ތެލުގެ އައު ޝިޕްމަންޓު މިމަހުގެ 15 ވަނަ ދުވަހު އަންނާނެ ކަމަށް ފިއުލް ސަޕްލައި މޯލްޑިވްސް (އެފްއެސްއެމް)ގެ މެނޭޖިންގ ޑިރެކްޓަރ މުހައްމަދު ގަސަމް ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ގަސަމް ވިދާޅުވީ ޝިޕްމަންޓް ލިބެންދެން ޕެޓްރޯލް ކޮންޓްރޯލް ކޮށްގެން މިހާރު ވިއްކަމުންދާ ކަމަށެވެ.
ޑިސެމްބަރު މަހު ވިއްކޭނެ ކަމަށް ލަފާ ކުރި އަދަދަށްވުރެ 41 އިންސައްތަ އިތުރަށް ޕެޓްރޯލް ވިކިފައިވާ ކަމަށާއި އެހެންކަމުން ހޯލްސޭލް ކުރާ ފަރާތްތަކަށް ތެޔޮ ވިއްކަމުންދަނީ ލިމިޓްކޮށްގެން ކަމަށް ވެސް އޭނާ ވިދާޅުވިއެވެ. ތެޔޮ ވިއްކާ ފަރާތްތަކުގެ ޝިޕްމަންޓްވެސް މިހާރު ރާއްޖެ އައިސްފައިވުމުން ތެލުގެ ދަތިކަން ކުރިމަތި ނުވާނެ ކަމަށް ގަސަމް ވިދާޅުވިއެވެ.
ގަސަމް ވިދާޅުވީ އެފްއެސްއެމްއަކީ ފެށުނީއްސުރެވެސް ވަކި ލިމިޓެއް ކަނޑައަޅައިގެން ޕެޓްރޯލް ވިއްކާ ކުންފުންޏެއް ކަމަށެވެ. އެހެންނަމަވެސް މި ލިމިޓަށްވުރެ ޑިމާންޑު ބޮޑުވުމުން ތެޔޮ ވިއްކާ މިންވަރު ކޮންމެވެސް ވަރަކަށް ކޮންޓްރޯލް ކުރީ ކަމަށް ގަސަމް ވިދާޅުވިއެވެ.
އެސްޓީއޯގެ ސަބްސިޑަރީ ކުންފުންޏެއް ކަމަށްވާ އެފްއެސްއެމްއަކީ ރާއްޖޭގައި ޕެޓްރޯލްގެ ވިޔަފާރިކުރާ މައި ކުންފުުންޏެވެ. އެފްއެސްއެމްއިން އަންނަނީ ރާއްޖޭގެ ބޮޑެތި ކުންފުނިތަކަށް ބޭނުންވާ ޕެޓްރޯލާއި، ބޯޓުފަހަރަށް ބޭނުންވާ ޕެޓްރޯލްވެސް ފޯރުކޮށްދެމުންނެވެ.
