ށ. ކޮމަންޑޫއަށް ކުރެއްވި ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ހޮނިހިރު ދުވަހު މެންދުރުފަހު މާލެ ވަޑައިގެންފިއެވެ.

ކޮމަންޑޫއަށް ހުކުރުދުވަހު ރައީސް ވަޑައިގެންނެވީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި ވާދަކުރާ އެމްޑީޕީގެ ކެންޑިޑޭޓް މުހައްމަދު ރާޝިދުގެ ކެމްޕެއިން ލޯންޗު ކުރުމުގެ ޖަލްސާގައި ބައިވެރިވެވަޑައި ގަތުމަށެވެ. ރައީސްގެ ނުރަސްމީ ދަތުރުފުޅުގެ ތެރެއިން ހޮނިހިރު ދުވަހުގެ ހެނދުނު އެމްޑީޕީގެ ސަޕޯޓަރުންނާއި ވަނީ ބައްދަލުކުރައްވާފައެވެ. މި ބައްދަލުކުރެއްވުމުގައި ރައީސް ވަނީ ޕާޓީގެ ކަންކަން ކުރިއަށް ގެންދިއުމާއި، ޕާޓީގެ ހަރަކާތްތައް ވަރުގަދަކުރުމާއި ގުޅޭގޮތުން ދާއިރާގެ މެންބަރުންނާއި މަޝްވަރާ ކުރައްވާފައެވެ. ރައީސް ވަނީ ސަޕޯޓަރުންގެ ހުރި ކަންބޮޑުވުންތައް އައްސަވާ އެކަންކަމަށް ހައްލު ގެނެސްދެއްވާނެކަމަށް ވިދާޅުވެފައެވެ.

މީގެއިތުރުން ޒަމާންތަކެއް ވަންދެން ކޮމަންޑޫގައި ބޭނުންކުރަމުން އައި އިންޖީނުގެ ނިއްވާލާ އެ ރަށުގައި ފެނަކަ ކޯޕަރޭޝަނުން ގާއިމްކުރި ޒަމާނީ އައު އިންޖީނުގެ ރައީސް ވަނީ ހުޅުވައިދެއްވާފައެވެ. މި އިންޖީނުގެއާއެކު އެރަށުގެ ކަރަންޓުގެ މައްސަލައަށް ހައްލު ލިބިގެންދާނެކަމަށް ފެނަކަ ކޯޕަރޭޝަނުން ބުނެފައިވާ އިރު، މި އިންޖީނުގެއަކީ 1.2 މެގަވޮޓްގެ ކަރަންޓް އުފެއްދާ އިންޖީނުގެއެކެވެ.

ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެޖެންޑާ 19ގެ ދަށުން ރާއްޖެ ލާމަރުކަޒުކޮށް ސަރުކާރުން ވެފައިވާ ވައުދުތައް ފުއްދޭނީ އެމްޑީޕީއަށް ކަމަށާއި، އެހެން ޕާޓީތަކުގެ މެންބަރުންނަށް ދަންނަވަން އޮތީ، މަޑުކޮށްލަދެއްވުމަށެވެ.

ރައީސް ވިދާޅުވީ ތަރައްގީއަށްޓަކައި ލާމަރުކަޒީ ނިޒާމްގެ ދަށުން ގިނަ މަޝްރޫއުތަކެއް ރާއްޖޭގެ އެކި ކަންކޮޅުތަކުގައި ކުރިއަށްދާ ކަމަށާއި، މިހާރުވެސް ބައެއް ޕްރޮޖެކްޓްތައް ނިންމާ ރައްޔިތުންނަށް ޚިދުމަތް ލިބެމުން އަންނަ ކަމަށެވެ. ރައީސް ވިދާޅުވީ ރޯދައިގެ ކުރިން 4 މިސްކިތް ހުޅުވިގެންދާނެ ކަމަށެވެ. މިހާތަނަށް އައި އިރު، 25 ރަށެއްގެ ބަނދަރުގެ މަސައްކަތް ނިންމާފައިވާ ކަމަށާއި، 30 ރަށު މަސައްކަތް ކުރިއަށްދާއިރު، 13 ރަށެއްގެ ބަނދަރުގެ މަސައްކަތް ކޮންޓްރެކްޓް ކުރެވި 29 ރަށެއްގެ ބަނދަރުގެ މަސައްކަތް ޓެންޑަރ ކުރެވިފައިވާ އިރު، 22 ރަށެއްގެ ބަނދަރުގެ މަސައްކަތް މިއަހަރުގެ ބަޖެޓުގައި ބަޖެޓް ކުރެވިފައިވާ ކަމަށެވެ. ރައީސް ވިދާޅުވީ މި ކަންތައްތަކުން އެކަނިވެސް މި ސަރުކާރުގެ މަންޒަރު ތަފާތުވާނެ ކަމަށެވެ. މިހާތަނަށް 27 ބިލިއަން ރުފިޔާގެ ޕީއެސްއައިޕީ މަޝްރޫއުގައި ސޮއިކޮށް 15 ބިލިއަން ރުފިޔާ އެކަމަށް ހޭދަކުރެވިއްޖެ ކަމަށެވެ.

ރައީސް ވިދާޅުވީ ރަށްރަށުގެ ތަރައްގީއަށްޓަކައި ގިނަ މަސައްކަތް ކުރެވެމުން އަންނަ ކަމަށެވެ. ސްކޫލްތަކުގެ ޖާގަ އިތުރުކުރުމާއި، ޕްރިންސިޕަލުން ތަމްރީނުކޮށް ޓީޗަރުން ހޯދާ ދަރިންނަށް ތައުލީމް ފޯރުކޮށްދިނުމަށް މަސައްކަތް ކުރައްވަމުން ގެންދަވާ ކަމަށެވެ. ރައީސް ވިދާޅުވީ ގައިން ތާހިރުވުމަށް ފެނާއި ނަރުދަމާ ގާއިމް ކުރުމަށް ހުރިހާ ކޮންޓްރެކްޓެއް ހަވާލުކުރެވިއްޖެ ކަމަށެވެ. އަދި 5 ޓާޝަރީ ހޮސްޕިޓަލުގެ މަސައްކަތް ބާރަށް ކުރިއަށްދާ އިރު، ކުޅިވަރު ކުޅޭނެ އެތައް ތަނެއް ގާއިމް ކުރެވިއްޖެ ކަމަށެވެ.