ރާއްޖެ ފުރޮޅިގެން މިދަނީ ތަރައްގީގެ މުޅިން އައު މަރުހަލާއަކަށް - ރައީސް

ރާއްޖެ ފުރޮޅި އިންގިލާބުވެގެން މިދަނީ ތަރައްގީގެ މުޅިން އައު މަރުހަލާއަކަށް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ރާއްޖޭގައި މިހާރު ފެނާއި ނަރުދަމާގެ މަސައްކަތް ހަވާލުނުވެ އޮތް ރަށްރަށުގެ މަސައްކަތް އެވޯޑްކުރުމަށް ބޭއްވި ހަފްލާގައި ވާހަަކަފުޅު ދައްކަވަމުންނެވެ.

Advertisement

މިހާރުވަނީ 16 ރަށެއްގެ ނަރުދަމާއާއި 23 ރަށުގެ ފެނުގެ ނިޒާމް ގާއިމްކުރުމަށް ހަވާލު ކުރެވިފައެވެ.

ރައީސް ވިދާޅުވީ ސައިޒުން ކުޑަޔަސް، ނުވަތަ ބޮޑަސް، އަދި މީހުން މަދަސް، ނޫނީ ގިނަޔަސް ސަރުކާރުން އެއްވެސް ރަށެއް، ކުރި ފަރަގެއް، ތަފާތެއް، ނޯންނާނެ ކަމަށެވެ. މިއަދަށް ފަހު ފެނާއި ނަރުދަމާގެ މަސައްކަތް ހަވާލު ނުކުރެވޭ، މީހުން ދިރިއުޅޭ އެއްވެސް ރަށެއް ދިވެހިރާއްޖެއަކު ނޯންނާނެކަން ރައީސް ފަޚުރުވެރިކަމާއެކު ފާހަގަކުރެއްވިއެވެ.

ރައީސް ވިދާޅުވީ ދެންވާން އޮންނާނީ ހަމަ އެންމެ ގޮތެއް ކަމަށާއި، އެއީ އެކަމަށް ބޭނުންވާ އިމާރާތްތައް އުފުލި, މެޝިނަރީ ގެނެވި, ހޮޅިތައް ވަޅުލެވި, ތަރައްގީގެ ވާހަކަ ދައްކަން ފަށާ ހިސާބުގައި ގައިންތާހިރުވުމުގެ ފެން މުޅިރާއްޖެ، އެކުއެކީ ހިނގާން ފެށުން ކަމުގައެވެ. އެންމެ ފުރަތަމަ އެމަނިކުފާނު ދެއްކެވި ވާހަކަފުޅަކީ އަދި ވެވަޑައިގެންނެވި ވައުދުފުޅަކީ ވެސް އެއީ ކަމަށެވެ. މިއަދަކީ އެ ވައުދު ފުއްދުމުގެ މަންޒިލަށް ބަނދަރު ކުރުމަށްޓަކާ މިގައުމުގެ ރިޔާ ތަންމިނަށް ހުޅުވާލާ، ކަންކަށިން ފޮނުފޮޅާލާ ދުވެލި ހަރުކުރި ދުވަސް ކަމަށް ރައީސް ވިދާޅުވިއެވެ.

ރައީސް ވިދާޅުވީ ހުރިހާ ރަށެއްގެ ފެނާއި ނަރުދަމާ ކަމުގައި ބުނެލަން ފަސޭހަޔަސް ހަގީގަތުގައި އެއީ ނުހަނު ބުރަ، އަދި އެހާމެ ބޮޑު ކަމެއް ކަމަށެވެ. ސަރުކާރުން ފައިސާ ޚަރަދު ކުރާން ޖެހޭ ކަމެއް ކަމަށެވެ.

ވޭތުވެ ދިޔަތަނުގައި އައި ސަރުކާރުތަކަށް ނިންމިފައިވަނީ 69 ރަށުގެ ނަރުދަމާ އާއި 37 ރަށެއްގެ ފެނުގެ ނިޒާމްކަން ރައީސް ފާހަގަކުރެއްވިއެވެ.

އެމަނިކުފާނުގެ ރިޔާސީ ދައުރުގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ އަޅާނެ ކަމުގެ ވައުދުވެވަޑައިގަތީ ވެސް އެމަނިކުފާނު ކަމަށާއި، ސާފުތާހިރު ކަމަކީ އީމާން ކަމުގެ އެއްބައިކަމުގައި ބުނާ ދުރޫސުލް އަހްލާގްގެ ފިލާވަޅު އަދިވެސް ހަނދާނުގައި ހުންނަ ކަމަށް ވިދާޅުވިއެވެ.

ތަރައްގީގެ ވާހަކަ ދައްކަން ވާނީ ގައިންތާހިރުވެގެން ކަމަށް ވިދާޅުވީ އެމަނިކުފާނު ކަމަށާއި، މި ފަސް އަހަރަކީ އެންމެ ތާހިރު ފަސް އަހަރު ކަމަށް ވިދާޅުވީ ވެސް އެމަނިކުފާނު ކަމަށް ވިދާޅުވިއެވެ.