އަނާރާ އަދާލަތުން ވަކިވެވަޑައިގެންފި

ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެންބަރު އަދި ދީނީ އިލްމުވެރިޔާ ޑރ. އަނާރާ ނައީމް އަދާލަތު ޕާޓީން ވަކިވެވަޑައިގެންފިއެވެ.

އަދާލަތު ޕާޓީގެ ރައީސް އަދި ހޯމް މިނިސްޓަރ އިމްރާން އަބްދުﷲއަށް ފޮނުއްވި ސިޓީގައި ވަނީ އަދާލަތުގެ މެންބަރު ކަމުން ވަކިކޮށްދެއްވުމަށް އެދިވަޑައިގަންނަވާ ކަމަށެވެ. އަދި ޕާޓީން ލިބުނު އެހީތެރި ކަމަށް ޝުކުރުއަދާކުރައްވާފައި ވެއެވެ.

އަނާރާ އަދާލަތުން ވަކިވެވަޑައިގެންފައި މިވަނީ އެ ޕާޓީގެ މަސައްކަތްތަކާ ދުރުގައި ހުންނަވާތާ ދުވަސްތަކެއް ފަހުންނެވެ. ރައްޔިތުންގެ މަޖިލީހުގައި މިހާތަނަށް އަދާލަތު ތަމްސީލުކުރެއްވި ހަމައެކަނި މެންބަރަކީ އަނާރާ އެެވެ. އަދާލަތު ޕާޓީގެ ރައީސް އިމްރާން އަބްދުﷲ ޖަލުގައި ހުންނެވި ދުވަސްވަރު އެ ޕާޓީ ތަމްސީލުކުރެއްވުމުގައި އެންމެ މުހިންމު ދައުރެއް އަދާކޮށްފައިވާ އެއް ބޭފުޅަކީ އަނާރާއެވެ. މިހާރު އޮތް ރައީސް އިބްރާހިމް މުހައްމަދު ސޯލިހްގެ ސަރުކާރު ގެނައުމަށްވެސް އަނާރާ ވަނީ މަސައްކަތްކުރައްވާފައެވެ.

އަދާލަތު ޕާޓީގައި ހުންނެވި ކުރީގެ ޖެންޑަރ މިނިސްޓަރު ޝިދާތާ ޝަރީފްވެސް ވަނީ އެ ޕާޓީ ދޫކޮށްލައްވާފައެވެ.