ސިޓީ އެއްވަނައަށް، ލިވަޕޫލަށް ދެވަނަ

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުތަކުން މޮޅުވެ ތާވަލުގެ އެއްވަނައަށް އެންމެ ފަހުގެ ޗެމްޕިއަން މެންޗެސްޓާ ސިޓީ ޖެހިލިއިރު، ތާވަލުގެ ދެވަނަ މަގާމަށް ލިވަޕޫލް ޖެހިލައިފިއެވެ.

ލީގުގައި ހޮނިހިރު ދުވަހުގެ ހަވީރު ކުޅުނު މެޗުން މީގެ ކުރިން ތާވަލުގެ އެއްވަނައިގައި އޮތް ޗެލްސީ ވަނީ ވެސްޓް ހޭމް ޔުނައިޓެޑް އަތުން 3-2 ގެ ނަތީޖާއަކުން ބަލިވެފައެވެ. އެއާއެކު ތާވަލުގެ ކުރިއަށް ސިޓީ ޖެހިލީ 3-1 ގެ ނަތީޖާއަކުން ވަޓްފޯޑް ބަލިކުރުމަށްފަހުއެވެ.

ވަޓްފޯޑުގެ ދަނޑުގައި ކުޅުނު މި މެޗު ފަށައިގެން ހަތަރުވަނަ މިނެޓުގައި ސިޓީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ރަހީމް ސްޓާލިންއެވެ. އަދި މެޗުގެ 31 ވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން ބެނާޑޯ ސިލްވާ ވަނީ ލަނޑެއް ޖަހައި، ސިޓީގެ ލީޑު ފުޅާކޮށްދީފައެވެ.

ދެން މި މެޗުގައި ސީޓީން ކާމިޔާބުކުރި ތިންވަނަ ލަނޑު މެޗުގެ 61 ވަނަ މިނެޓުގައި ޖަހައިދިނީ އެ ޓީމުގެ ދެވަނަ ލަނޑުވެސް ކާމިޔާބުކުރި ބެނާޑޯ ސިލްވާއެވެ. މި މެޗުގައި ވަޓްފޯޑުން ޖެހި ހަމައެކަނި ލަނޑު މެޗުގެ 74 ވަނަ މިނެޓުގައި އެ ޓީމަށް ކާމިޔާބުކޮށްދިނީ ކޫޗޯ ފެނާންޑޭޒެވެ.

މި މެޗުން މޮޅުވެ ތާވަލުގެ އެއްވަނައަށް ސިޓީ ޖެހިލިއިރު، ތާވަލުގެ ކުރިއަށް ލިވަޕޫލް ޖެހިލީ 1-0 ގެ ނަތީޖާއަކުން ވުލްވްސް ބަލިކުރުމަށްފަހުއެވެ.

ވުލްވްސްގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި ލިވަޕޫލުގެ ޑިއޯގޯ ޖޮޓާ އާއި މުހައްމަދު ސަލާހަށް ވަނީ ލީޑު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ. އަދި މެޗުގެ ދެވަނަ ހާފުގައި ޖޮޓާއަށް މުޅިން ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ގޯލުގެ ރޮނގުމަތިން ސަލާމަތްކުރީ ވުލްވްސްގެ ކެޕްޓަން ކޯނޯ ކޯޑީއެވެ.

މި މެޗުގައި ލިވަޕޫލުން ކާމިޔާބުކުރި ހަމައެކަނި ލަނޑު ފެނިގެންގޮސްފައިވަނީ މެޗުގެ އިތުރު ވަގުތުގައެވެ. އޭރިއާ ތެރެއިން ސަލާހު ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑިވޮކް އޮރީގީއެވެ.

މި ނަތީޖާތަކާއެކު ތާވަލުގެ އެއްވަނައަށް ސިޓީ ޖެހިލީ ކުޅުނު 15 މެޗުން ލިބުނު 35 ޕޮއިންޓާއެކުއެވެ. ދެވަނައިގައި އޮތް ލިވަޕޫލަށް 15 މެޗުން 34 ޕޮއިންޓް ލިބިފައިވާއިރު، ތާވަލުގެ ތިންވަނައިގައި ޗެލްސީ އޮތީ 15 މެޗުން 32 ޕޮއިންޓް ހޯދައިގެންނެވެ. އަދި ހަތަރުވަނައިގައި ވެސްޓް ހޭމް އޮތީ 15 މެޗުން 27 ޕޮއިންޓާއެކުއެވެ.