ކޮވިޑް-19ގެ ހާލަތާ ގުޅިގެން މިހާރު މޮނިޓަރިންގެ ހާލަތުގައި އޮތް ރަށްތައް ވަރަށް މަދުވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ބުނީ މިވަގުތު މޮނިޓަރިންގެ ހާލަތުގައި އޮތް ރަށްތަކަކީ ހަ ރަށެއް ކަމަށެވެ. އެއީ ގދ.ވާދޫ، ކ.ތުލުސްދޫ، ހދ.ނާވައިދޫ، ދ.ހުޅުދެލި، ކ.މާފުށި އަދި ހއ.އިހަވަންދޫ އެވެ. މިހުރިހާ ރަށެއް މޮނިޓަރިންގެ ހާލަތަށް ގެނެސްފައިވަނީ މިދިޔަ އަހަރުގެ ޑިސެންބަރު މަހުގެ ތެރޭގައެވެ. އަދި މޮނިޓަރިންގައި އެންމެ ދުވަސްވީ ރަށަކީ ގދ.ވާދޫ އެވެ. އެރަށް މޮނިޓަރިންއަށް ލާފައިވަނީ 14 ޑިސެންބަރު 2021 ގައެވެ.

މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތް ކުރުމަށެވެ. މޮނިޓަރިންގެ ހާލަތުގައިވާ ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދާ ކަމަށާއި، ހާލަތު ރަނގަޅު ރަށްރަށް މޮނިޓަރިންއިން ނަގަމުންދާ ކަމަށް އެޗްޕީއޭއިން ބުނެއެވެ.

މޮނިޓަރިންއަށް ގެނެސްފައިވާ ރަށްރަށުގެ އަދަދު މަދުވި ނަމަވެސް ބަލީގެ ނުރައްކާ އޮތުމާއެކު ޚާއްސަ ސަމާލުކަމެއް ދިނުމަށް އެޗްޕީއޭއިން އިލްތިމާސް ކުރެއެވެ.

ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން ފާއިތުވި ހަފުތާގެ ތެރޭގައި ކޭސްތައް ފެންނަމުންދިޔަ މިންވަރު ވަނީ އިތުރުވާން ފަށާފައެވެ. ކޮވިޑްގެ ކޭސްތައް އިތުރުވުމާ ގުޅިގެން އެޗްޕީއޭއިން ވަނީ ބޮޑެތި އެއްވުންތައް ނުބޭއްވުމަށް އިލްތިމާސްކޮށްފައެވެ. އަދި ރަސްފަންނުގައި ކުރިއަށްގެންދިޔަ ނައިޓްމާކެޓު ވެސް ބުރާސްފަތި ދުވަހު ހުއްޓުވުމަށްފަހު، ގިނަ ބަޔަކު އެކަމަށް ހަރަދުކޮށްފައިވާތީ، ކޮވިޑް-19ގެ ހާލަތުގައި އަމަލުކުރާ ޚާއްސަ އުސޫލާ ގައިޑްލައިންއާ އެއްގޮތަށް ނައިޓް މާކެޓް ބޭއްވުމަށް މިހާރު ވަނީ ހުއްދަ ދީފައެވެ.

ކޮވިޑް-19ގެ ހާލަތަށް ބަލާއިރު، ޖެނުއަރީ 3 ވަނަ ދުވަހުން ފެށިގެން މާލެ ސަރަހައްދުން ޕޮޒިޓިވްވާ އަދަދު ވަނީ އިތުރުވެފައެވެ. އެގޮތުން ޖެނުއަރީ 3 ވަނަ ދުވަހު 242 ކޭސް ރިޕޯޓު ކުރެވިފައިވާއިރު، މާލެ ސަރަހައްދުން 97 މީހުން ޕޮޒިޓިވް ވެފައިވެއެވެ، ޖެނުއަރީ 4 ވަނަ ދުވަހު 228 މީހުން ޕޮޒިޓިވް ވެފައިވާއިރު މާލެ ސަރަހައްދުން 66 މީހުން ޕޮޒިޓިވް ވެފައިވެއެވެ. އަދި ޖެނުއަރީ 5 ދުވަހު 224 ކޭސް ރިޕޯޓުކޮށްފައިވާއިރު، މާލެ ސަރަހައްދުން 102 މީހުން ޕޮޒިޓިވް ވެފައިވެއެވެ. މީގެ އިތުރުން ޖެނުއަރީ 6 ވަނަ ދުވަހު 304 ކޭސް ރިޕޯޓުކޮށްފައިވެއެވެ. އޭގެ ތެރެއިން 136 މީހުން ޕޮޒިޓިވްވީ މާލެ ސަރަހައްދުންނެވެ.

ދުވަސްތަކެއް ފަހުން މާލެ ސަރަހައްދުގެ ހާލަތު ގޯސްވަމުންދާތީ މާސްކް އެޅުމުގެ ގަވާއިދު ތަންފީޒު ކޮށްދިނުމަށް އެޗްޕީއޭއިން އެދިފައިވެއެވެ. އަތޮޅުތެރޭގެ ހުރިހާ ރަށެއްގައި މާސްކް އެޅުމަށް ވަނީ މަޖުބޫރުކޮށްފައެވެ. މިހާރު ދުނިޔޭގެ އެކި ހިސާބުތަކުން ފެންނަމުންދާ އޮމިކްރޯން ވޭރިއެންޓާއެކު، ރާއްޖެ ވެސް އެކަމަށް ތައްޔާރުވެ، ބަލިން ރައްކާތެރިވުމަށް އިތުރަށް ސަމާލުވުމަށް ސިއްހީ މާހިރުން ވަނީ އިލްތިމާސްކޮށްފައެވެ. އަދި އިޖްތިމާއީ ގައިދުރު ކަމަށް ޚާއްސަ ސަމާލުކަމެއްދިނުމަށް ވެސް އެދިފައިވެއެވެ.