މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ) އިން ކޮމަންޑޫ ދާއިރާގެ ބައި އިލެކްޝަންއަށް ކެންޑިޑޭޓަކު ނެރެން ނިންމައިފިއެވެ.
މިއީ ކޮމަންޑޫ ދާއިރާގެ ބައި އިލެކްޝަންގައި ވާދަކުރާނެ ކަން އިއުލާނުކުރި 4 ވަނަ ޕާޓީއެވެ. އެމްޓީޑީއިން ކުރި އިއުލާނެއްގައި ބުނެފައިވަނީ، އެ ޕާޓީން ބައި އިލެކްޝަންގައި ވާދަކުރަން ބޭނުންވާ އެ ޕާޓީގެ މެމްބަރުންނަށް މިމަހުގެ 27 ވަނަ ދުވަހުގެ ހަވީރު 5 ޖެހުމާ ހަމައަށް އެކަމަށް އެދުމުގެ ފުރުސަތު ހުޅުވާލެވިފައިވާނެ ކަމަށެވެ. އެޕާޓީގެ އީމެއިލްއަށް މެއިލްކޮށްގެން އެކަމަށް އެދެވޭނެ ކަމަށް އެމްޓީޑީން ބުނެފައިވެއެވެ.
ކޮމަންޑޫ ދާއިރާގެ ބައި އިލެކްޝަން ބާއްވަން ނިންމާފައިވަނީ އެދާއިރާގައި ހުންނެވި މެމްބަރު ހުސައިން ވަހީދު އަވަހާރަވުމާ ގުޅިގެންނެވެ. ހުސައިން ވަހީދު އަވަހާރަވެފައިވަނީ ކެންސަރު ބައްޔަށް ފަރުވާ ހޯއްދަވަމުން ގެންދަވާތާ ގިނަ ދުވަސްތަކެއް ވެފައިވަނިކޮށެވެ. ކޮމަންޑޫ ދާއިރާގެ ޕާލިމަންޓަރީ ބައި-އިލެކްޝަން ޕްރައިމަރީގައި ވާދަކުރުމަށް އެމްޑީޕީ، ޕީޕީއެމް އަދި އެމްއެންޕީއިން ނެރޭ ކެންޑިޑޭޓުން މިހާރު ވަނީ އިއުލާނުކޮށްފައެވެ.
އެގޮތުން އެމްޑީޕީގެ ފަރާތުން ނަން ހުށަހަޅާފައިވަނީ ށ. ފޯކައިދޫ މުހައްމަދު ރާޝިދެވެ. އޭނާއަކީ ފޯކައިދޫ ކައުންސިލްގެ ސެކްރެޓަރީ ޖެނެރަލްއެވެ. ޕްރައިމަރީއަށް އިތުރު މީހަކު ކުރިމަތި ނުލާތީ އެމްޑީޕީގެ ޕްރައިމަރީއެއް ނޯންނާނެއެވެ.
އަދި ކޮމަންޑޫ ދާއިރާގެ ޕީޕީއެމްގެ ޓިކެޓް ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު މޫސާ ފަތުހީ އާދަމަށް އެ ޕާޓީން ވަނީ ދީފައެވެ. އިދިކޮޅު ޕީޕީއެމްގެ ޓިކެޓުގައި އެ ދާއިރާއަށް ވާދަކުރައްވާނެ ބޭފުޅަކު ހޯދުމަށް ޕްރައިމަރީ އަށް ހުޅުވާލުމުން އެކަމަށް އެދި ފޯމު ހުށަހެޅުއްވީ ފަތުހީ އެކަންޏެވެ. އެހެންކަމުން އޭނާ ވެސް ވަނީ ޕްރައިމަރީއަކާ ނުލައި ޓިކެޓު ޔަގީން ކޮށްފައެވެ.
މީގެއިތުރުން ކޮމަންޑޫ ދާއިރާގެ އެތެރޭގެ އިންތިޚާބުގައި ބައިވެރިވުމަށް ހުޅުވާލި ފުރުސަތުގައި އިތުރު މީހަކު ކުރިމަތިލާފައިނުވާތީ މޯލްޑިވަސް ނޭޝަނަލް ޕާޓީގެ(އެމްއެންޕީ) ޓިކެޓް ވެސް ކޮމަންޑޫއަށް އުފަން އަބްދުލް ހަންނާން އިދުރީސް ވަނީ ޔަގީންކޮށްފައެވެ.
ރައްޔިތުންގެ މަޖިލީހުގެ އިންތިޚާބުގެ ގާނޫނުގެ 5 ވަނަ މާއްދާގެ (ށ)ގެ މަތީން، ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު، ޑިސެމްބަރު 16ވާ ބުރާސްފަތި ދުވަހުގެ ހެނދުނު 8:30ން ފެށިގެން ޑިސެމްބަރު 30ވާ ބުރާސްފަތި ދުވަހުގެ ހަވީރު 3:00އާ ހަމައަށްވަނީ ހުޅުވާލާފައިވެއެވެ. ރައްޔިތުންގެ މަޖިލީހުގެ އިންތިޚާބުގެ ވޯޓު ނެގުމަށް ހަމަޖައްސާފައިވަނީ، ފެބުރުވަރީ 5ވާ ހޮނިހިރު ދުވަހުގެ ހެނދުނު 8:00ން ހަވީރު 4:00އަށެވެ. މި އިންތިޚާބުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ ފެބުރުވަރީ 10ވާ ބުރާސްފަތި ދުވަހުއެވެ.
