ބޭރު ފައިސާ ގަނެ ވިއްކުމުގެ ގަވައިދާ ޚިލާފަށް ކަޅު ބާޒާރުގައި ޑޮލަރު ވިއްކާ ދެމީހަކު ފުލުހުން ހައްޔަރުކޮށްފިއެވެ.
އެއީ ބަންގްލަދޭޝްއަށް ނިސްބަތްވާ ދެމީހުން ކަމަށްވާ މުހައްމަދު އިގުބާލް ހޮސައިންއާއި، ޝޮހެލް ނަމަކަށް ކިޔާ މީހެކެވެ. މި ދެމީހުން ހޯދުމުގެ މަސައްކަތް ފުލުހުން ކުރަމުންދިޔައީ އެމީހުންގެ ފޮޓޯ އާންމުކޮށްގެންނެވެ. އަދި އެ މީހުން ހޯދުމަށް އާންމުންގެ އެހީއަށްވެސް އެދިފައިވެއެވެ.
އެމީހުންގެ ފޮޓޯ އާންމުކޮށްގެން އެމީހުން ހޯދުމުގެ މަސައްކަތް ކުރަމުންދަނިކޮށް އެމީހުން ވަނީ އަމިއްލައަށް ފުލުހުންގެ އިދާރާއަށް ހާޒިރުވެފައެވެ. އަދި ފުލުހުން ވަނީ އެމީހުން ހައްޔަރުކޮށްފައެވެ.
މި ދެމީހުން ކަޅު ބާޒާރުގައި ޑޮލަރުގެ މުއާމަލާތްތައް ހިންގުމުގެ އިތުރުން ސައްހަ ނޫން ލިޔެކިިޔުންތައް ބޭނުންކޮށްގެން ގިނަ އަދަދެއްގެ ފައިސާ ރާއްޖެއިން ބޭރަށް ފޮނުވާކަމަށް ފުލުހުން ތުހުމަތުކުރެއެވެ.
ކަޅު ބާޒާރުގައި ޑޮލަރު ވިއްކުމުގައި ހަރަކާތްތެރިވާ މީހުން ކޮވިޑް-19އާއި ގުޅިގެން ވަނީ ވަރަށް ބޮޑުތަން އިތުރުވެފައެވެ. މިކަމުގައި ގިނައިން ހަރަކާތްތެރިވަމުންދަނީ ބިދޭސީންނެވެ. މިކަމަށް ހައްލު ގެނައުމަށް ސަރުކާރުން މަސައްކަތްތަކެއް ކުރަމުންދާއިރު، އަދިވެސް މި މަސައްކަތްތަކުން އެދެވޭ ނަތީޖާއެއް ފެންނަމުންނެއް ނުދެއެވެ.
