ލެސްޓާ އަތުން ލިވަޕޫލް ބަލިވެއްޖެ

އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ކުޅުނު މެޗުން ލެސްޓާ ސިޓީ އަތުން ބަލިވެ، ތާވަލުގެ އެއްވަނައިގައި އޮތް މެންޗެސްޓާ ސިޓީއާ ގާތަށް ޖެހިލަން ލިބުނު ފުރުސަތު ލިވަޕޫލުން ނަގާލައިފިއެވެ.

އަމިއްލަ ދަނޑުގައި ކުޅުނު މެޗުން ލެސްޓާ މޮޅުވީ ލިވަޕޫލް އަތުން 1-0 ގެ ނަތީޖާއަކުންނެވެ.

މި މެޗު ފަށައިގެން 16 ވަނަ މިނެޓުގައި ލިވަޕޫލަށް ވަނީ ޕެނަލްޓީއެއް ލިބިފައެވެ. މިއީ އޭރިއާ ތެރެއިން ލިވަޕޫލުގެ މުހައްމަދު ސަލާހަށް ލެސްޓާގެ ވިލްފްރިއެޑް އެންޑީޑީ ކުރި ފައުލަކަށް ރެފުރީ ދިން ޕެނަލްޓީއެކެވެ. އެކަމަކު ސަލާހު ފޮނުވާލި ޕެނަލްޓީ ލެސްޓާގެ ގޯލްކީޕަރު ކެސްޕާ ޝްމައިކަލްގެ އަތުގައި ޖެހިފައި ނުކުތްއިރު، ދެވަނަ ފަހަރު ސަލާހު ބޮލުން ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

މިއީ އެންމެ ފަހުން ޖެހި 16 ޕެނަލްޓީގެ ތެރެއިން ސަލާހު އަތުން ޕްރިމިއާ ލީގުގައި ނާކާމިޔާބުވި ފުރަތަމަ ޕެނަލްޓީއެވެ. ސަލާހު އަތުން އެންމެ ފަހުން ލީގުގައި ޕެނަލްޓީއެއް ނާކާމިޔާބުވެފައިވަނީ 2017 ވަނަ އަހަރު ހަޑްސްފީލްޑް ޓައުންއާ ދެކޮޅަށް ކުޅުނު މެޗުގައެވެ.

މި މެޗުގައި ލިވަޕޫލުން ގިނަ ހަމަލާތަކެއް އުފެއްދިއިރު، ފުރަތަމަ ހާފުގައި އޭރިއާ ތެރެއިން ސަލާހު ފޮނުވާލި ހަމަލާއެއްވެސް ކީޕަރު ޝްމައިކަލް ވަނީ ދިފާއުކޮށްފައެވެ. އަދި ދެވަނަ ދެ ވަނަ ހާފުގައި ހުހަށްހުރެ ލިވަޕޫލުގެ ސަޑިއޯ މާނޭ ފޮނުވާލި ހަމަލާއެއް ދިޔައީ ގޯލުގެ ހުރަސް ދަނޑި މަތިން ބޭރަށެވެ.

މި މެޗުގައި ލެސްޓާއިން ޖެހި ހަމައެކަނި ލަނޑު މެޗުގެ 59 ވަނަ މިނެޓުގައި އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެޑަމޯލާ ލުކްމަންއެވެ. އޭނާ މި ލަނޑު ކާމިޔާބުކޮށްފައިވަނީ ކުޅެން އެރިތާ ތިން މިނެޓޫގެ ތެރޭގައެވެ.

މި މެޗުން ލިވަޕޫލް ބަލިވިއިރު، މިއީ މި ސީޒަނުގެ ލީގުގައި އެ ޓީމު ބަލިވި ދެވަނަ މެޗެވެ. އެއާއެކު ތާވަލުގެ ދެވަނައިގައި ލިވަޕޫލް އޮތީ ކުޅުނު 19 މެޗުން ލިބުނު 41 ޕޮއިންޓާއެކުއެވެ. ތިންވަނައިގައި އޮތް ޗެލްސީއަށްވެސް 19 މެޗުން ވަނީ 41 ޕޮއިންޓް ލިބިފައިވާއިރު، ތާވަލިގެ އެއްވަނައިގައި އެންމެ ފަހުގެ ޗެމްޕިއަން ސިޓީ އޮތީ 19 މެޗުން 47 ޕޮއިންޓާއެކުއެވެ.