މިދުވަސްވަރު ރާއްޖެ ސަރަހައްދުން ޖައްވު ނުސާފުކޮށް ފެންނަނީ އިރުވައި މޫސުމާ ދިމާކޮށް ވައި ބަދަލުވާތީ: މެޓް އޮފީސް
މިކަން ބޮޑަށް ފާހަގަކުރެވެނީ ކޮންމެ އަހަރެއްގެވެސް ޑިސެމްބަރ މަހުން ފެށިގެން މާރޗް މަހުގެ ނިޔަލަށް
ހދ ހަނިމާދޫގެ ހުޅަނގު ފަރާތް
މިދުވަސްވަރު ރާއްޖެ ސަރަހައްދުން ޖައްވު ނުސާފުކޮށް ފެންނަނީ ކޮންމެ އަހަރެއްގައިވެސް އިރުވައި މޫސުމާ ދިމާކޮށް، ވައި ބަދަލުވާތީކަމަށް މޫސުމާބެހޭ ގައުމީ އިދާރާއިން ބުނެފިއެވެ.
މެޓް އޮފީހުން ބުނީ، ހުޅަނގުން އިރުމައްޗަށް ވައި ބަދަލުވަމުންދާ މިދުވަސްވަރު ހިމާލަޔަން ސަރަހައްދުން ހިރަފުހާއި ދުން، ވަޔާއެކު ބޭ އޮފް ބެންގަލް ހުރަސްކޮށް ރާއްޖެ ސަރަހައްދަށް ފޯރާކަމަށެވެ. މިއީ ކޮންމެ އަހަރެއްގައިވެސް ވާކަމެއްކަމަށް މެޓް އޮފީހުން ބުނެއެވެ.
މީގެ ސަބަބުން ޚާއްސަކޮށް އުތުރާއި މެދު ރާއްޖެތެރޭގެ ސަރަހައްދުތަކުގައި ވައި ނުސާފުވެ ދުރު ފެންނަވަރު ދަށްވާކަމަށް މެޓް އޮފީހުން ބުނެއެވެ. މިކަން ބޮޑަށް ފާހަގަކުރެވެނީ ކޮންމެ އަހަރެއްގެވެސް ޑިސެމްބަރ މަހުން ފެށިގެން މާރޗް މަހުގެ ނިޔަލަށެވެ.
މެޓް އޮފީހުން ބުނީ އާއްމުކޮށް މޫސުން ރަގަޅު ދުވަސްވަރު، ދުރު ފެންނަ މިންވަރު 10 ކިލޯމީޓަރަށްވުރެ އިތުުރުވިނަމަވެސް، މިދުވަސްވަރު އުތުރާއި މެދުރާއްޖެތެރޭގައި ދުރުފެންނަ މިންވަރުވަނީ 4-5 ކިލޯމީޓަރަށް ދަށްވެފައިކަމަށެވެ.
މެޓް އޮފީހުން ބުނީ، މި ހިރަފުހުގެ ސަބަބުން ޚާއްސަކޮށް ނޭވާލާ ނިޒާމުގެ މައްސަލަތައް ހުންނަ ފަރާތްތަކަށް އުނދަގޫވުން ގާތްކަމަށެވެ. އަދި މިދުވަސްވަރު ވާރޭފެން ރައްކާކުރުމާއި ބޭނުންކުރުމުގައި ސާފުތާހިރުކަމަށް ޚާއްސަ ސަމާލުކަމެއް ދިނުން މުހިންމުކަމަށް މެޓް އޮފީހުން ބުނެއެވެ.
މިދުވަސްވަރު ރާއްޖެ ސަރަހައްދުގައި ވައި ނުސާފުވެފައިވަނީ އިންޑިޔާގައި ވަކިން ޚާއްސަކޮށް ނިއުދިއްލީގެ ވައި ތަޣައްޔަރުވުމުގެ ސަބަބުންކަމަށް ދެކެވޭ ވާހަކަތަކާ ގުޅިގެން "ރާއްޖެއެމްވީ"ން ކުރި ސުވާލު ޖަވާބުގައި މެޓް އޮފީހުން ބުނީ، ފިނިމޫސުމުގައި އާންމުކޮށްވެސް އިންޑިޔާގައި ވައި ނުސާފުވާނެކަމަށެވެ. އެއީ ފިނިމޫސުމާ ދިމާކޮށް އެސަރަހައްދުގައި ދިރިއުޅޭ ދަނޑުވެރިންގެ ދަނޑުތައް އަންދާތީކަމަށެވެ.
ފިނިމޫސުމާ ދިމާކޮށް ނިއުދިއްލީއާއި އެސިޓީގެ ކައިރި ހިސާބުތަކުގައި، ދަނޑުބިންތައް އެންދުމާ ގުޅިގެން، މިދިޔަ މަހުގެ ތެރޭގައި ނިއުދިއްލީގެ ވައި ތަޣައްޔަރުވުމުގެ ސަބަބުން ސްކޫލްތަކާއި އޮފީސްތައް ބަންދުކުރިއެވެ. އެސަރަހައްދުގައި ދަނޑުވެރިކަން ކުރާ ފަރާތްތަކުން ކޮންމެ އަހަރަކުވެސް މިދުވަސްވަރާ ދިމާކޮށް ދަނޑުބިންތައް އަންދަނީ ދަނޑުވެރިކަމުގެ އައު މޫސުމަށް ތައްޔާރުވުމުގެ ގޮތުންނެވެ. ދަނޑުތަކުން ބާކީވާ ބައި އެންދުމަކީ އިންޑިޔާގެ ވައި ނުސާފުވުމަށް މެދުވެރިވާ މައިގަނޑު އެއް ސަބަބަށްވާއިރު، އެކަން ހުއްޓުވުމަށް މިހާތަނަށް ކުރި މަސައްކަތްތައް ވަނީ ނާކާމިޔާބުވެފައެވެ. ފިނި މޫސުމުގައި އެގައުމުގެ ވައި މިކަމުގެ ސަބަބުން އަންނަނީ ތަޣައްޔަރުވަމުންނެވެ.
