ކައުންސިލްތަކުގެ މިލްކުވެރިކަމުގެ ދަށުގައިވާ ބިންބިމުން ވިޔަފާރި ކުރެވޭ ގޮތް ހަދައިފި
13 ޑިސެމްބަރު 2021 | ހޯމަ 09:34ދައުލަތުގެ އިދާރާތަކާ ހަވާލުކުރެވޭ ބިންތައް ބޭނުންކުރަންވާނީ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިން
ބިން ދޫކުރަން ވާނީ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިން
ކައުންސިލްތަކުގެ މިލްކުވެރިކަމުގެ ދަށުގައިވާ ބިމުން ވިޔަފާރި ކުރެވޭ ގޮތް ހަދައިފިއެވެ.
ބިމާބެހޭ ގާނޫނަށް ގެނައި 8 ވަނަ އިސްލާހުގެ ބިލު ރައީސުލްޖުމްހޫރިއްޔާ ހޯމަ ދުވަހު ތަސްދީގުކުރެއްވުމާއެކު ކައުންސިލްތަކަށް އެ ކައުންސިލެއްގެ މިލކުވެރިކަމުގެ ދަށުގައިވާ ބިމުން ވިޔަފާރި ކުރެވޭ ގޮތް މިވަނީ ހަމަޖެހިފައެވެ.
ގާނޫނުގައިވާ ގޮތުން އެކި ބޭނުންތަކަށާއި ކަންކަމަށް އެކަށަައަޅާ ބިންތައް ކަމާބެހޭ މިނިސްޓްރީ ތަކާއި ދައުލަތުގެ އިދާރާތަކާއި ހަވާލުކުރާނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އެއްގޮތްވާ ގޮތުގެ މަތިންނެވެ. އަދި މިނިސްޓްރީ ތަކާއި ދައުލަތުގެ އިދާރާތަކާ ބިންތައް ހަވާލުކުރުމާއި ވަކިކުރުމާއި ގުޅޭ އުސޫލުތައް މިގާނޫނުގެ ދަށުން ހަދާ ގަވާއިދުގައި ބަޔާންކުރަންވާނެއެވެ. އަދި މިގަވާއިދު ހަދަން ވާނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާ އެއްގޮތްވާ ގޮތުގެ މަތިންނެވެ.
މީގެއިތުރުން ބިމާބެހޭ މުއާމަލާތްކުރާނެ ގޮތް ކަމަށް ބުނެފައިވަނީ ބިން ހަވާލުކުރެވޭ މިނިސްޓްރީތަކާއި ދައުލަތުގެ އިދާރާތަކުން ބިން ދޫކޮށް ކުއްޔަށްދީ ބިމާބެހޭ އެހެނިހެން މުއާމަލާތްކުރަންވާނީ މިގާނޫނާއި އެކި ބޭނުންތަކަށާއި ކަންކަމަށް އެކަށައަޅާ ބިންބިމާ ބެހޭގޮތުން އަމަލުކުރެވޭ ގާނޫނުތަކާއި ގަވާއިދުތަކުގައި ބަޔާންކޮށްފައިވާ ގޮތުގެ މަތިންނެވެ.
