މައްސަލަތައް ޖުލައި މަހަށް ނިންމުމަށް މިދަނީ މަސައްކަތް ކުރަމުން - ޗީފް އޮމްބަޑްސްޕާރސަން

ކުރިން ހުށަހެޅިފައިވާ މައްސަލަތަކުގެ އެއްބައި ފެބްރުއަރީއަށް އަދި މިހާރު ހުށަހެޅިފައިވާ މައްސަލަތައް ޖުލައި މަހަށް ނިންމުމަށް މަސައްކަތް ކުރަމުން އަންނަ ކަމަށް ޗީފް އޮމްބަޑްސްޕާރސަން އަބްދުއްސަލާމް އާރިފް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އަބްދުއްސަލާމް ވިދާޅުވީ، ހުށަހެޅިފައިވާ މައްސަލަތަކާ ގުޅޭ ގޮތުން މައުލޫމާތާއި ލިޔެ ކިޔުންތައް ހޯދުމަށް ކޮންމެވެސް ވަރެއްގެ ގޮންޖެހުންތައް ހުރި ނަމަވެސް ސަރުކާރުގެ އިދާރާތަކުން ހޯދަން ބޭނުންވާ މައުލޫމާތުތައް ހޯދުމުގައި އެއްބާރުލުން ލިބޭ ކަމަށެވެ. މައްސަލަތައް ނިންމުމަށް ބޭނުންވާ އިންސާނީ ވަސީލަތާއި ފަންނީ ވަސީލަތްތައް ހޯދަމުން އަންނަ ކަމަށާއި، އުންމީދަކީ އެ ވަސީލަތަތަކާއެކު ޖުލައި މަހަށް މަސައްކަތް ނިންމުން ކަމަށެވެ. ދުވަސްވީ ލިޔުންތައް ހޯދުން އެއީ ވަރަށް ބޮޑު ގޮންޖެހުމެއް ކަމަށާއި، އިދާރާތަކުން ލިޔެކިޔުންތައް ހޯދުމުގެ މަސައްކަތް ކުރަމުން އަންނަ ކަމަށެވެެ.

މިދާއިރާގައި ތަޖުރިބާ ލިބިފައި ތިބި މީހުން ނިސްބަތުން މަދު ކަމަށާއި، ދާއިރާއިން ތައުލީމު ހާސިލު ކުރާ ކުދިން ގިނަ ނަމަވެސް ތަޖުރިބާ ހުރި މީހުން ނުލިބުން އެއީ ވަރަށް ބޮޑު ގޮންޖެހުމެއް ކަމަށް އަބްދުއްސަލާމް ވިދާޅުވިއެވެ.

އިންތިގާލީ އިންސާފުގެ އޮމްބަޑްސްޕާރސަންގެ އޮފީހަށް ގިނަ މައްސަލަތަކެއް ހުށަހެޅިފައިވާއިރު، ބައެއް މައްސަލަތަކަކީ ހާދިސާ ހިނގި ތަނުން ނޫނީ ހަގީގަތް ނޭނގޭނެ މައްސަލަތަކެވެ. އެހެންކަމުން ހެކިވެރިންގެ ބަޔާންތައް ނެގުމަށް ހަމަޖެހިފައިވާ ކަމަށާއި، ބައެއް މައްސަލަތަކުގައި، ބަޔާން ނެގުމަށް ދާން ޖެހޭ ސަރަހައްދުތައްވެސް މިހާރު ކަނޑައެޅި އެ މަސައްކަތް ފެށުމަށް ތައްޔާރުވެފައިވާކަމަށް އަބްދުއްސަލާމް ވިދާޅުވިއެވެ.

އެ އޮފީހަށް އެންމެ ގިނައިން ހުށަހެޅިފައިވަނީ ގޯތިގެދޮރުގެ މައްސަލަތަކެވެ. އެކިއިރު ވަޒީފާ ގެއްލިފައިވާ ފަރާތްތަކުގެ މައްސަލަތަކާއި އޮފީސް އުވާލެވިގެން ހުށަހަޅާފައިވާ މައްސަލަތަކާއި ވަކި ފަރާތަކަށް ބަދަލު ދީފައި ހުރި މައްސަލަތައް ވެސް ވަނީ ހުށަހެޅިފައެވެ. އުނގެނުމުގެ ހައްގުގެ އުނިކަމާއި ގުޅިގެން 6 މައްސަލަ ހުށަހެޅިފައިވެއެވެ.

އިންތިގާލީ އިންސާފުގެ ގާނޫނަކީ، 1953 ޖަނަވަރީ 1 އިން ފެށިގެން 2018 ނޮވެންބަރު 17 އާ ދެމެދު ހިނގާދިޔަ މުއްދަތުގެ ތެރޭގައި ނިޒާމީ ސިފައެއްގައި ރޭވިގެން، ދައުލަތުގެ މުއައްސަސާއަކުން ނުވަތަ އެއިން ތަނެއްގެ އިސް ހިންގުންތެރިއަކު، ރައްޔިތުންގެ އިންސާނީ ހައްގުތަކާއި އަސާސީ މިނިވަންކަމާ ޚިލާފަށް ހިންގާފައިވާ އަމަލުތައް ބަލައި، ތަހުގީގުކޮށް، ހަގީގަތް ހާމަކޮށް، އެފަދަ ކަންކަމުގެ ސަބަބުން އަނިޔާ ލިބިފައިވާ ފަރާތްތަކަށް ގާނޫނުގެ ދަށުން ފޯރުކޮށްދޭ ޙައްލުތައް މެދުވެރިކޮށް އިންސާފު ހޯދައިދިނުމުގެ ނިޒާމެއް އެކަށައެޅުމުގެ ގާނޫނެވެ.