ފަރަށް އެރި އެފްއެސްއެމްގެ ބާޖު ފުންކުރުމުގެ މަސައްކަތް ފަށައިފި
7 ޖެނުއަރީ 2022 | ހުކުރު 13:03ބާޖު ފަރަށް އެރި އިރު އޭގައި 90،000 ލީޓަރު ޑީސަލާއި 8000 ލީޓަރު ޕެޓްރޯލް ހުރި
ފަރަށް އެރި ތެޔޮ ބާޖު މެކުނު
ފިއުލް ސަޕްލައިސް މޯލްޑިވްސް (އެފްއެސްއެމް)ގެ ފަރަށް އެރި ތެޔޮ ބާޖު ފުންކުރުމުގެ މަސައްކަތް ފަށައިފިއެވެ.
ރާއްޖެއެމްވީއަށް މައުލޫމާތު ދެއްވަމުން އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް ވިދާޅުވީ ބާޖު ފުން ކުރުމުގެ މަސައްކަތް ފަށާފައިވާ ކަމަށެވެ. އެެގޮތުން ހުކުރު ދުވަހުގެ ހެނދުނު ފަރަށް އެރި ތެޔޮ ބާޖުގައި ހުރި ތެޔޮ ބޮޑު ބޯޓަކަށް ޓްރާންސްފަރ ކުރުމުގެ މަސައްކަތް ވަނީ ފަށާފައެވެ.
މިހާތަނަށް ބެލި ބެލުމުން ބާޖަކަށް ގެއްލުން ލިބުނުކަން ފާހަގަކުރެވިފައިނުވި ނަމަވެސް ބާޖު އެއްކޮށް ފުން ކުރުމަށްފަހު އިތުރަށް ބައްލަވާނެ ކަމަށް ވެސް ގަސަމް ވިދާޅުވިއެވެ.
ބާޖު ފަރަށް އެރި އިރު އޭގައި 90،000 ލީޓަރު ޑީސަލާއި 8000 ލީޓަރު ޕެޓްރޯލް ހުރި ކަމަށް ގަސަމް ވިދާޅުވިއެވެ. މި ތެޔޮ ބާޖު އަރާފައިވަނީ ކ. އަތޮޅުގައި ހިންގާ ރަންނާޅި ރިސޯޓު ކައިރީގައި އޮންނަ ފަރަކަށެވެ. ބާޖު ފަރަށް އެރީ ބުދަ ދުވަހުގެ ރޭގެ ވަގުތެެއްގައެވެ.
މި ބާޖަކީ 24 މީޓަރުގެ ދިގު ބާޖަކަށްވާއިރު ބާޖުން މިހާތަނަށް މޫދަށް ތެޔޮ ލީކުވެފައި ނުވާ ކަމަށް އެމްއެންޑީއެފުން ވަނީ މައުލޫމާތު ދީފައެވެ.
މިދިޔަ އަހަރުގެ ޖުލައި މަހުގެ ތެރޭގައިވެސް މި ބާޖުވަނީ ފަރަކަށް އަރާފައެވެ. އެފަހަރު ފަރަށް އެރިއިރު 100،000 ލީޓަރުގެ ޑީސަލާއި 15،000 ލީޓަރުގެ ޕެޓްރޯލް ހުރި ކަމަށް އެމްއެންޑީއެފްއިން ބުންޏެވެ.
