އައްޑޫސިޓީގެ މިސްކިތަކަށް ބޮޑުކަމުދިޔަ މީހާ ދޫކޮށްލީ އޭނާގެ ހާލަތު ހުރިގޮތުން ޖަލުގައި ނުބެހެއްޓޭނެތީކަމަށް ފުލުހުން ބުނެފިއެވެ.

ފޭދޫގެ މަސްޖިދުލް އަމާން މިސްކިތުގެ ތެރެއަށް ބޮޑުކަމުދިޔަ މައްސަލައިގައި އޭނާ ފުލުހުންގެ ބެލުމުގެ ދަށަށް ގެންދިޔައީ މިދިޔަ ބުރާސްފަތި ދުވަހުއެވެ. ނަމަވެސް އޭނާގެ ހާލަތު ހުރިގޮތް ބެލުމަށް އެދުވަހު ޑޮކްޓަރަށް ދެއްކުމަށްފަހު ފުލުހުން ވަނީ އޭނާގެ އާއިލާއާ އޭނާ ހަވާލުކޮށްފައެވެ.

ފުލުހުން ބުނީ އުމުރުން 46 އަހަރުގެ އެ ފިރިހެންމީހާ ދޫކޮށްލީ އޭނާގެ ހާލަތު ހުރިގޮތުން ޖަލުގައި ބަހައްޓައިފިނަމަ އޭނާގެ ހާލަތު އިތުރަށް ގޯސްވެދާނެ ކަމަށް ބެލެވޭތީ ކަމަށެވެ. އަދި އާއިލާއާ ހަވާލުކުރުމަށްފަހު އޭނާއަށް ރަނގަޅަށް ބެލުމަށް ނަސޭހަތްތެރިވެފައިވާ ކަމަށެވެ.

މަސްޖިދުލް އަމާން މިސްކިތުގެ ތެރެއަށް ބޮޑުކަމު ދިއުމުގެ އިތުރުން އޭނާ ވަނީ އައްޑޫސިޓީގެ މިސްކިތެއްގެ ތަކެއްޗަށް ގެއްލުންދީފައެވެ. މިސްކިތުގެ ތެރެއަށް ބޮޑުކަމު ގޮސްފައިވާކަން އެނގުނީ ފަތިސް ނަމާދަށް އިމާމު މިސްކިތަށް ދިޔަ ފަހުންނެވެ.

އައްޑޫސިޓީގެ މިސްކިތަކަށް ބޮޑުކަމުގޮސް، މިސްކިތެއްގެ ތަކެއްޗަށް ގެއްލުންދިން މައްސަލައެއް ފެންމަތިވެފައި ވާއިރު، މީގެ ދުވަސްކޮޅެއް ކުރިން ރައީސް އޮފީހުގެ ދޮރުމައްޗަށާއި، ހުކުރު މިސްކިތަށާއި، އިސްލާމީ މަރުކަޒަށާއި، ޖުމްހޫރީ މައިދާނަށް ގަސްތުގައި ކުޑަކަމުދިޔަ މައްސަލައިގައި ހައްޔަރުކުރި މީހާ ވެސް ވަނީ ދޫކޮށްލާފައެވެ.

މި ފަހަކަށް އައިސް ރާއްޖޭގައި މިސްކިތްތަކަށް މިފަދަ ގެއްލުންދިނުން ވަނީ ވަރަށް ގިނަވެފައެވެ. މިފަދަ މައްސަލަތަކުގައި ހައްޔަރުކުރާ ފަރާތްތަކުގެ ކޮންމެވެސް މައްސަލައެއް ހުންނަކަމަށް ބުނެ މިފަދަ ފަރާތްތައް އަންނަނީ ދޫކޮށްލަމުންނެވެ.