ދެ ރަށެއްގައި ކްލާސްރޫމްތައް އެޅުމަށާއި އެއްރަށުގައި 3 ބުރީގެ އިމާރާތެއް އެޅުމަށް ހަވާލުކޮށްފި
ށ.ފުނަދޫ ސްކޫލުގެ 15 ކްލާސްރޫމް އިމާރާތުގެ މަސައްކަތް ހަވާލުކޮށްފައިވަނީ ސްވިފްޓް އިންޖީނިއަރިންގ ޕްރައިވެޓް ލިމިޓެޑާ
ނ. މަނަދޫގައި ހުންނަ ނ.އަތޮޅު މަދަރުސާގެ 3 ބުރީގެ އިމާރާތުގެ މަސައްކަތް ކުރުމުގެ އެއްބަސްވުމުގައި ސޮއިކުރުމުގެ ތެރެއިން
ތިން ރަށެއްގެ ސްކޫލްގެ ޖާގައިގެ ދަތިކަން ހައްލުކުރުމަށް އިތުރު ކްލާސްރޫމްތައް އެޅުމަށް ކުންފުނިތަކާއި ހަވާލުކޮށްފިއެވެ.
ޖާގަ އިތުރުކުރުމަށް އިތުރު ކްލާސްރޫމްތައް އެޅުމަށް ހަވާލުކޮށްފައިވަނީ ނ.މަނަދޫ އާއި ހދ.ކުމުންދޫ އަދި ށ.ފުނަދޫގެއެވެ. އެކަމާއި ގުޅިގެން އެޑިޔުކޭޝަން މިނިސްޓްރީން ބުނީ ށ.ފުނަދޫ ސްކޫލުގެ 15 ކްލާސްރޫމް އިމާރާތުގެ މަސައްކަތް ހަވާލުކޮށްފައިވަނީ ސްވިފްޓް އިންޖީނިއަރިންގ ޕްރައިވެޓް ލިމިޓެޑާކަމަށެވެ. 15 ކުލާސްރޫމް އިމާރާތް ހެދުމަށް އެކުންފުނިން ހުށަހަޅާފައިވަނީ 15,316,272.89 (ފަނަރަ މިލިއަން ތިންލައްކަ ސޯޅަހާސް ދުއިސައްތަ ހަތްދިހަ ދެ ރުފިޔާ އަށްޑިހަ ނުވަ ލާރި) އެވެ. އެއީ މަސައްކަތް 360 ދުވަހުގެ ތެރޭގައި މަސައްކަތް ނިންމާގޮތަށެވެ.
ހދ.ކުމުންދޫ ސްކޫލުގެ 12 ކްލާސްރޫމް އިމާރާތުގެ މަސައްކަތް ކުރުމަށް ހަވާލުކޮށްފައިވަނީ ވޭވް ލެންތް ޕްރައިވެޓް ލިމިޓެޑާއެވެ. އެފަރާތުން މަސައްކަތަށް ހުށަހަޅާފައިވަނީ 12,616,224.72 (ބާރަ މިލިއަން ހަލައްކަ ސޯޅަހާސް ދުއިސައްތަ ސައުވީސް ރުފިޔާ ހަތްދިހަ ދެ ލާރި)އެވެ. އެއީ 365 ދުވަހުގެ ތެރޭގައި މަސައްކަތް ނިންމާގޮތަށެވެ.
މީގެއިތުރުން އެޑިޔުކޭޝަން މިނިސްޓްރީން ވަނީ ނ. މަނަދޫގައި ހުންނަ ނ.އަތޮޅު މަދަރުސާގެ 3 ބުރީގެ އިމާރާތުގެ މަސައްކަތް ކުރުމަށް މިމްސް ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކޮށްފައެވެ. އެފަރާތުން މި މަސައްކަތަށް ކުރުމަށް ހުށަހަޅާފައިވަނީ 15,361,325.49 (ފަނަރަ މިލިއަން ތިންލައްކަ ފަސްދޮޅަސް އެއްހާސް ތިންސަތޭކަ ފަންސަވީސް ރުފިޔާ ސާޅީސް ނުވަ ލާރި) އެވެ. 3 ބުރީގެ އިމާރާތް ނިންމުމަށް ހަމަޖެހިފައިވަނީ 360 ދުވަހުގެ ތެރޭގައެވެ.
ސްކޫލްތަކުގެ ޖާގައިގެ މައްސަލަ ރަށްރަށުގަޔާއި މާލޭގައިވެސް ބޮޑުވެފައިވާއިރު އެޑިޔުކޭޝަން މިނިސްޓްރީން އަންނަނީ އެމައްސަލަ ހައްލުކުރުމަށް މަސައްކަތްތަކެއް ކުރަމުންނެވެ.
