ފިއުލް ސަޕްލައި މޯލްޑިވްސް (އެފްއެސްއެމް)ގެ ޕެޓްރޯލް ސްޓޮކް ހުސްވެފައިވާކަމަށް، އަދި ޕެޓްރޯލް ވިއްކުން ހުއްޓާލާފައިވާކަމަށް ދެކެވޭ ވާހަކަތައް އެކުންފުނިން ދޮގުކޮށްފިއެވެ.
ރާއްޖެއެމްވީއަށް މައުލޫމާތު ދެއްވަމުން އެފްއެސްއެމްގެ މެނޭޖިންގ ޑިރެކްޓަރ މުހައްމަދު ގަސަމް ވިދާޅުވީ އެކުންފުނީގެ ޕެޓްރޯލް ސްޓޮކް ހުސްނުވާ ކަމަށެވެ. އަދި ޕެޓްރޯލް ވިއްކުން ހުއްޓާލާފައިވެސް ނުވާ ކަމަށެވެ. އެހެންނަމަވެސް ރާއްޖެއަށް ޕެޓްރޯލް އެތެރެކޮށް ވިއްކާ އިތުރު ދެ ބައެއްގެ ޕެޓްރޯލް ސްޓޮކް ހުސްވެފައިވާކަމަށް ގަސަމް ވިދާޅުވިއެވެ.
ގަސަމް ވިދާޅުވީ އެ ފަރާތްތަކުގެ ޕެޓްރޯލް ސްޓޮކް ހުސްވުމުން އެފްއެސްއެމްއިން ޕެޓްރޯލް ގަންނަ މީހުން އިތުރުވެފައިވާކަމަށެވެ. އަދި އެފްއެސްއެމްއަށް ބާރުބޮޑުވެފައިވާކަމަށެވެ. ގަސަމް ވިދާޅުވީ އެފްއެސްއެމްއަކީ ފެށުނީއްސުރެވެސް ވަކި ލިމިޓެއް ކަނޑައަޅައިގެން ޕެޓްރޯލް ވިއްކާ ކުންފުންޏެއް ކަމަށެވެ. އެހެންނަމަވެސް މި ލިމިޓަށްވުރެ ޑިމާންޑު ބޮޑުވުމުން ތެޔޮ ވިއްކާ މިންވަރު ކޮންމެވެސް ވަރަކަށް ކޮންޓްރޯލްކުރީ ކަމަށް ގަސަމް ވިދާޅުވިއެވެ.
ގަސަމް އިތުރަށް ވިދާޅުވީ ޕެޓްރޯލް ހުސްވެގެން އުޅޭ ފަރާތްތަކަށް މިމަހުގެ 7 ވަނަ ދުވަހު ސްޓޮކް ލިބޭނެ ކަމަށް މައުލޫމާތު ލިބިފައިވާކަމަށެވެ. އަދި މިއީ ވަގުތީގޮތުން ދިމާވެގެން އުޅޭ މައްސަލައެއް ކަމަށް ވިދާޅުވިއެވެ.
އެސްޓީއޯގެ ސަބްސިޑަރީ ކުންފުންޏެއް ކަމަށްވާ އެފްއެސްއެމްއަކީ ރާއްޖޭގައި ޕެޓްރޯލްގެ ވިޔަފާރިކުރާ މައި ކުންފުުންޏެވެ. އެފްއެސްއެމްއިން އަންނަނީ ރާއްޖޭގެ ބޮޑެތި ކުންފުނިތަކަށް ބޭނުންވާ ޕެޓްރޯލާއި، ބޯޓުފަހަރަށް ބޭނުންވާ ޕެޓްރޯލްވެސް ފޯރުކޮށްދެމުންނެވެ.
