އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ކުޅުނު މެޗުން ފަސޭހަކަމާއެކު ލީޑްސް ޔުނައިޓެޑް ބަލިކޮށް އެންމެ ފަހުގެ ޗެމްޕިއަން މެންޗެސްޓާ ސިޓީން ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

އަމިއްލަ ދަނޑުގައި ކުޅުނު މެޗުން ސިޓީ މޮޅުވީ ލީޑްސް އަތުން 7-0 ގެ ތަފާތު ބޮޑު ނަތީޖާއަކުންނެވެ. މިއީ ލީޑްސްގެ ތާރީޚުގައި އެންމެ ތަފާތު ބޮޑުކޮށް އެ ޓީމު ބަލިވި އެއް މެޗެވެ.

މި މެޗުގައި ސިޓީގެ ފަރާތުން މޮޅު ކުޅުމެއް ފެނިގެންދިޔައިރު، މެޗު ފަށައިގެން އަށްވަނަ މިނެޓުގައި ފިލް ފޯޑެން ވަނީ ސިޓީއަށް ލީޑު ނަގައިދީފައެވެ. އަދި އޭގެ ފަސް މިނިޓް ފަހުން ރިޔާދު މާރޭޒް ނަގައިދިން ހުރަހަކުން ޖެކް ގްރީލިޝް ސިޓީގެ ލީޑު ފުޅާކޮށްދިންއިރު، މިއީ މިދިޔަ އޮގަސްޓް މަހުގެ 21 ވަނަ ދުވަހުގެ ފަހުން ގްރީލިޝް ކާމިޔާބުކުރި ފުރަތަމަ ލަނޑެވެ.

ދެން މި މެޗުގެ ފުރަތަމަ ހާފުގައި ސިޓީން ކާމިޔާބުކުރި ތިންވަނަ ލަނޑު މެޗުގެ 32 ވަނަ މިނެޓުގައި ރޮޑްރީ ދިން ބޯޅައަކުން ޖަހައިދިނީ ކެވިން ޑި ބްރޭނާއެވެ. މި މެޗުގައި ޑި ބްރޭނާ ލަނޑު ޖެހިއިރު، މިއީ ގިނަ ދުވަސްތަކަކަށްފަހު ފުރަތަމަ އެގާރައިގައި ހިމެނިގެން ޑި ބްރޭނާ ކުޅުނު ފުރަތަމަ މެޗެވެ.

މި މެޗުގެ ދެވަނަ ހާފު ފަށައިގެން ހަތަރުވަނަ މިނެޓުގައި މާރޭޒް ސިޓީގެ ހަތަރުވަނަ ލަނޑު ޖަހައިދިންއިރު، އެ ޓީމުގެ ފަސްވަނަ ލަނޑު މެޗުގެ 62 ވަނަ މިނެޓުގައި ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ޑި ބްރޭނާއެވެ. އޭގެ ފަހުން ސިޓީގެ ދެ ޑިފެންޑަރުން ކަމަށްވާ ޖޯން ސްޓޯންސާއި ނޭތަން އަކޭ ވަނީ އެ ޓީމުގެ އަނެއް ދެ ލަނޑު ޖަހައިދީފައެވެ.

މި މޮޅާއެކު ސިޓީން ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުން 17 މެޗުން 41 ޕޮއިންޓް ލިބިފައެވެ. ދެވަނައިގައި އޮތް ލިވަޕޫލަށް 16 މެޗުން 37 ޕޮއިންޓް ލިބިފައިވާއިރު، ތިންވަނައިގައި އޮތް ޗެލްސީއަށް ވަނީ 16 މެޗުން 36 ޕޮއިންޓް ލިބިފައެވެ. އެހެންކަމުން ލީގުގައި ބުރާސްފަތި ދުވަހުގެރޭ ލިވަޕޫލާއި ޗެލްސީން ކުޅޭ މެޗުތަކުގެ ނަތީޖާ ނުކުންނަ ގޮތަކުން ސިޓީގެ ލީޑު ހަނިވުމުގެ ފުރުސަތު އެބައޮތެވެ.