ސަރުކާރު ހިއްސާވާ ކުންފުނިތަކުގެ ސިޔާސީ މަޤާމުތަކުގެ 50 އިންސައްތަ އަންހެންނުންނަށް ޚާއްސަކުރުމަށް މަސައްކަތްކުރާނަން: ނަޝީދު
މިއީ ރައްޔިތުންގެ މަޖިލީހާއި ޔޫ.އެން.ޑީ.ޕީ މޯލްޑިވްސް ގުޅިގެން އޮސްޓްރޭލިއާ ސަރުކާރުގެ އެހީތެރިކަމާއެކު ކުރިއަށް ގެންދާ ޕްރޮގްރާމެއް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ސަރުކާރު ހިއްސާވާ ކުންފުނިތަކުގެ ސިޔާސީ މަޤާމުތަކުގެ 50 އިންސައްތަ އަންހެން ބޭފުޅުންނަށް ޚާއްޞަކުރުމަށް މަސައްކަތް ކުރައްވާނެކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
"ޕްރެކްޓިސް ޕާލަމަންޓް ފޮރ ވިމެން" ނުވަތަ އަންހެން ބޭފުޅުންނަށް ޚާއްޞަކޮށްގެން ކުރިއަށްގެންދާ ޕްރޮގްރާމްގެ ބައިވެރިންނާ ބައްދަލުކުރައްވައި ވާހަކަދައްކަވަމުން ރައީސް ނަޝީދު ވިދާޅުވީ އެކަމަށް ބޭނުންވާ ޤާނޫނީ ބަދަލުތައް ގެނައުމަށް ސިޔާސީ ޕާޓީތަކާއެކު މަޝްވަރާކުރައްވާނެ ކަމުގެ ޔަޤީންކަން އަރުވާކަމަށެވެ. މީގެއިތުރުން ނަޝީދު ވިދާޅުވީ އިންތިޚާބީ މަޤާމުތަކަށް އަންހެނުން ވާދަކުރެއްވުމަށް ހުރި ދަތިތައް ނައްތާލުމާއި، ހުރިހާ ސިޔާސީ ޕާޓީތަކުން ވެސް އަންހެނުންނަށް ފުރުސަތު ފަހިކޮށްދޭންޖެހޭ ކަމަށް ވިދާޅުވިއެވެ. އެގޮތުން ރައްޔިތުންގެ މަޖިލީހުގެ މިހާރުގެ މެންބަރުންގެ ކިބައިގައި ހުރި ސިފަތައް ދެނެގަނެ، އަންހެނުން އިންތިޚާބު ކާމިޔާބުކުރުމަށް މަސައްކަތް ކުރުމަށް އެދިވަޑައިގަތެވެ. މީގެ އިތުރުން، އިންތިޚާބީ މަޤާމުތަކުގެ އިތުރުން ރައްޔިތުންގެ މަޖިލީހުން އައްޔަނުކުރާ މަޤާމުތަކުގެ ތެރެއިން 50 އިންސައްތަ މަޤާމް އަންހެން ބޭފުޅުންނަށް ޚާއްޞަ ކުރުމާ ގުޅޭގޮތުން ވެސް ބައިވެރިންނާ ނަޝީދު މަޝްވަރާކުރެއްވިއެވެ.
"ޕްރެކްޓިސް ޕާލަމެންޓް ފޯރ ވިމެން" ގެ އުންމީދަކީ ދިވެހި އަންހެނުން ސިޔާސީ ހަރަކާތްތަކާއި ގައުމުގެ އެކިއެކި ނިންމުންތަކުގައި ބައިވެރިވެ، މުޖުތަމަޢަށް ފައިދާހުރި ބަދަލުތަކެއް ގެންނަން އެކީގައި މަސައްކަތްކުރުމަށް ހިތްވަރުދިނުމެވެ. ޕްރޮގްރާމްގެ ތެރެއިން މަޖިލީހުގެ މަސައްކަތްތައް ކުރިއަށްދާ ގޮތުގެ މަޢުލޫމާތު ދިނުމާއި ރައްޔިތުންގެ މަޖިލީހުގެ ނަމޫނާ މާދިރީއެއްކުރިއަށް ގެންދިޔުމެވެ.
މިއީ ރައްޔިތުންގެ މަޖިލީހާއި ޔޫ.އެން.ޑީ.ޕީ މޯލްޑިވްސް ގުޅިގެން އޮސްޓްރޭލިއާ ސަރުކާރުގެ އެހީތެރިކަމާއެކު ކުރިއަށް ގެންދާ ޕްރޮގްރާމެކެވެ.