އިޞްލާޙްކޮށްފައިވާ ބައެއް ކަންތައްތަކުގެ ތެރޭގައި އެކި ބޭނުންތަކަށާއި ކަންކަމަށް އެކަށައަޅާ ބިންތައް، ކަމާބެހޭ މިނިސްޓްރީތަކާއި، ދައުލަތުގެ އިދާރާތަކާ ޙަވާލުކުރާނީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނާ އެއްގޮތްވާ ގޮތުގެމަތިންކަމުގައި ބަޔާންކޮށްފައިވެއެވެ. އަދި މި ޤާނޫނުގެ 5 ވަނަ މާއްދާގައިވާ ގޮތުގެމަތިން ބިން ޙަވާލުކުރެވޭ މިނިސްޓްރީތަކާއި ދައުލަތުގެ އިދާރާތަކުން، ބިން ދޫކޮށް، ކުއްޔަށްދީ، ބިމާބެހޭ އެހެނިހެން މުޢާމަލާތުކުރަންވާނީ، މި ޤާނޫނާއި، އެކި ބޭނުންތަކަށާއި ކަންކަމަށް އެކަށައަޅާ ބިންބިމާ ބެހޭގޮތުން ޢަމަލުކުރެވޭ ޤާނޫނުތަކާއި ގަވާއިދުތަކުގައި ބަޔާންކޮށްފައިވާ ގޮތުގެމަތިންކަމުގައިވެސް ބަޔާންކޮށްފައިވެއެވެ.
މީގެއިތުރުން އިގްތިޞާދީ ބޭނުމަކަށް އެކަށައަޅައި ކަމާބެހޭ މިނިސްޓްރީތަކާއި ނުވަތަ ދައުލަތުގެ އިދާރާތަކާއި ހަވާލުކުރާ ބިމުން ނުވަތަ ކައުންސިލްތަކުގެ މިލްކުވެރިކަމުގެ ދަށުގައިވާ ބިމުން ގާނޫނުގެ ދަށުން ހަދާ ގަވާއިދުތަކާއި އެއްގޮތްވާ ގޮތުގެމަތިން ވިޔަފާރި އުސޫލުން މުއާމަލާތްކުރެވޭއިރު ކަމާބެހޭ މިނިސްޓްރީތަކާއި ނުވަތަ ދައުލަތުގެ އިދާރާތަކާއި ހަވާލުކުރެވޭ ބިން ނުވަތަ ކައުންސިލްގެ މިލްކުވެރިކަމުގެ ދަށުގައިވާ ބިން އެ ފަރާތްތަކުން ގާނޫނުއަސާސީ އާއި މިގާނޫނާއި ޚިލާފުނުވާ ގޮތުގެމަތިން ދެވަނަ ފަރާތަކަށް ވިއްކައި ނުވަތަ ކުއްޔަށް ދެވިދާނެކަމަށް ގާނޫނަށް ގެނައި އިސްލާހުގައި ބުނެފައިވެއެވެ.
އެއްވެސް މީހަކު ނުވަތަ ބަޔަކު އެމީހެއްގެ ނުވަތަ އެބައެއްގެ އަމިއްލަ ބިމެއްގައި ނުވަތަ ބަންޑާރަ ގޯއްޗެއްގައި ހަދާފައިވާ އިމާރާތް އެއްމެދު އިމާރާތަކަށް ބަދަލުކުރުމަށް ބޭނުންނަމަ މިގާނޫނުގެ ދަށުން ހަދާ ގަވާއިދުގައި ބަޔާންކުރާ ގޮތުގެމަތިން އެ އިމާރާތެއް އެއްމެދު އިމާރާތެއްގެ ގޮތުގައި ރަޖިސްޓްކުރަންވާނެކަމަށްވެސް ފާސްކުރި ބިލްގައި ބުނެފައިވެއެވެ.
ބިމާ ބެހޭ ގާނޫނުގައިވާ ގޮތުން ރާއްޖޭގެ ބިމުގެ ދަފުތަރު ހޯމް މިނިސްޓްރީއާއި، ޕްލޭނިން މިނިސްޓްރީ އަދި އެންވަޔަރަމަންޓް މިނިސްޓްރީން ބަލަހައްޓަން ޖެހެއެވެ. އަދި ގާނޫނަށް އަލަށް ހުށަހެޅި އިސްލާހުގެ ދަށުން ކައުންސިލްތަކުގެ މިލްކުވެރިކަމުގެ ދަށުގައިވާ ބިންތަކުގެ މައުލޫމާތު ބިމުގެ ދަފްތަރުގައި ހިމަނަން ޖެހެއެވެ.
