އީކުއޭޓަރ ވިލެޖް ގާލާ ޑިނަރގައި މިފަހަރު އާއްމުންނަށް ވެސް ބައިވެރިވެވޭނެ

އާ އަހަރާ ދިމާކޮށް ކޮންމެ އަހަރަކު ވެސް އައްޑޫސިޓީގެ އީކުއޭޓަރ ވިލެޖުން ބާއްވަމުން އަންނަ ގާލާ ޑިނަރ މި ފަހަރު ތަފާތު ގޮތަކަށް އިންތިޒާމްކޮށް، އެ އިވެންޓްގައި އާންމުންނަށް ބައިވެރިވުމުގެ ފުރުސަތު ހުޅުވާލައިފިއެވެ.

"އީކުއޭޓަރ ވިލެޖް ގާލާ ޑިނަރ" އާ ބެހޭ ގޮތުން މައުލޫމާތު ދެއްވަމުން ހޮޓަލުގެ މެނޭޖަރ މުޙައްމަދު ވަހީދު ވިދާޅުވީ މި އިވެންޓަކީ ކޮންމެ އަހަރަކު ވެސް އެ ހޮޓަލުގެ ގެސްޓުންނަށް ޚާއްޞަކޮށްގެން ބާއްވާ އިވެންޓެއް ކަމަށެވެ. އެހެންނަމަވެސް މިފަހަރު އައްޑޫސިޓީގެ ރައްޔިތުންނާއި އައްޑޫ ސިޓީއަށް ޒިޔާރަތް ކުރާ މެހްމާނުންނަށް ވެސް އިވެންޓުގައި ބައިވެރިވެވޭނެއެވެ.

ރާއްޖޭގެ ލީޑިން އެއަރޕޯޓް ހޮޓަލްގެ ގޮތުގައި ދުނިޔޭގެ އެތައް ބައެއްގެ މަގްބޫލުކަން ހޯދާފައިވާ އީކުއޭޓަރ ވިލެޖްގައި ބާއްވާ މި އިވެންޓް އިންތިޒާމު ކުރަނީ އީކުއޭޓަރ ވިލެޖާއި ޓައިޓޭން  މޯލްޑިވްސް ގުޅިގެންނެވެ. ޓައިޓޭން މޯލްޑިވްސްއަކީ ރާއްޖޭގެ ދެކުނުގެ ފަތުރުވެރިކަން ކުރިއެރުވުމަށް ގިނަ މަސައްކަތްތަކެއް ކުރަމުން އަންނަ ކުންފުންޏެކެވެ.

މި އިވެންޓާ ބެހޭ ގޮތުން ރާއްޖެ އެމްވީއަށް މައުލޫމާތު ދެއްވަމުން ޓައިޓޭން މޯލްޑިވްސް ގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވީ މިއީ ކޮވިޑް-19 އާއެކު އުޅެންޖެހިފައިވުމުގެ ސަބަބުން ލިބިފައިވާ ހިތްނުތަނަވަސްކަން ފިލުވާލައި، އާއިލާއާއި ރައްޓެހިން އެއްތަނެއްގައި ތިބެ ހިތްއުފާކޮށްލުމުގެ ފުރުސަތު ފަހިކޮށްދިނުމުގެ މަޤުޞަދުގައި ބާއްވާ އިވެންޓެއް ކަމަށެވެ.

ޑިސެމްބަރ 31 ވާ ހުކުރު ދުވަހުގެ ރޭ 8:00ން 12:30ށް އޮންނަ މި އިވެންޓްގައި ބައިވެރިވާން ބޭނުންވާ ބޭފުޅުންނަށް ޓިކެޓް ގަނެވޭނެ އިންތިޒާމް ޓައިޓޭން މޯލްޑިވްސްގެވެބްސައިޓުގައި ހަމަޖެހިފައިވެއެވެ. އޭގެ އިތުރުން އަބްހަރީ ގްރޭންޑާއި، ޕެބްލްސް އަދި ސައުތު މޯލްޑިވްސްއިން ވެސް ޓިކެޓް ލިބެން ހުންނާނެއެވެ. ގިނަ ފަރާތްތަކެއްގެ އެހީތެރިކަމާއެކު ބޮޑެތި އިނާމްތައް ހިމެނޭ ގޮތަށް ބާއްވާ މި ޑިނަރ ނައިޓުގައި ގުރުއަތުން ހޮވޭ ފަރާތްތަކަށް ސްރީލަންކާ 2 ކޮޅު ޓިކެޓާއި ގެސްޓްހައުސް ސްޓޭތަކާއި ކެންޑްލް ލައިޓް ޑިނަރ ފަދަ އެތައް އިނާމެއް ހުށަހެޅިފައިވެއެވެ.