ފުރަތަމަ ސެންޓްރަލް އޭޝިއަން ވޮލީބޯޅަ ޗެލެންޖް ކަޕް ރާއްޖޭގައި

ސަރަހައްދީ ވޮލިބޯޅައިގެ މައި ޖަމިއްޔާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) އިން ފުރަތަމަ ފަހަރަށް ބާއްވަން އިއުލާން ކުރި ސެންޓްރަލް އޭޝިއަން ވޮލީބޯޅަ ޗެލެންޖް ކަޕްގެ ފިރިހެން އަދި އަންހެން މުބާރާތް ރާއްޖޭގައި ބާއްވަން ދިވެހިރާއްޖެއިން ބިޑްކޮށްފިއެވެ.

މި މުބާރާތް ރާއްޖޭގައި ބޭއްވުމަށް ނިންމާފައި ވަނީ ހޯމަ ދުވަހު ބަންގްލަދޭޝްގައި ބޭއްވި ކާވާގެ އަހަރީ އާއްމު ޖަލްސާގައެވެ.

މި ޖަލްސާގައި 2022 ވަނަ އަހަރު ކާވާ އިން ބާއްވާނެ މުބާރާތްތައް ހިމެނޭ ކަލަންޑަރު މެންބަރު ގައުމުތަކުން ފާސްކޮށްފައިވާއިރު ސެންޓްރަލް އޭޝިއަން ވޮލީބޯޅަ ޗެލެންޖް ކަޕަކީ އަލަށް ކާވާއިން ތައާރަފްކުރި މުބާރާތެކެވެ.

މުބާރާތްތަކަށް އަލަށް ގެނައި ބަދަލުތަކާއެކު ކާވާގެ މެންބަރު 14 ގައުމުގެ ތެެރެއިން އެންމެ ވަރުގަދަ 8 ގައުމު ވާދަކާރާނީ ކާވާ ނޭޝަންސް ލީގުގައެވެ. އެހެން ގައުމުތައް ވާދަކުރާނީ ކާވާ ސުޕަކަޕްގައެވެ. އެގޮތުން ރާއްޖެ ހިމެނޭ ސައުތު އޭޝިއާގެ ގައުމުތަކުގެ ތެރެއިން އެެެންމެ މޮޅު 3 ޓީމު އަދި ސެންޓްރަލް އެޝިއާގެ ގައުމުތަކުން ހަތަރު ޓީމު ކާވާ ނޭޝަންސް ލީގަށް ކޮލިފައިވާނެ އެވެ.

އަހަރީ ޖަލްސާއަށް ފަހު ކާވާގެ ރައީސް ރާއްޖޭގެ ވޮލީބޯޅަ އެސޯސިއޭޝަންގެ ކުރީގެ ރައީސް މުޙައްމަދު ލަތީފް ވިދާޅުވީ އަންނަ އަހަރަކީ ކާވާއަށް އިންގިލާބީ ބަދަލުތަކެއް އަންނާނެ އަހަރަކަށް ވެގެންދާނެ ކަމަށާއި އެގޮތުން ކާވާގެ ގައުމުތަކަށް ހަމަހަމަކަމާއެކު މުބާރާތްތަކުގައި ވާދަކުރުމުގެ ފުރުސަތު ލިބިގެންދާނެ ކަމަށެވެ.

"އަންނަ އަހަރު މުބާރާތްތަކަށް ބޮޑެތި ބަދަލުތަކެއް މެެންބަރު ގައުމުތަކުން މި ވަނީ ގެނެސްފަ. މި ބަދަލުތަކާއެކު ހަމަހަމަކަމާއެކު މުބާރާތްތަކުގައި ގައުމުތަކަށް ވާދަކުރުމަށް ފުރުސަތު ލިބިގެންދާނެ. އެންމެ ވަރުގަދަ ގައުމުތަކަށް ވަކި މުބާރާތެއް އޮތުމުން މުބާރާތްތަކުގެ ފޯރި ވެސް ގަދަވެގެން ދާނެ" މުހައްމަދު ލަތީފު ވިދާޅުވިއެވެ.

އަންނަ އަހަރުގެ މުބާރާތްތަކުގެ ތެރެއިން ސެންޓްރަލް އޭޝިއަން ވޮލީބޯޅަ ޗެލެންޖް ކަޕްގެ ފިރިހެން އަދި އަންހެން މުބާރާތް ރާއްޖޭގައި ބާއްވަން ނިންމުމުން އެކަމަށް އުފާކުރާ ކަމަށާއި މިއީ ރަނގަޅަށް ތައްޔާރު ވެވިއްޖެނަމަ ރާއްޖެއަށް ހޯދޭނެ މުބާރާތެއް ކަމަށް ލަތީފު ވިދާޅުވިއެވެ.

ވޮލީބޯޅަ އެސޯސިއޭޝަނުގެ ރައީސް މުހައްމަދު ރަނޭޝް ވޮލީބޯޅަ ކުރިޔަށް ގެންދިޔުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށާއި މިފަހަރުގެ މުބާރާތުންވެސް އެކަން ފެނިގެންދިޔަ ކަމަށް ލަތީފު ވިދާޅުވިއެވެ. އެހެން ކަމުން ރާއްޖޭގައި މުބާރާތް ބާއްވާއިރު އިތުރު ފުރިހަމަ ކަމެއް އަންނާނެެ ކަމަށް ޔަގީން ކުރާކަމަށް ވިދާޅުވިއެވެ.