ކޮވިޑް-19: ޕާކްތަކާއި މައިޒާންތައް ބޭނުންކުރާ މީހުން ޚާއްސަ ސަމާލުކަމެއް ދޭން ޖެހޭ!
8 ޖެނުއަރީ 2022 | ހޮނިހިރު 12:32މާސްކް އެޅުމުގައި އެޗްޕީއޭގެ އުސޫލުތަކާ އެއްގޮތަށް އަމަލުކުރަން ޖެހޭ
ލޮނުޒިޔާރަތް ޕާކު
މާލެ ސަރަހައްދުގެ ކޮވިޑް-19ގެ ހާލަތު ގޯސްވަމުންދާތީ ޕާކް ނުވަތަ މައިޒާންތައް ބޭނުންކުރާ މީހުން ޚާއްސަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.
ޕާކް ނުވަތަ މައިޒާންތައް ބޭނުންކުރާ ފަރާތްތަކުން ހަނދާން ބަހައްޓަންވީ ކަންތައްތަކާ ބެހޭގޮތުން އެޗްޕީއޭއިން ބުނީ، އެފަދަ ތަންތަނަށް ގޮސް އުޅޭއިރު، އެހެން މީހުންނާ 3 ފޫޓުގެ ދުރުމިނެއް ބަހައްޓަން ޖެހޭ ކަމަށާއި، އަބަދުވެސް މާސްކް އަޅައިގެން ހުރުމާއި މާސްކް އެޅުމުގައި އެޗްޕީއޭގެ އުސޫލުތަކާ އެއްގޮތަށް އަމަލުކުރަންޖެހޭ ކަމަށެވެ. ނަމަވެސް މިހާރު ބައެއް މީހުން ރަނގަޅަށް ނޭފަތާއި އަނގަ ނިވާ ނުވާގޮތަށް މާސްކް އަޅައިގެން އުޅެއެވެ.
އެޗްޕީއޭއިން ބުނީ ޕާކްފަދަ މައިޒާންތަކުގައި އުޅޭ ވަގުތު ތަންތަނުގައި އަތްލުން މަދުކުރަން ޖެހޭ ކަމަށެވެ. ކުޅު ޖެހުމާއި އަރިދަފުސް ފޮޅުން ފަދަ ކަންކަން ނުކުރުމަށް ނަސޭހަތްތެރިވެފައިވާއިރު، ދުންފަތުގެ އިސްތިއުމާލު ނުކުރުމަށާއި، ފެންފުޅި ފަދަ ތަކެތި ގެއިން ހިފައިގެން އައުމަށް ހަނދާން ކޮށްދީފައިވެއެވެ. އަބަދުވެސް ހޭޑް ސެނިޓައިޒަރ ފުޅިއެއް ގެންގުޅުމަށާއި، ރަނގަޅަށް އަތް ސާފުނުކޮށް މޫނުގައި އަތް ނުލުމަށް އިލްތިމާސްކޮށްފައިވެއެވެ.
މީގެ އިތުރުން މާސްކް، ޓިޝޫ ފަދަ ތަކެތި އުކާލަން ޖެހޭނީ ކަނޑައެޅިފައިވާ ޑަސްބިނަށް ކަމަށާއި، އެންމެންގެ ރައްކާތެރިކަމަށް ވިސްނަންޖެހޭ ކަމަށެވެ. އަދި ފާކުތަކަށް ވަދެ ނުކުންނަ މީހުން، ޚާއްސަކޮށް ހައިރިސްކް މީހުންގެ ރައްކާތެރިކަން ކަށަވަރުކުރުމަށް އެންމެން ވެސް ބަލައިގެން އުޅުމަށް އިލްތިމާސްކޮށްފައިވެއެވެ. އަތުގައި އެއްޗެއް ހޭކި ހަޑިވެއްޖެނަމަ ސައިބޯނި ލައިގެން މަދުވެގެން 20 ސިކުންތު ވަންދެން ރަނގަޅަށް އަތް ދޮންނަންޖެހޭކަން ފާހަގަކޮށް އެޗްޕީއޭއިން ބުނީ، އެއްޗެއް ހޭކިފައިނުވާނަމަ ހޭޑް ސެނިޓައިޒާ ލައިގެން ރަނގަޅަށް އަތް ސާފުކުރަން ޖެހޭ ކަމަށެވެ.
ކޮވިޑް-19ގެ އެއްވެސް އަމާލާތެއް ހުރި ނަމަ ޕާކްފާދަ ތަންތަނަށް ނުދިއުމަށް ވެސް އެޗްޕީއޭއިން ވަނީ އިލްތިމާސްކޮށްފައެވެ. އަދި ބަލި ކޮންޓްރޯލް ކުރުމަށް ކުރަމުންދާ މަސައްކަތުގައި އާއްމުންގެ އެއްބާރުލުން ބޭނުންވާކަން ފާހަގަކޮށްފައިވެއެވެ.
