ރާއްޖެއިން އިތުރު 132 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ޕޮޒިޓިވްވި 132 މީހުންގެ ތެރެއިން މާލެ ސަރަހައްދުން ޕޮޒިޓިވްވީ 43 މީހުންނެވެ. 46 މީހުން އަތޮޅުތަކުން ޕޮޒިޓިވްވިއިރު ހިންގަމުންދާ ރިސޯޓްތަކުން 42 މީހުން ވަނީ ކޮވިޑަށް ޕޮޒިޓިވްވެފައެވެ. މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 94،864ށް އަރާފައެވެ. މީގެތެރެއިން 92،558 މީހުން ވަނީ ބަލިން ރަނގަޅުވެފައެވެ. މިވަގުތު 2032 ކޭހެއް އެކްޓިވް ކޭހުގެ ގޮތުގައި އަންނަނީ ގުނަމުންނެވެ. މީގެތެރެއިން 10 މީހުންނަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.

261 މީހުން ވަނީ މިބަލީގައި ނިޔާވެފައެވެ.

ރާއްޖޭގެ ކޮވިޑް-19ގެ ހާލަތަށް ބަލާއިރު އޮމިކްރޯން ވޭރިއަންޓްގެ ހަތަރު ކޭހެއް ފެނިފައިވުމާއެކު ރާއްޖެއިން އަންނަނީ ފިޔަވަޅުތައް އަޅަމުންނެވެ. އެގޮތުން ރާއްޖެއިން ބޭރުން އަންނަ ހުރިހާ އެންމެން (ފަތުރުވެރިންވެސް ހިމެނޭހެން) 96 ގަޑިއިރު ނުވާ ޕީސީއާރް ނެގެޓިވް ޓެސްޓެއް ގެނައުމަށް އެޗްޕީއޭއިން ވަނީ އަންގާފަވެ.