ރަށްރަށުން ޕޮޒިޓިވްވި 102 މީހުންނާއެކު އަންގާރަ ދުވަހު 133 މީހަކު ޕޮޒިޓިވް
މާލެއިން ޕޮޒިޓިވްވީ 30 މީހުން
ރެންޑަމް ސާމްޕަލިންގ މަސައްކަތުގެ ތެރެއިން
ކޮވިޑް-19ށް އިތުރު 133 މީހުން ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ ތަފާސްހިސާބުތައް ދައްކާ ގޮތުން، ހޯމަ ދުވަހުގެ އިރުއޮއްސި 6:00ން އަންގާރަ ދުވަހުގެ އިރުއޮއްސި 6:00ށް މާލެ ސަރަހައްދުން ނެގި 1107 ސާމްޕަލާއެކު ޖުމްލަ 3986 ސާމްޕަލް ވަނީ ޓެސްޓްކޮށްފައެވެ.
3986 ސާމްޕަލްގެ ތެރެއިން ޕޮޒިޓިވްވެފައިވަނީ 133 މީހުންނެވެ. އެއީ މާލެ ސަރަހައްދުން ޕޮޒިޓިވްވި 30 މީހުންނާއި، ރަށްރަށުން ޕޮޒިޓިވްވި 102 މީހުންނާއި، ރިސޯޓްތަކުން ޕޮޒިޓިވްވި އެކެކެވެ
މިއާއެކު ރާއްޖެއިން މިހާތަނަށް 92،501 މީހުން ވަނީ ޕޮޒިޓިވްވެފައެވެ. އަދި މީގެ ތެރެއިން 90،401 މީހުން ވަނީ ބަލިން ރަނގަޅުވެފައެވެ. މި 24 ގަޑިއިރު ތެރޭގައި 97 މީހުން ވަނީ ބަލިން ރަނގަޅުވެފައެވެ.
އެކްޓިވް ކޭހުގެ ގޮތުގައި 1832 ކޭސް ރިޕޯޓްކޮށްފައިވާ އިރު، މީގެ ތެރެއިން 15 މީހުންނަށް ފަރުވާ ދެމުން އަންނަނީ ފެސިލިޓީތަކުގައެވެ. 255 މީހުން ވަނީ މި ބަލީގައި މިހާތަނަށް ނިޔާވެފައެވެ. މި މަހުގެ ތެރޭގައި އެކަނި ވެސް މިހާތަނަށް 4 މީހުން ވަނީ ނިޔާވެފައެވެ. އެޗްޕީއޭއިން ބުނީ މާލެ ސަރަހައްދުގައި ސާމްޕަލް ޕޮޒިޓިވިޓީ ރޭޓް ހުރީ 3 އިންސައްތައިގައި ކަމަށެވެ.
