ބާމިންހަން ކޮމަންވެލްތް ގޭމްސްގައި ބޭނުންކުރާ ދަންމަރު "ބާމިންހަން 2022 - ކްއީންސް ބެޓަން" ނޮޅިވަރަންފަރަށް ގެންދިޔުމުން، އެރަށުން ހޫނު މަރުޙަބާއެއް ކިޔައިފިއެވެ.
ކޮމަންވެލްތު ގޭމްސްގެ ދަންމަރު ނޮޅިވަރަންފަރަށް ގެންދެވިފައިވަނީ ޖެނުއަރީ 1 ވީ ހޮނިހިރު ދުވަހުގެ ހެނދުނު 10:00 ގައެވެ. ދަންމަރަށް މަރުހަބާ ކިޔުމަށްޓަކައި ނޮޅިވަރަންފަރު ވަނީ ވަރަށް ބޮޑަށް ތައްޔާރުވެފައެވެ. އެގޮތުން މަރުޙަބާ ކިޔުމަށްޓަކައި ރަށުގެ މަގުތައް ވަނީ ވަރަށް ބޮޑަށް ޒީނަތްތެރި ކުރެވިފައެވެ. ދަންމަރަށް މަރުހަބާ ކިޔުމަށްޓަކައި ނޮޅިވަރަންފަރު ރުއްގަނޑު ބީޗްގައި ވަނީ އިތުރު ހަރަކާތްތަކެއްވެސް ކުރިއަށް ގެންގޮސްފައެވެ. މީގެ އިތުރުން މޯލްޑިވްސް އޮލިމްޕިކް ކޮމިޓީގެ ފަރާތުން ނޮޅިވަރަންފަރަށް ވަނީ ޑަސްބިންވެސް ހަދިޔާކޮށްފައެވެ.
ކޮމަންވެލްތު ގޭމްސްގެ ދަންމަރު ނޮޅިވަރަންފަރަށް ގެންދެވުމާއިއެކު އެރަށުގެ ރައްޔިތުން ވަނީ ދަންމަރާއިއެކު ދުވެފައެވެ. މި ދުވުން ރަށުގެ ބަނދަރުން ފަށާފައިވާއިރު ނިންމާލާފައިވަނީ ރަށުގެ ރުއްގަނޑު ބީޗަށެވެ. ކޮމަންވެލްތު ގޭމްސްގެ ދަންމަރު ހިފައިގެން ދަތުރުކުރާ އޮލިމްޕިކް ކޮމިޓީގެ ޓީމް ނޮޅިވަރަންފަރުން ފުރީ ހަވީރުއެވެ. އެއަށްފަހު މި ދަންމަރު ނޮޅިވަރަމަށް ގެންގޮސް ޖަނަވަރީ 2 ވާ އާދިއްތަ ދުވަހު ދިއްދޫއަށް ގެންދިއުމަށް ވަނީ ހަމަޖެހިފައެވެ.
މި ދަންމަރު ރާއްޖެ ގެނެސް ރަސްމީކޮށް މަރުހަބާ ކިޔާފައިވަނީ 2021 ވަނަ އަހަރުގެ ޑިސެމްބަރ މަހުގެ 29 ވަނަ ދުވަހުއެވެ. އަތޮޅުތަކުގެ ތެރެއިން މި ދަންމަރު ފުރަތަމަ ގެންދެވުނު ރަށަކީ ނޮޅިވަރަންފަރެވެ.
