ގުރައިދޫ ޚާއްސަ އެހީއަށް ބޭނުންވާ މީހުންގެ މަރުކަޒުގެ ހާލަތު ވަރަށް ދަށްކަމަށް އދ. ގެ ވޯރކިން ގްރޫޕުން ބުނެފި
9 ޑިސެމްބަރު 2021 | ބުރާސްފަތި 11:51ގުރައިދޫ މަރުކަޒަށް ބޭނުންވާ ވަސީލަތްތަކެއް ނެތް، އެކަށީގެންވާ ބަޖެޓްވެސް އެތަނަކަށް ނުލިބޭ
ގުރައިދޫގައި ހުންނަ، ޚާއްސަ އެހީއަށް ބޭނުންވާ މީހުންގެ މަރުކަޒު
ގުރައިދޫ ޚާއްސަ އެހީއަށް ބޭނުންވާ މީހުންގެ މަރުކަޒުގެ ހާލަތު ވަރަށް ދަށް ކަމަށް އދ. ގެ ވޯރކިން ގްރޫޕް އޮން އާބިޓްރަރީ ޑިޓެންޝަނުން ބުނެފިއެވެ.
ރާއްޖޭގެ ދައުވަތަކަށް ރާއްޖެ އައިސް، 10 ދުވަހުގެ ތަހުގީގަކަށްފަހު ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ޓީމުން ބުނީ، ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒުގެ ހާލަތު ހުރީ ވަރަށް ދަށު ދަރަޖައިގައި ކަމަށާއި، އެތަނުގައި ތިބޭ މީހުންނަށް އެކަށީގެންވާ ވަސީލަތްތައް ނެތް ކަމަށެވެ. އެތަނުގައި އެކަށީގެންވާ އަދަދަކަށް މުވައްޒަފުންވެސް ނެތްއިރު، ބޭނުންވާ ސައިކޯ ސޯޝަލް ސަޕޯޓްވެސް ފޯރުކޮށް ނުދެވޭ ކަމަށެވެ.
އެތަނަށް ކުރި ޒިޔާރަތުގައި ހޯދުނު ހޯދުންތަކުގެ އަލީގައި ވާހަކަދައްކަމުން އެ ގްރޫޕުން ބުނީ، އެތަނުން ދޫކޮށްލާފައި ތިބި 20 މީހަކު (އާއިލާއިން ހަވާލު ނުވާތީ) އެތަނުގައި މިހާރުވެސް އެބަތިބި ކަމަށެވެ. އަދި ކުޑަ 2 ކުދިންވެސް ބޮޑެތިމީހުންނާއެކު އެތަނުގައި ގެންގުޅެމުންދާ ކަމަށާއި، އެކުދިން ވަކިން ގެންގުޅޭނެ ތަނެއް ނެތް ކަމަށެވެ.
އުމުރުން ދުވަސްވީ މީހުންނަށް ޚިދުމަތްދޭނެ ވަކި ތަނެއް ނެތުމުން ގުރައިދޫ މަރުކަޒުން ދޫކޮށްލާ މީހުންވެސް ދާނެ ވަކި ތަނެއް ނެތްކަން އެ ގްރޫޕުން ފާހަގަކުރިއެވެ.
ގުރައިދޫ މަރުކަޒަށް ބޭނުންވާ ވަސީލަތްތައް ނެތް ކަމަށާއި، އެކަށީގެންވާ ބަޖެޓްވެސް އެތަނަށް ނުލިބޭ ކަމަށާއި، ގުރައިދޫ މަރުކަޒަށް އެހާ ބޮޑަށް ސަރުކާރުތަކުން އަޅާލެވިފައި ނެތްކަންވެސް އެ ގްރޫޕުން ފާހަގަކުރިއެވެ. އެހެންކަމުން އެކަށީގެންވާ ވަސީލަތާ މީހުން ތަމްރީނު ކުރުމަށް އެ ގްރޫޕުން އެދިފައިވެއެވެ.
