މިއަހަރު ބޭސްފަރުވާއަށް ދިޔަ ގިނަ މީހުންނަކީ ކެންސަރު ބަލީގެ މީހުން: ނާއިބުރައީސް
އަހަރެއްގެ ތެރޭގައި 340،000 މީހުންނަށް އާސަންދައިން ޚިދުމަތް ފޯރުކޮށްދޭ
އާސަންދަ ކުންފުންޏަށް 10 އަހަރު ފުރުމުގެ ރަސްމިއްޔާތު
މިއަހަރު ބޭސްފަރުވާއަށް ރާއްޖެއިން ބޭރަށް ދިޔަ މީހުންގެ ދެބައިކުޅަ އެއްބައި މީހުންނަކީ ކެންސަރު ބަލީގެ މީހުން ކަމަށް ރައީސުލްޖުމްހޫރިއްޔާގެ ނާއިބު ފައިސަލް ނަސީމް ވިދާޅުވެއްޖެއެވެ.
ނާއިބުރައީސް ވަނީ އާސަންދަ ކުންފުންޏަށް 10 އަހަރު ފުރުމުގެ ޚާއްސަ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވާފައެވެ. ނާއިބުރައީސްގެ ވާހަކަފުޅުގައި ވަނީ ދުޅަހެޔޮ ސިއްހަތެއްގައި ހުރުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ.
ނާއިބުރައީސް ވިދާޅުވީ އާސަންދަ ކުންފުނީގެ ރިޕޯޓުތަކަށް ބަލާއިރު އަހަރެއްގެ ތެރޭގައި 340،000 މީހުންނަށް އާސަންދަ މެދުވެރިކޮށް އެކި އެކި ފަރުވާ ފޯރުކޮށްދޭކަން ހާމަވާ ކަމަށެވެ. މިއީ ކަންބޮޑުވާހާ ބޮޑު އަދަދެއް ކަމަށް ނާއިބުރައީސް ވިދާޅުވިއެވެ. މިއިން އެނގޭ އެއް ކަމަކީ ގާތްގަނޑަކަށް ހަމަ ކޮންމެ މީހަކީވެސް ބަލިވެގެން ޑޮކްޓަރަށް ދައްކާ މީހެއްކަން ކަމަށެވެ. މިއަދު އެންމެންގެ އުޅުމާއި، ވިސްނުމާއި ވައްޓަފާޅި ބަދަލުކުރަންޖެހޭ ކަމަށް ނާއިބުރައީސް ވިދާޅުވިއެވެ.
ނާއިބުރައީސް ވިދާޅުވީ މިއަހަރުގެ މިހާތަނަށް ބޭސްފަރުވާ ހޯދުމަށް ރާއްޖެއިން ބޭރަށް ދިޔަ މީހުންގެ ދެބައިކުޅަ އެއްބައި މީހުންނަކީ ކެންސަރު ބަލީގެ މީހުން ކަމަށްވާއިރު، މިކަމުގައި އާންމުންގެ ހޭލުންތެރިކަން އިތުރުކުރުމަށް މަސައްކަތްތަކެއް ކުރަންޖެހޭ ކަމަށެވެ.
މީގެ އިތުރުން ޚިދުމަތް ދިނުމުގައި މީހެއްގެ މޫނަކަށް ކަނދުރާއަކަށް ބެލުމެއްނެތި ޚިދުމަތް ދޭންޖެހޭ ކަމަށް ނާއިބުރައީސް ވިދާޅުވެފައިވެއެވެ. އަދި ޚިދުމަތް ދިނުމުގައި ވިހާވެސް ލުއި ފަސޭހަކޮށް ޚިދުމަތް ދިނުމަށް ވިސްނަންޖެހޭ ކަމަށް ވިދާޅުވިއެވެ. އަދި އަވަހަށް ކޮށްދޭންޖެހޭ މަސައްކަތެއް ނަމަ އަވަހަށް ކޮށްދޭންޖެހޭ ކަމަށާއި، ކަމެއް ކޮށްދޭންޖެހެނީ މީހުން ރުޅިއައިސް އެއްޗެހި ކިޔާ ހިސާބަށް ދިޔައީމަ ނޫން ކަމަށް ނާއިބުރައީސް ވިދާޅުވިއެވެ.
ބޭސްފަރުވާ ދިނުމުގައިވެސް މީހުންނަށް ރަނގަޅަށް އަޅާލައި، ރަނގަޅަށް ވާހަކަދެއްކުމަކީ މުހިންމު ކަމެއް ކަމުގައި ވިދާޅުވިއެވެ. ހޭލުންތެރިކަމުގެ ގޮތުން އެންމެން އެއްވަރެއް ނުވާނެ ކަމަށާއި، އެންމެންނަކީވެސް އެހީތެރިކަން ބެނުންވާ ބައެއް ކަމަށް ނާއިބުރައީސް ވަނީ ވިދާޅުވެފައެވެ. ހޮސްޕިޓަލުތައް ގާއިމްކުރެވި ގައުމު ތަރައްގީވެގެންދާއިރު ޚިދުމަތް އަވަހަށް ނުދެވޭނަމަ ރައްޔިތުން އެކަންކަން ބަލައި ނުގަންނާނެ ކަމަށް ވެސް ނާއިބުރައީސް ވަނީ ވިދާޅުވެފައެވެ.
