ޕުޓިން އިންޑިޔާއަށް ކުރައްވަމުން ގެންދަވާ ދަތުރުފުޅުގައި ވިޔަފާރި އާއި އަސްކަރީ އެއްބަސްވުންތަކެއްގައި ސޮއިކޮށްފި
6 ޑިސެމްބަރު 2021 | ހޯމަ 17:58ދެގައުމު ގުޅިގެން ހަތިޔާރު އުފައްދާ އަސްކަރީ އެހީތެރިކަމާއި ޓެކްނިކަލް އެހީތެރިކަން ދިނުން 2031 ވަނަ އަހަރާ ހަމައަށް ވަނީ ދިގު ދަންމާލާފައި
އިންޑިޔާގެ ބޮޑުވަޒީރު ނަރެންދްރަ މޯދީ އާއި ރަޝިޔާގެ ރައީސް ވްލަޑްމިއަރ ޕުޓިން
ރަޝިޔާގެ ރައީސް ވްލަޑްމިއަރ ޕުޓިން އިންޑިޔާއަށް މިހާރު ކުރައްވަމުން ގެންދަވާ ދަތުރުފުޅުގައި ވިޔަފާރި އާއި އަސްކަރީ ހަތިޔާރާއި ގުޅޭ އެއްބަސްވުންތަކެއްގައި ސޮއިކޮށްފިއެވެ.
ހޯމަ ދުވަހު ޕުޓިން ވަނީ އިންޑިޔާއަށް ވަޑައިގަންނަވާފައެވެ. މިދަތުރުފުޅުގައި ވެފައިވާ އެއްބަސްވުމުގެ ދަށުން އިންޑިޔާއިން ހަތިޔާރު އުފައްދަންވެސް ވަނީ އެއްބަސްވެފައެވެ. ޕުޓިންގެ މިދަތުރުފުޅުގައި ރަޝިޔާގެ ޑިފެންސް މިނިސްޓަރާއި ފޮރިން މިނިސްޓަރ ވެސް ބައިވެރިވެވަޑައިގަންނަވައެވެ. މިދަތުރުފުޅުގައި ދެން އެއްބަސްވެފައިވަނީ ދެގައުމު ގުޅިގެން ހަތިޔާރު އުފައްދާ އަސްކަރީ އެހީތެރިކަމާއި ޓެކްނިކަލް އެހީތެރިކަން ދިނުން 2031 ވަނަ އަހަރާ ހަމައަށް ދިގު ދަންމާލުމަށެވެ.
ރަޝިޔާގެ ރައީސް އިންޑިޔާއަށް މިވަޑައިގަތީ ރަޝިޔާ އާއި އެމެރިކާގެ ގުޅުން ގޯސްވެފައިވާ ދަނޑިވަޅެއްގައެވެ. އަނެއްކޮޅުން އިންޑިޔާ އާއި އެމެރިކާގެ ގުޅުން އަންނަނީ ރަނގަޅުވަމުންނެވެ.
ރަޝިޔާ އާއި އިންޑިޔާގެ ވާހަކަތަކަށްފަހު ދެގައުމު ގުޅިގެން ނެރުނު ބަޔާނުގައިވަނީ ދެގައުމުގެ އަސްކަރީ ގުޅުން އިތުރަށް ބަދަހިކުރުމަށް ވާހަކަދެކެވިފައިވާކަމަށެވެ. އަދި ދެގައުމު ގުޅިގެން ހަތިޔާރު އުފެއްދުމަށް އެއްބަސްވެފައިވާކަމަށް ބަޔާނުގައި ބުނެފައިވެއެވެ.
އިންޑިޔާގެ ފޮރިން ސެކެޓްރީ ހަރްޝް ވަރްދަން ވިދާޅުވީ ދެގައުމުން 28 އިންވެސްޓްމެންޓެއްގައި ސޮއިކޮށްފައިވާކަމަށެވެ. އޭގެތެރެގައި ބޯޓު ބަނުމާއި، ސްޓީލް އާ ގުޅުންހުރި ކަންކަމާއި ކޯލް އާއި ހަކަތަ އާއި ބެހޭ އެއްބަސްވުންތައް ހިމެނެއެވެ.
