ޒީރޯ ވޭސްޓަށް ދެވެން އޮތް ގޮތަކީ ކުނި އަންދައިގެން އަންނަ އަޅި ވެސް, ބޭނުންކޮށްގެން ކަމަށް ވޭސްޓް މެނޭޖްމަންޓް އެންޑް ޕޮލިއުޝަން ކޮންޓްރޯލަރ ޑިރެކްޓަރ ޖެނެރަލް އަހްމަދު މުރުޠަޟާ ވިދާޅުވެއްޖެއެވެ.

އަންގާރަ ދުވަހުގެ ރޭ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން މުރުޠަޟާ ވިދާޅުވީ ކުނިން ހަކަތަ އުފެއްދުމުގެ މަޝްރޫއުއަށް ދިރާސާތައް ކޮށްފައިވާ ކަމަށާއި އެކަމުގައި ބަލާފައިވަނީ ތިމާވެއްޓާއި ރައްޓެހި ޚަރަދު ކުޑަ ގޮތްތަކަށެވެ. އެއީ ޒީރޯ ވޭސްޓަށް ދެވެން އޮތް ގޮތަކީ ކުނި އަންދައިގެން އަންނަ އަޅި ވެސް ބޭނުންކޮށްގެން ކަމަށް ވާތީއެވެ.

އޭނާ ވިދާޅުވީ މިކަމަކީ ފަސޭހަކަމެއް ނޫން ކަމަށާއި މެޝިންތަކަށް ކުނި އެޅުމަށްފަހު އެ އަންދާނެ ކަމަށެވެ. އަދި އެތެރޭގައި ހުންނަ ހޫނުން ހަކަތަ އުފައްދާނެއެވެ.

ރާއްޖެއަށް އެންމެ ރަނގަޅު ގޮތަކީ ކުނި އަންދައިގެން މެނޭޖް ކުރުމަށްވާއިރު އެންމެ ޒަމާނީ ވަސީލަތްތައް އެކަމަށް ބޭނުންކުރާނެ ކަމަށްވެއެވެ. ކުނި މެނޭޖް ކުރުމުގެ ނިޒާމު ބައްޓަންކޮށްފައިވަނީ ފުރިހަމައަށް ކަމަށް މުރުޠަޟާ ވިދާޅުވިއެވެ.

ކުނި އެންދުމަކީ ތިމާވެއްޓާއި ރައްޓެހި ގޮތެވެ. މިއީ ޓެކްނޮލޯޖީގެ ގޮތުން އެކަމަށް ބޭނުންކުރާ ވަސީލަތްތަކެވެ. އަދި އެ އިން އަރާ ދުން ވެސް ޖައްވަށް ވިހަ ގޭސް ބޭރު ނުވާނެ ގޮތަށް ސާފުކޮށް ލެވޭކަމަށް މުރުޠަޟާ ވިދާޅުވިއެވެ.

ކުނި ރީސައިކަލް ކުރާއިރު ވަރަށް ގިނަ ބާވަތްތަކުގެ ޓްރާންސްޕޯޓް ބޭނުންކުރާ ކަމަށް ވިދާޅުވިއެވެ. އަދި މިހުރިހާ ކަމަށް ބަލާއިރު ކުނި ރީސައިކަލް ކުރުމަކީ ތިމާވެއްޓާއި ރައްޓެހި ގޮތެއްތޯ އެއީ އުފެދޭ ސުވާލެއްކަމަށް ވިދާޅުވިއެވެ.

މި ޕްރޮޖެކްޓަކީ ރާއްޖޭގެ ތިމާވެށީގެ ތާރީޚުގައި މިހާތަނަށް ކުރެވުނު އެންމެ ބޮޑު ކޮންޓްރެކްޓް ކަމަށާއި އޭޑީބީ ހިލޭ އެހީއާއި، ކޮންސެޝަނަލް ލޯން އަދި އޭއައިއައިބީ ކޮންސެޝަނަލް ލޯން އެހީ އާއި، ޖަޕާން ފަންޑް ފޯ ޕަވަރޓީ ރިޑަކްޝަންގެ ހިލޭ އެހީގެ އިތުރުން ދިވެހި ސަރުކާރުން ޚަރަދުކޮށްގެން ކުރިއަށް ގެންދާ މި ޕްރޮޖެކްޓަށް ޖުމްލަ 304 މިލިއަން ޑޮލަރު ޚަރަދުވާނެ ކަމަށް މިނިސްޓްރީން ބުނެފައި ވެއެވެ.

ދެ ފިޔަވައްސަކަށް ބަހާލައިގެން ކުރިއަށް ގެންދާ މި މަޝްރޫއުގެ ފުރަތަމަ ފިޔަވަހީގެ އިންފްރާސްޓްރަކްޗަރ ތަރައްގީ ކުރުމުގެ މަސައްކަތް މިހާރު މިވަނީ ނިމިފައެވެ.