ކުޑަކުދިން މިސްކިތްތަކާ ދޯޅު ކުރުމަކީ މުހިންމުކަމެއް: އިސްލާމިކް މިނިސްޓަރ

ކުޑަކުދިން މިސްކިތްތަކާ ދޯޅު ކުރުމަކީ މުހިންމުކަމެއް ކަމަށް އިސްލާމިކް މިނިސްޓަރ ޑރ. އަޙުމަދު ޒާހިރު ޢަލީ ވިދާޅުވެއްޖެއެވެ.

ނ. ލަންދޫގައި ޢިމާރާތްކޮށްފައިވާ މަސްޖިދުލް ފުރްޤާން ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ، މިސްކިތް ޒީނަތްތެރިކޮށްފައިވާ ފަދައިން އަޅުކަމުން ވެސް ރައްޔިތުން މިސްކިތް ޒީނަތްތެރިކުރަން ޖެހޭ ކަމަށެވެ. އެގޮތުން އެ މިސްކިތްތަކުގައި ޒިކުރު ކުރުމާއި ކުޑަކުދިން މިސްކިތަށް ގެންދިޔުމަކީ ކޮންމެހެން ކުރަންޖެހޭނެ ކަމެއް ކަމަށެވެ.

މިސްކިތް އިމާރާތް ކުރަނީ މާތްﷲ އަޅުކަން ކުރުމަށާއި ނަމާދު ޤާއިމުކުރުމަށްކަން ފާހަގަކުރައްވައި މިނިސްޓަރ ވަނީ، ހުރިހާ އެންމެން ވެސް ޖަމާޢަތުގައި ނަމާދު ކުރުމަށް ނަސޭހަތްތެރިވެވަޑައިގެންފައެވެ. އަދި ޖަމާޢަތުގައި ކުރާ ނަމާދުގެ ދަރަޖަ އިތުރުވެގެންދާ ކަމަށް ވެސް ވިދާޅުވިއެވެ.

އިސްލާމީ މުޖުތަމަޢުގައި މިސްކިތަކީ ވަރަށް މުހިންމު ދައުރެއް އަދާ ކުރާތަނެއްކަމުން ހުރިހާ އެންމެން ވެސް މިސްކިތަކަށް ޙުރުމަތްތެރިކޮށް ހިތުމަށް ގޮވާލެއްވިއެވެ.

މި މިސްކިތް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.

މި މިސްކިތަކީ 500 މީހުންގެ ޖާގައިގެ މިސްކިތަކަށްވާއިރު މިއީ ދައުލަތުން 5.8 މިލިއަން ރުފިޔާ ޚަރަދުކޮށްގެން އަޅާފައިވާ މިސްކިތެކެވެ.

މި މިސްކިތުގެ މަސައްކަތް މިނިސްޓްރީން ހަވާލުކުރީ ހައިމަން ކޮންސްޓްރަކްޝަނާއެވެ.