އުރީދޫގެ 2022 ވަނަ އަހަރުގެ ކަލަންޑަރު، ފަތުރުވެރިކަމާ ގުޅުވާފައި!
ކަލަންޑަރުން، ރާއްޖޭގެ ގުދުރަތީ ރީތިކަން ވަރަށް ބޮޑަށް ދައްކުވައިދޭ
އުރީދޫގެ 2022 ވަނަ އަހަރުގެ ކަލަންޑަރު ލޯންޗްކުރުން
އުރީދޫ މޯލްޑިވްސްގެ 2022 ވަނަ އަހަރުގެ "މަގޭ ރާއްޖެ" ކަލަންޑަރު ލޯންޗުކޮށްފިއެވެ.
މަގޭ ރާއްޖެ ކަލަންޑަރު ލޯންޗުކޮށްދެއްވީ މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި ޓުއަރިޒަމް މިނިސްޓަރ ޑރ. އަބްދުﷲ މައުސޫމްއެވެ. މި ކަލަންޑަރު ފަރުމާކޮށްފައިވަނީ ރާއްޖޭގެ ފަތުރުވެރިކަމާ ވަރަށް ބޮޑަށް ގުޅުވައިގެންނެވެ. އަންނަ އަހަރަކީ ރާއްޖޭގެ ފަތުރުވެރިކަމުގެ ރަން އަހަރަށްވާއިރު، މިކަން ކަލަންޑަރުން ވަރަށް ބޮޑަށް ދައްކުވައިދެއެވެ. "ސްނެޕްޗެޓް" އެޕް ބޭނުންކޮށްގެން ކަލަންޑަރުގައި އިންނަ ކިއުއާރު ކޯޑު ސްކޭން ކޮށްގެން ރާއްޖޭގެ ގުދުރަތީ ރީތިކަން ދައްކުވައިދޭ އެތައް މަންޒަރެއް ފެންނާނެއެވެ.
އުރީދޫ މޯލްޑިވްސްގެ 2022 ވަނަ އަހަރުގެ ކަލަންޑަރު ލޯންޗުކުރުމުގެ ރަސްމިއްޔާތުގައި ވާހަކަދައްކަވަމުން އެކުންފުނީގެ ސީއީއޯ ނަޖީބް ޚާން ވިދާޅުވީ، ރާއްޖޭގެ ފަތުރުވެރިކަމުގެ ރަން އަހަރު ފާހަގަކުރާއިރު މިކަމުގައި ކޮންމެވެސް ގޮތަކުން ބައިވެރިވެވޭތީ އުފާކުރައްވާކަމަށެވެ. ރާއްޖެއަކީ ދުނިޔޭގެ ހުރިހާ ގައުމެއްގެ ފަތުރުވެރިންގެ މެދުގައިވެސް މަގުބޫލު މަންޒިލެއް ކަމަށާއި، ރާއްޖޭގެ ފަތުރުވެރިކަމަށް އެކި ކަންކަމަށް އެހީވުމަށް އުރީދޫއިން ކުރަމުންދާ މަސައްކަތުގެ ތެރެއިން ވިޒިޓް މޯލްޑިވްސްއިން ކުރިއަށްގެންދިޔަ "ވިޒިޓް މޯލްޑިވްސް ނައު" ކެމްޕެއިންގައިވެސް ބައިވެރިވެފައިވާނެ ކަމަށް ނަޖީބް ވިދާޅުވިއެވެ.
އުރީދޫ މޯލްޑިވްސްގެ 2022 ވަނަ އަހަރުގެ ކަލަންޑަރު ތައްޔާރުކޮށްފައިވާނީ އެއިން ރާއްޖޭގެ ރީތިކަން ވަރަށް ބޮޑަށް ދައްކުވައިދޭނެފަދަ ގޮތަކަށް ކަމަށް ނަޖީބް ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރ މައުސޫމް ވިދާޅުވީ، އުރީދޫއަކީ ރާއްޖޭގެ ފަތުރުވެރިކަމަށް، އަދި ފަތުރުވެރިކަމުގެ ރިކަވަރީއަށް ވަރަށް ބޮޑު އެހީތެރިކަމެއް ވެދެމުން އަންނަ ކުންފުންޏެއް ކަމަށެވެ. ފަތުރުވެރިކަމުގެ ރަން އަހަރާ ދިމާކޮށް ލޯންޗުކުރެވިފައިވާ މި ކަލަންޑަރުންވެސް އުރީދޫގެ ހިއްސާ ދައްކުވައިދޭ ކަމަށް މިނިސްޓަރ ވިދާޅުވިއެވެ.
ރާއްޖޭގެ ފަތުރުވެރިކަމުގެ ރަން އަހަރާ ކުރިމަތިލަމުންދާއިރު، މިއަހަރު ނިމުމުގެ ކުރިން 1.3 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. އަދި އެއަމާޒަށް ވާސިލްވުމަށް މަސައްކަތްކުރަމުންދާއިރު، މިއަހަރުގެ މިހާތަނަށް 1,223,117 ފަތުރުވެރިން ވަނީ ރާއްޖެ އައިސްފައެވެ. މި ހިނގާ ޑިސެމްބަރު މަހުގެ މިހާތަނަށް 65،464 ފަތުރުވެރިން ޒިޔާރަތްކޮށްފައިވާއިރު، މިއީ ކޮވިޑް-19ގެ ހާލަތުގެ ކުރިން 2019 ވަނަ އަހަރުގެ މި މުއްދަތުގައި ރާއްޖެ އައި ފަތުރުވެރިންނަށްވުރެ 4.8 އިންސައްތަ އިތުރު އަދަދެކެވެ.
ފަތުރުވެރިކަމުގެ ރަން އަހަރާ ކުރިމަތިލާއިރު، އަންނަ އަހަރު ވެގެންދާނީ ރާއްޖޭގެ ފަތުރުވެރިކަން، ކޮވިޑް-19ގެ ކުރިން އޮތް ހާލަތަށް ރުޖޫއަވާނެ އަހަރަށް ކަމުގައި ސަރުކާރުން ގެންދަނީ ބުނަމުންނެވެ.
