ހުޅުމާލެ ދެވަނަ ފިޔަވަހިން ބީލަމުގެ އުސޫލުން މީހުން ދިރިއުޅުމަށް 60 ގޯތި ވިއްކުމަށް ހައުސިންގެ ޑިވެލޮޕްމެންޓް ކޯޕަރޭޝަން (އެޗްޑީސީ)ން ހުޅުވާލި ފުރުސަތަށް ކުރިމަތިލެވޭނީ ހަމައެކަނި މާލޭގައި ރަޖިސްޓްރީވެފައިވާ ރަށްވެހިންނަށް ކަމަށް ބަޔާންކޮށް އުސޫލު ބަދަލުކޮށްފިއެވެ.

ހުޅުމާލެ ދެ ވަނަ ފިޔަވަހިން 60 ގޯތި ބީލަމުގެ އުސޫލުން ވިއްކުމަށް އެޗްޑީސީން ހުޅުވާލީ ނިމިގެންދިޔަ ޑިސެމްބަރ މަހުގެ 27 ވަނަ ދުވަހުއެވެ. އެއާއެކު މާލެ ސަރަހައްދުގައި ދިރިއުޅޭ އާމްދަނީ މަދު މީހުންނަށް ބިން ލިބޭނެ ގޮތެއް ނެތި ހުޅުމާލެއިން ބިން ވިއްކުމަކީ ބަލައިގަނެވޭނެކަމެއް ނޫންކަމަށް ވިދާޅުވެ އެމްޑީޕީގެ ރައީސް މުހައްމަދު ނަޝީދު ވަނީ ސަރުކާރަށް އެސިޔާސަތު ބަދަލުކުރުމަށް ގޮވާލައްވާފައެވެ. އަދި ބޯހިޔާވަހިކަމަށް ބޭނުންޖެހިފައިވާ މީހުން ތިއްބާ ބީލަމުގެ އުސޫލުން ބޮޑު އަގުގައި ބިން ވިއްކާތީ ގިނަ ބަޔެއްގެ ފާޑުކިޔުންވެސް ވަނީ އެކަމަށް އަމާޒުވެފައެވެ.

އޭގެފަހުން އުސޫލަށް ބަދަލުގެނެސްފައި މިވަނީ ޑިސެމްބަރ މަހުގެ 30 ވަނަ ދުވަހުއެވެ. ޑިސެމްބަރ މަހުގެ 30 ވަނަ ދުވަހު އުސޫލަށް ބަދަލު ގެނެސް ކޮށްފައިވާ އިއުލާންގައި ވަނީ ގޯތި ގަތުމަށް ކުރިމަތިލާ މީހުންގެ ޝަރުތުތަކަށް ބަދަލު ގެނެސްފައެވެ. އެގޮތުން ގެނެސްފައިވާ ބަދަލަކީ:

- މާލޭގައި ރަޖިސްޓްރީވެފައިވާ ރަށްވެއްސަކަށްވުން

- މީލާދީ ގޮތުން 18 އަހަރު ފުރިފައިވުން.

- މާލެ ސަރަހައްދުން ދިރިއުޅުމުގެ ބޭނުމަށް 600 އަކަފޫޓަށްވުރެ ބޮޑު ބިމެއް ނުވަތަ ގޯއްޗެއް ރަޖިސްޓްރީ ކުރެވިފައިވާ ފަރާތަކަށް ނުވުން.

- މާލެ ސަރަހައްދުން ބިމެއް ނުވަތަ ގޯއްޗެއް އެއް ފަރާތަކަށްވުރެ ގިނަ ފަރާތްތަކެއްގެ ނަންމައްޗަށް ރަޖިސްޓްރީ ކުރެވިފައިވާނަމަ، 600 އަކަފޫޓަށްވުރެ ބޮޑު ބައެއް ލިބިފައިވާ ފަރާތަކަށް ވެގެން ނުވުން. މިހާލަތުގައި މައިންބަފައިންގެ ފަރާތުންނާއި އެހެނިހެން ގޮތްގޮތުން ވާރުތަވާންހުރި ބިންތަކެއް ނުހިމެނޭނެ.

ބީލަން ފޯމު ހުޅުވުން އޮންނާނީ އަތިރިމައްޗާ ކުރިމަތިން "ބީޗް ފްރަންޓް"ގެ ގޯތިތަކަށް ފެބްރުއަރީ 9 ވަނަ ދުވަހުގެ 13:00ގައެވެ. އަތިރިމައްޗާ ކައިރިން "ބީޗް ސައިޑް" ނަމަ 16 ފެބްރުއަރީގެ 13:00ގައެވެ.

އެޗްޑީސީން ބުނީ ވިއްކުމަށް ހަމަޖެހިފައިވާ ބިންތައް ހިމެނެނީ އަތިރިމައްޗާ ދިމާއިން ބީޗް ފްރަންޓްގެ 26 ބިން އަދި އަތިރިމައްޗާ ކައިރިން ބީޗް ސައިޑްގެ 34 ބިމެވެ. އެޗްޑީސީން ބުނީ ކޮންމެ ފަރާތަކަށްވެސް ގަނެވޭނީ އެއް ޕްލޮޓް ކަމަށެވެ.

ބީލަން ހުށަހެޅޭނެ އެންމެ ދަށް އަގުކަމަށް އެޗްޑީސީން ކަނޑައަޅާފައިވަނީ ބީޗް ފްރަންޓުން ނަމަ އަކަފޫޓަކަށް 3،900 ރުފިޔާއެވެ. ބީޗް ސައިޑުން ނަމަ އަކަފޫޓަކަށް 3،500 ރުފިޔާއެވެ.

ބީލަށް ފޯމު ވިއްކުމަށް ހަމަޖެހިފައިވަނީ 500 ރުފިޔާއަށެވެ. ބީޗް ފްރަންޓް އަދި ބީޗް ސައިޑްގެ ފޯމަކީ ވަކި ދެ ފޯމް ކަމަށް އެޗްޑީސީން ބުނެއެވެ.

ބީޗް ފްރަންޓް އަދި ބީޗް ސައިޑްގެ ބިޑް ސެކިޔުރިޓީގެ ގޮތުގައި ނެގޭނީ 320،000(ތިންލައްކަ ވިހިހާސް) ރުފިޔާކަމަށް އެޗްޑީސީން ބުނެއެވެ.