ޖެންޑަރ މިނިސްޓްރީން މޯބައިލް އެޕްލިކޭޝަނެއް ހެދުމުގެ މަސައްކަތް ފަށައިފި
މި އެޕްލިކޭޝަން މެދުވެރިކޮށް މައްސަލަ ހުށަހެޅޭނެ
ޖެންޑަރ މިނިސްޓްރީގެ ސްޓޭޓް މިނިސްޓަރ ޒިފްލީން އެ މިނިސްޓްރީގެ މަސައްކަތްތަކާއި ގުޅޭ ގޮތުން ވާހަކަ ދައްކަވަނީ
މޯބައިލް އެޕްލިކޭޝަނެއްގެ މަސައްކަތް ކުރަމުންދާ ކަމަށް ޖެންޑަރ މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޖެންޑަރ މިނިސްޓްރީގެ ސްޓޭޓް މިނިސްޓަރ ޒިފްލީނާ ހަސަން ވިދާޅުވީ އެޕްލިކޭޝަނެއް ތައްޔާރުކުރުމުގެ ބޭނުމަކީ ހުށަހެޅޭ މައްސަލަތަކާއި، މައްސަލަތަކުގެ ވައްތަރުތަކާއި، މައްސަލަތަކުގެ އަދަދާއި މިހެން ގޮސް ހުންނަ ކަންކަން ތަރުތީބުކޮށްލެވޭނެ ގޮތަށް މަސައްކަތެއް ކުރެއްވުން ކަމަށެވެ. އަދި މި އެޕްލިކޭޝަނަކީ ޔޫއެންއެފްޕީއޭއާއި ގުޅިގެން ކުރަމުން އަންނަ މަސައްކަތެއް ކަމަށެވެ.
ޒިފްލީނާ ވިދާޅުވީ މޮބައިލް އެޕްލިކޭޝަންގެ ތެރެއިން ތަފާސް ހިސާބުތައް ހޯދާލަން ފަސޭހަވެގެންދާނެ ކަމަށެވެ. އަދި އެޕްލިކޭޝަން މެދުވެރިކޮށް މައްސަލަ ހުށަހަޅަން ބޭނުންވާ ފަރާތްތަކަށް އެކަން ކުރެވޭނެ ކަމަށާއި، އެޕްލިކޭޝަންގެ ސަބަބުން މައްސަލަ ހުށަހަޅާ ފަރާތަށްވެސް ފަސޭހަވެގެންދާނެ ކަމަށެވެ.
ޒިފްލީނާ ވިދާޅުވީ ޓެކްނޮލެޖީގެ ދާއިރާއިން ދުނިޔެ ތަރައްގީވަމުން އަންނަ އިރު ވީހާވެސް ބޮޑަށް ޓެކްނޮލޮޖީއަށް އަހުލުވެރިވެފައިވާ މުއައްސަސާއަކަށް ހަދައިގެން ކުރިއަށް އޮތްތަނުގައި ކުރިއަށްދާން ބޭނުންވާތީ މިފަދަ މަސައްކަތްތައް މިނިސްޓްރީން ކުރަމުން އަންނަ ކަމަށެވެ.
ޖެންޑަރ މިނިސްޓްރީއަށް ހުށަހެޅޭ މައްސަލަތައް އާންމުކުރަމުން އަންނަނީ މަހަކު އެއްފަހަރު ވެބްސައިޓުގައެވެ. ނިމިގެން ދިޔަ އޮކްޓޯބަރ މަހުގައި ވެސް ޖެންޑަރ މިނިސްޓްރީއަށް 222 މައްސަލަ ރިޕޯޓުކޮށް އެޓެންޑްކޮށްފައިވެއެވެ.
