތް ގޮތަކީ ހުރިހާ ރައްޔިތުން ބޫސްޓަރ ޑޯޒް ޖެހުންކަމަށެވެ. އަދި ފުރަތަމަ ޑޯޒް ނުވަތަ ދެވަނަ ޑޯޒް ޖަހާފައިނުވާ ރައްޔިތުންވެސް ވެކްސިން ޖެހުމަށް ވަނީ އެދިވަޑައިގަންނަވާފައެވެ.
އޮމިކްރޯން އާއެކު އައު ސަރޖެއް އެގައުމަށް ކުރިމަތިވެފައި ވީނަމަވެސް މީގެކުރިން އައި ސަރޖްތަކާ އަޅާބަލާއިރު މިފަހަރު މަރުވާ މީހުންގެ އަދަދު މަދެވެ. އިނގިރޭސި ސަރުކާރުން ވަނީ އެގައުމުގައި ބޫސްޓަރ ޑޯޒް ޖެހުން ހަލުވިކުރުމުގެ މަސައްކަތްތަކެއް ފަށާފައެވެ. މިހާރުވެސް އެގައުމުގެ އާބާދީގެ 60 އިންސައްތަ މީހުން ވަނީ ބޫސްޓަރ ޑޯޒް ޖަހާފައެވެ. ލޮކްޑައުން އަކަށް ދިޔުމުގެ ބަދަލުގައި ގިނަ ބަޔަކު ވެކްސިން ޖަހައިގެން ވައިރަސް ފެތުރުން ކޮންޓްރޯލްކުރުމަށް އެގައުމުން އަންނަނީ މަސައްކަތްކުރަމުންނެވެ.
ފާއިތުވި ހަފްތާގައި އެގައުމުގައި 1.227 މިލިއަން މީހުންނަށް ކޮވިޑް ޖެހިފައިވާއިރު އެއީ އޭގެކުރީ ހަފްތާ އާ އަޅާބަލާއިރު 11 އިންސައްތަ އިތުރު އަދަދެކެވެ.
ބައެއް ފަރާތްތަކުން ބުނާގޮތުގައި ހޮނިހިރު ދުވަހު ރިކޯޑް ކުރި 146،390 ކޭހާއެކު މިހާރު އައިސްފައިވާ ސަރޖްގެ ޕީކާ ހިސާބަށް ވަނީ އައިސްފައެވެ. ޖެނުއަރީ މަހުގެ 4 ވަނަ ދުވަހު އިނގިރޭސިވިލާތުގައި 218،724 މީހުންނަށް ކޮވިޑް ޖެހިގެން ވަނީ ރިޕޯޓްކޮށްފައެވެ.
އިނގިރޭސިވިލާތަކީ ޔޫރަޕްގެ ގައުމުތަކުގެ ތެރެއިން ކޮވިޑް ޖެހިގެން ދެވަނަ އަށް އެންމެ ގިނަ މީހުން މަރުވެގެން ރިޕޯޓްކުރަމުން އަންނަ ގައުމެވެ.
އިނގިރޭސިވިލާތުގައި ކޮވިޑް ޖެހިގެން މަރުވާ ރޭޓްހުރީ 7 އިންސައްތައިގައެވެ. އެއީ ޔޫރަޕިއަން ޔޫނިއަންގެ އެވްރެޖަށްވުރެ މައްޗެވެ. އާބާދީގެ ނިސްބަތަށް ބަލާއިރު އެމެރިކާ އާއި އިޓަލީ ، ބެލްޖިއަމް އަދި އިރުމަތީ ޔޫރަޕްގެ ގައުމުތަކުގައި މީހުން މަރުވާ ރޭޓް ހުރީ މާމަތީގައެވެ.
