ކަލިއަރީ ބަލިކޮށް އިންޓަ އެއްވަނައަށް

އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން ކަލިއަރީ ބަލިކޮށް ތާވަލުގެ އެއްވަނައަށް އެންމެ ފަހުގެ ޗެމްޕިއަން އިންޓަ މިލާން ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ ކަލިއަރީ އަތުން 4-0 ގެ ނަތީޖާއަކުންނެވެ.

މި މޮޅާއެކު ތާވަލުގެ އެއްވަނައަށް އިންޓަ ޖެހިލިއިރު، ލީގުގައި ހޮނިހިރު ދުވަުގެރޭ ކުޅުނު މެޗުން މީގެ ކުރިން ތާވަލުގެ އެއްވަނައިގައި އޮތް އޭސީ މިލާން ވަނީ އުދިނޭޒީއާ 1-1 ގެ ނަތީޖާއަކުން އެއްވަރުވެފައެވެ. އެއާއެކު ތާވަލުގެ އެއްވަނައަށް އަރަން ފުރުސަތު ލިބުނު ނާޕޮލީ ވަނީ އާދީއްތަ ދުވަހުގެރޭ ކުޅުނު މެޗުން އެމްޕޯލީ އަތުން 1-0 ގެ ނަތީޖާއަކުން ބަލިވެފައެވެ.

އާދީއްތަ ދުވަހުގެރޭ އިންޓަގެ ދަނޑުގައި ކުޅުނު މެޗުގައި އެ ޓީމުން ލީޑު ނަގާފައިވަނީ މެޗުގެ 29 ވަނަ މިނެޓުގައެވެ. ހަކަން ޗަޅަނޯލޫ ނެގި ކޯނަަރަކުން މި ލަނޑު އެ ޓީމަށް ކާމިޔާބުކޮށްދިނީ ލަޓާރޯ މާޓިނޭޒެވެ. އޭގެ ފަހުން ފުރަތަމަ ހާފުގައި ލީޑުފުޅާކުރަން އިންޓައަށް ޕެނަލްޓީއެއް ލިބުނު ނަމަވެސް، މާޓީނޭޒް ފޮނުވާލި ޕެނަލްޓީ ކަލިއަރީގެ ގޯލްކީޕަރު އަލެސިއޯ ކްރާނޯ ވަނީ މަތަކޮށްފައެވެ.

މި މެޗުގައި އިންޓައިން ލީޑު ފުޅާކޮށްފައިވަނީ ދެވަނަ ހާފު ފަށައިގެން ފަސްވަނަ މިނެޓުގައެވެ. ނިކޯލޯ ބަރެއްލާ ނެގި ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އަލެކްސިސް ސަންޗޭޒެވެ. އަދި މެޗުގެ 66 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން ޗަޅަނޯލޫ ވަނީ އިންޓަގެ ތިންވަނަ ލަނޑު ޖަހައިދީފައެވެ. އޭގެ ދެ މިނެޓު ފަހުން ބަރެއްލާ ހުރަސްކޮށްލި ބޯޅައަކުން އިންޓަގެ ހަތަރުވަނަ ލަނޑު ކާމިޔާބުކޮށްދިނީ މާޓިނޭޒެވެ.

މި މޮޅާއެކު ތާވަލުގެ އެއްވަނައަށް އިންޓަ ޖެހިލީ ކުޅުނު 17 މެޗުން ލިބުނު 40 ޕޮއިންޓާއެކުއެވެ. ދެވަނައިގައި އޮތް މިލާނަށް 17 މެޗުން 39 ޕޮއިންޓް ލިބިފައިވާއިރު، ތިންވަނައިގައި އޮތް އެޓަލަންޓާއަށް ވަނީ 17 މެޗުން ލިބިފައިވަނީ 37 ޕޮއިންޓެވެ. އަދި ތާވަލުގެ ހަތަރުވަނައިގައި ނާޕޮލީ އޮތީ 17 މެޗުން 36 ޕޮއިންޓާއެކުއެވެ.

މީގެ އިތުރުން ތާވަލުގެ ފަސްވަނައިގައި އޮތް ފިއޮރެންޓީނާއަށް 17 މެޗުން 30 ޕޮއިންޓް ލިބިފައިވާއިރު، ޔުވެންޓަސް އޮތީ ތާވަލުގެ ހަވަނައިގައި 17 މެޗުން 28 ޕޮއިންޓާއެކުއެވެ.