ގްރީން ބަލިކޮށް ވެލެންސިއާއަށް ދެވަނަ މޮޅު

ޕްރެޒިޑެންޓްސް ކަޕުގައި ހޮނިހިރު ދުވަހުގެރޭ ކުޅުނު މެޗުން ކުލަބު ގްރީން ސްޓްރީޓްސް ބަލިކޮށް ކުލަބު ވެލެންސިއާއިން މި މުބާރާތުގައި ދެވަނަ މޮޅު ހޯދައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗުން ވެލެންސިއާ މޮޅުވީ ގްރީން އަތުން 3-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ވެލެންސިއާއިން މޮޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން އަލީ ފާސިރު (ސެންޓޭ) އެވެ. އަދި އޭގެ ހަ މިނެޓު ފަހުން ވެލެންސިއާއިން ލީޑު ފުޅާކުރިއިރު، ސްޕެއިންގެ ފޯވާޑް ބޯހަސް މާޓިން ދިން ބޯޅައަކުން މި ލަނޑުވެސް އެ ޓީމަށް ކާމިޔާބުކޮށްދިނީ ސެންޓޭއެވެ.

މި މެޗުގައި ވެލެންސިއާއިން ތިންވަނަ ލަނޑެއް ޖަހާފައިވަނީ ދެވަނަ ހާފު ފަށައިގެން މިނެޓެއްގެ ތެރޭގައެވެ. މި ލަނޑު އެ ޓީމަށް ކާމިޔާބުކޮށްދިނީ މީގެ ކުރިން ގްރީންއަށް ކުޅުނު މިސްރު މިޑްފީލްޑަރު ޚަލީލް ޖަމާލެވެ.

އެކަމަކު މެޗު ނިމެން 10 މިނެޓަށް ވެފައި ވަނިކޮށް ގްރީނުން ވަނީ ލަނޑެއް ޖަހައި، ފަރަގު ކުޑަކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ރިލްވާން ވަހީދު (ރިލޭ) އެވެ. މިއީ އޭރިއާ ތެެރެއިން ގްރީންގެ އަލީ ޝާމިސް (ތޮއްޕޭ) އަށް ވެލެންސިއާގެ ގޯލްކީޕަރު މުޙައްމަދު ފައިސަލް ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުން ވެލެންސިއާ މޮޅުވިއިރު، މި މުބާރާތުގައި ކުޅުނު ފުރަތަމަ މެޗުން އެ ޓީމު ވަނީ ޔުނައިޓެޑް ވިކްޓަރީ (ޔޫވީ) އަތުން 5-0 ގެ ތަފާތު ބޮޑު ނަތީޖާއަކުން މޮޅުވެފައެވެ. އަދި ހޮނިހިރު ދުވަހުގެރޭ ވެލެންސިއާ އަތުން ބަލިވި ގްރީން ވަނީ މި މުބާރާތުގައި ކުޅުނު ފުރަތަމަ މެޗުގައި ދަ ގްރާންޑޭ ސްޕޯޓްސް ކުލަބު އަތުން ފަސޭހަކަމާއެކު 5-0 ގެ ނަތީޖާއަކުން މޮޅުވެފައެވެ.

މެދުކެނޑުމަކަށްފަހު މި އަހަރު ޕްރެޒިޑެންޓްސް ކަޕް ބާއްވާއިރު، މި ފަހަރުގެ މުބާރާތް ރާވާފައިވާ ގޮތުން ފުރަތަމަ ޑިވިޝަނުގެ އަށް ޓީމުގެ މެދުގައި ލީގު ބުރެއް ކުޅުމަށްފަހު، މުބާރާތުގެ ފައިނަލުުގައި ކުޅޭނީ ލީގު ބުރުގެ އެންމެ މޮޅު ދެ ޓީމެވެ. ލީގު ބުރުގައި މިހާތަނަށް ކޮންމެ ޓީމެއް ދެ މެޗު ކުޅެފައިވާއިރު، ދެ މެޗުންވެސް މޮޅުވެފައިވަނީ ހަމައެކަނި ވެލެންސިއާ އާއި މާޒިޔާއެވެ. އެއާއެކު އެ ދެ ޓީމަށް ވެސް ހަ ޕޮއިންޓް ލިބިފައިވާއިރު، ވެލެންސިއާ ކުރީގައި އޮތީ ލަނޑުގެ ތަފާތުންނެވެ.

ތާވަލުގެ ތިންވަނައިގައި އޮތް ގްރީން އާއި ހަތަރުވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް) އަދި ފަސްވަނައިގައި އޮތް ޓީސީ ސްޕޯޓްސް ކުލަބަށް ވަނީ ތިން ޕޮއިންޓް ލިބިފައެވެ. އަދި ހަވަނައިގައި އޮތް ދަ ގްރާންޑޭ އާއި ހަތްވަނައިގައި އޮތް ޔޫވީއަށް އެއް ޕޮއިންޓް ލިބިފައިވާއިރު، ފުލުގައި އިތް އީގަލްސްއަށް އަދި މިހާތަނަށް ޕޮއިންޓެއް ނުލިބެއެވެ.

މި ފަހަރުގެ ޕްރެޒިޑެޓްސް ކަޕުގައި ދެން މެޗެއް ކުޅޭނީ އަންނަ ބުދަ ދުވަހެވެ. އެ ދުވަހު ހަވީރު ކުޅޭ މެޗުގައި ވެލެންސިއާ އާއި ދަ ގްރާންޑޭ ބައްދަލުކުރާއިރު، އެ ރޭ ކުޅޭ މެޗުގައި ބައްދަލުކުރާނީ ގްރީން އާއި ޔޫވީއެވެ.