ސައުތު އެފްރިކާގެ މަޖިލިސްކުރާ ގޭގައި ރޯވެއްޖެ

ސައުތު އެފްރިކާގެ ކޭޕް ޓައުންގައި ހުންނަ މަޖިލިސްކުރާގޭގައި އަލިފާނުގެ ހާދިސާއެއް ހިނގައިފިއެވެ.

މި ހާދިސާ ހިނގާފައިވަނީ އެގައުމުގެ ގަޑިން ފަތިހު ފަހެއް ޖެހިތަނާއެވެ. ވީޑިއޯތަކުން ފެންނަ ގޮތުގައި ސައުތު އެފްރިކާގެ މަޖިލިސްކުރާގޭގައި ވަރަށް ބޮޑަށް އަލިފާން ރޯވެފައިވެއެވެ. މަޖިލިސްކުރާ ގޭގެ އިމާރާތުން ބޯކޮށް ކަޅު ދުން އަރަމުން އަންނައިރު، އެ އިމާރާތަށް ބޮޑެތި ގެއްލުންތަކެއް ލިބެމުން އަންނަކަމަށް ރިޕޯޓުތައް ބުނެއެވެ.

މި ހާދިސާ ހިނގަން މެދުވެރިވި ސަބަބެއް މިހާތަނަށް ސާފުވެފައި ނުވާއިރު، އިމާރާތުގެ ތެރޭގައި މީހަކު ހުރިކަމެއް ނުވަތަ ނެތްކަމެއް ވެސް މިހާތަނަށް އެނގިފައެއް ނުވެއެވެ.

ކޭޕް ޓައުންގެ ފަޔަރ އެންޑް ރެސްކިއު ޓީމުން މިހާރު އަންނަނީ އަލިފާންގަނޑު ނިއްވުމުގައި ހަރަކާތްތެެރިވަމުންނެވެ. އެޓީމުގެ ސްޕޯކްސް ޕާސަން ވިދާޅުވީ އިމާރާތުގެ ފުރާޅުގައި ވެސް ރޯވަމުން އަންނަކަމަށެވެ. އަދި މި ހާދިސާގެ ސަބަބުން އިމާރާތަށް ބޮޑެތި ގެއްލުންތަކެއް ލިބިދާނެކަމަށް ބެލެވޭ ކަމަށެވެ.

ބައެއް ރިޕޯޓުތައް ބުނާގޮތުން މަޖިލިސްކުރާ އިމާރާތުގެ ބައެއް ފާރުތަކުގައި މިހާރު ވަނި ރެނދުލާފައެވެ.