ޔުނައިޓެޑް އަރަބް އެމިރޭޓްސް (ޔޫއޭއީ)ގެ ރައްޔިތުންގެ ތެރެއިން ކޮވިޑް-19 ވެކްސިން ނުޖަހާ ރައްޔިތުންނަށް ޖެނުއަރީ މަހުގެ 10 ވަނަ ދުވަހުން ފެށިގެން ބޭރު ގައުމުތަކަށް ދަތުރުކުރުން މަނާވާނެކަމަށް އެގައުމުން ހާމަކޮށްފިއެވެ.
ޔޫއޭއީގެ ފޮރިން މިނިސްޓްރީ އާއި ނޭޝަނަލް އެމަރޖެންސީ އެންޑް ޑިޒާސްޓަރ މެނޭޖްމަންޓް އޮތޯރިޓީ އާ ހަވާލާދީ އެގައުމުގެ ދައުލަތުގެ ނިއުސް އެޖެންސީ ޑަބްލިޔުއޭއެމްއިން ރިޕޯޓްކޮށްފައިވާ ގޮތުގައި ވެކްސިން ފުރިހަމަކޮށްފައިވާ މީހުންވެސް ދަތުރުކުރަން ބޭނުންނަމަ ބޫސްޓަރ ޑޯޒް ޖަހަންޖެހޭނެއެވެ. މީގެން އިސްތިސްނާވަނީ ސިއްހީ ސަބަބުތައް ނުވަތަ އެނޫންވެސް ގަބޫލުކުރެވޭ ފަދަ ސަބަބުތައް ހުރި މީހުން އެކަންޏެވެ.
ޔޫއޭއިން އަންނަނީ އެގައުމުގެ 10 މިލިއަން މީހުންނަށް ވެކްސިން ދިނުމުގެ މަސައްކަތް ކުރަމުންނެވެ. ޔޫއޭއީގައި ހޮނިހިރު ދުވަހު ވަނީ 2556 މީހުންނަށް ކޮވިޑް ޖެހިފައެވެ. މިއާއެކު އެގައުމުގައި ކޮވިޑް-19 ޖެހުނު މީހުންގެ ޖުމްލަ އަދަދު ވަނީ 764،493ށް އަރާފައެވެ. އެގައުމުގައި ވަނީ ކޮވިޑް ޖެހިގެން 2165 މީހުން މަރުވެފައެވެ.
