ޒުވާން ޓީމަކާ އަޅާބަލާއިރު ވަރަށް ރަނގަޅަށް ތައްޔާރުވެވިއްޖެ: މުންތޭ

ސެންޓްރަލް ޒޯން ވޮލީބޯޅަ މުބާރާތުގައި މި ފަހަރު ވާދަކުރާ ގައުމީ ސީނިއާ އަންހެން ވޮލީބޯޅަ ޓީމަކީ ވަރަށް ޒުވާން ޓީމެއް ކަމަށާއި، އެކަމަކު ޓީމު އޮތީ މުބާރާތަށް ވަރަށް ރަނގަޅަށް ތައްޔާރުވެފައި ކަމަށް ގައުމީ ޓީމުގެ ކޯޗު މުންތާޒް އަލީ (މުންތޭ) ބުނެފިއެވެ.

ސެންޓްރަލް ޒޯން ވޮލީބޯޅަ މުބާރާތުގައި ވާދަކުރުމަށް އަންހެން ޓީމު ބަންގްލަދޭޝްއަށް ގޮސްފައިވަނީ އަންގާރަ ދުވަހުގެ ވަގުތެއްގައެވެ. މި ފަހަރުގެ މުބާރާތަށް އަންހެން ޓީމު ނުކުންނައިރު، އަންހެން ވޮލީބޯޅަ ޓީމަށް ވަނީ ބޮޑެތި ބަދަލުތަކެއް އައިސްފައެވެ. އެގޮތުން މީގެ ކުރިން ގައުމީ ސީނިއާ ޓީމަށް ކުޅުނު ކުޅުންތެރިންގެ ތެރެއިން މި ފަހަރުގެ ޓީމުގައި ހިމެނެނީ ހަތަރު ކުޅުންތެރިއެކެވެ. ދެން މި ޓީމުގައި ހިމެނޭނީ މުޅިން އަލަށް ގައުމީ ޓީމުން ޖާގަ ހޯދި ކުޅުންތެރިންނެވެ.

ބަންގްލަދޭޝްގައި ބޭއްވި ފަރިތަކުރުންތަކުގެ ތެރެއިން މީޑިއާތަކަށް ދިން އިންޓަވިއުއެއްގައި މުންތޭ ބުނީ ކުރީގައި އޮތް ސީނިއާ ޓީމުގެ ބަދަލުގައި މި މުބާރާތަށް ނުކުންނާނީ މުޅިން އައު ޓީމެއް ކަމަށެވެ. އެހެންކަމުން ކުޅުންތެރިންގެ މެޗުގެ ތަޖުރިބާ މަދުވާނެ ކަމަށާއި، އެހެންކަމުން ފަރިތަކުރުންތަކުގައި އިސްކަންދީފައިވާނީ ޓީމު ރޭވުމަށް ކަމަށްވެސް ބުންޏެވެ.

މުންތޭ ބުނީ މި ޓީމާއެކު މި މުބާރާތުގައި އެއް ގައުމެއް ނުވަތަ ދެ ގައުމެއް ބަލިކުރެވުނު ކަމުގައިވީ ނަމަވެސް އެއީ ލިބޭނެ ވަރަށް ބޮޑު ކާމިޔާބީއެއް ކަމަށެވެ.

މުންތޭ އިތުރަށް ބުނީ މި މުބާރާތަށް ޓީމު ބޮޑަށް ބައްޓަންކުރީ ރިސީވަށާއި ސާވިސްއަށް ބަލައިގެން ކަމަށެވެ. އަދި އިދިކޮޅުގައި އޮތް ފަސް ޓީމަކީ ވަރަށް ވަރުގަދަ ފަސް ޓީމު ކަމަށާއި، މި މުބާރާތުގައި ރާއްޖެއަށް އޮތް އެންމެ ބޮޑު ގޮންޖެހުމަކީ އިސްކޮޅު ކަމަށްވެސް މުންތޭ ވަނީ ބުނެފައެވެ.

މި ފަހަރުގެ ސެންޓްރަލް ޒޯން އަންހެން މުބާރާތުގައި ރާއްޖެއާއެކު ވާދަކުރާނީ ބަންގްލަދޭޝް އާއި، ނޭޕާލާއި، ސްރީ ލަންކާ އާއި، ކިރްގިސްތާން އަދި އުޒްބެކިސްތާނެވެ. މި މުބާރާތުގައި ރާއްޖޭގެ އަންހެން ޓީމުން ކުޅޭ ފުރަތަމަ މެޗުގައި ބުރާސްފަތި ދުވަހު އުޒްބެކިސްތާނާ ދެކޮޅަށް ނުކުންނައިރު، ދެވަނަ މެޗުގައި ހުކުރު ދުވަހު ނުކުންނާނީ ނޭޕާލާ ދެކޮޅަށެވެ.

އަދި ތިންވަނަ މެޗުގައި ހޮނިހިރު ދުވަހު ލަންކާއާ ދެކޮޅަށް ނުކުންނައިރު، ހަތަރުވަނަ މެޗުގައި އާދީއްތަ ދުވަހު ރާއްޖެ ނުކުންނާނީ ކިރްގިސްތާނާ ދެކޮޅަށެވެ. އަދި މުބާރާތުގެ ފަހު މެޗުގައި ހޯމަ ދުވަހު ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ. މި މުބާރާތް ރާވާފައިވާ ގޮތުން ހަ ގައުމުގެ މެދުގައި ލީގު އުސޫލުން ކުޅުމަށްފަހު، ފައިނަލުގައި ކުޅޭނީ ރޭންކިންގެ ކުރީގައި އޮންނަ ދެ ޓީމެވެ. އަދި ތިންވަނަ އާއި ހަތަރުވަނަ ޓީމު ރޭންކިން މެޗެއް ކުޅޭ ގޮތަށްވެސް ވަނީ ހަމަޖެހިފައެވެ.