ކޮވިޑް-19ށް އިތުރު 97 މީހުން ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް 4،191 ސާމްޕަލް ނަގާފައިވާ ކަމަށާއި، އޭގެ ތެރެއިން 97 މީހުން ޕޮޒިޓިވްވެފައިވާ ކަމަށެވެ. އެއީ މާލެ ސަރަހައްދުން 22 މީހުންނާއި، އަތޮޅުތެރެއިން 59 މީހުން އަދި ހިންގަމުންދާ ރިސޯޓުތަކުން 16 މީހުންނެވެ.

އެޗްޕީއޭއިން ބުނީ ރާއްޖޭގައި ކޮވިޑްގެ އެކްޓިވް ކޭސްގެ ގޮތުގައި 2،011 ހިމެނޭ ކަމަށާއި، އޭގެ ތެރެއިން 23 މީހަކަށް ހޮސްޕިޓަލްގައި އެޑްމިޓް ކޮށްގެން ފަރުވާ ދެމުންދާ ކަމަށެވެ.

މިހާތަނަށް 93629 މީހުން ރާއްޖޭގައި ކޮވިޑަށް ޕޮޒިޓިވްވެފައި ވާއިރު، 91،346 މީހުން ވަނީ ބަލިން ރަނގަޅުވެފައެވެ. އަދި 259 މީހުން މިބަލީގައި ނިޔާވެފައިވެއެވެ.

މާލެ ސަރަހައްދުން ކޮވިޑް-19ގެ ކޭސްތައް ރިޕޯޓު ކުރެވޭ މިންވަރު މަދު ނަމަވެސް އަތޮޅު ތެރެއިން ފެންނަ ކޭސްތައް ގިނައެވެ. އެގޮތުން މިހާތަނަށް 21 ރަށެއް މޮނިޓަރިންގެ ހާލަތަށް ގެނެސްފައިވެއެވެ.

ރާއްޖޭގެ ކޮވިޑްގެ ހަލާތަށް ބަލާއިރު، ކޮވިޑް-19ގެ އައު ވޭރިއެންޓް، އޮމިކްރޯންގެ އިތުރު ހަތަރު ކޭސް ރާއްޖޭން ވަނީ ފެނިފައެވެ. އިތުރު ތަފްސީލް ދެއްވައި އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ، އޮމިކްރޯނަށް ޕޮޒިޓިވްވެފައި ވަނީ ރާއްޖެއަށް ޒިޔާރަތްކުރި ފަތުރުވެރިންތަކެއް ކަމަށެވެ. އަދި މި މީހުންނަކީ އެފްރިކާގެ ދެކުނު ގައުމުތަކަށް މިފަހުން ދަތުރުކޮށްފައިވާ މީހުން ކަމަށެވެ.

މިކަމާ ގުޅިގެން ރިސްކް އެސެސްމެންޓްތައް މިހާރު ހަދަމުން އަންނަކަން ފާހަގަކުރައްވައި ޑރ. އަފްޒަލް ވިދާޅުވީ އިތުރަށް އަޅަން ޖެހޭ ފިޔަވަޅުތަކާމެދު މިހާރު މަޝްވަރާ ކުރެވެމުން އަންނަ ކަމަށެވެ.