އިދިކޮޅު ޖަލްސާއަށް ދިޔުމުން މުވައްޒަފުން ކަނޑާލާނެ ކަމަށް ނުބުނަން، ބަސްދަތުރު ވެސް ނުހުއްޓުވަން: އެމްޓީސީސީގެ ސީއީއޯ

އިދިކޮޅު ޖަލްސާއަށް މީހުން ދިޔަ ނުދިނުމަށް އެމްޓީސީސީގެ ޝެޑިއުލް ބަސް ދަތުރުތައް ހުއްޓާލި ކަމަށް ސޯޝަލް މީޑިއާގައި ދެކެވޭ ވާހަަކަތައް އެކުންފުނީގެ ސީއީއޯ އާދަމް އާޒިމް ދޮގުކުރައްވައިފިއެވެ.

އިދިކޮޅު ކޯލިޝަނުން ބޭއްވި ޖަލްސާއަށް މީހުން ދިޔުމަށް ހުރަސް އެޅުމުގެ ގޮތުން ބަސް ދަތުރުތައް ހުއްޓާލި ކަމަށް މީހަކު ޓުވީޓު ކުރުމާއި ގުޅިގެން އެކަމަށް ރައްދު ދެއްވާ އާޒިމް ވިދާޅުވީ އަނިޔާވެރި، ރައީސް ޔާމީނަށް ޝައުގުވެރިކަމެއް ނެތް ކަމަށެވެ.

ހުކުރު ދުވަހުގެ ރޭގައި ވެސް ހުރިހާ ޝެޑިއުލް ދަތުރުތައް ހުއްޓުމެއް ނެތި ކުރިއަށް ގެންދިޔަ ކަމަށެވެ. އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަކީ ހުރިހާ ރައްޔިތުންގެ ރައީސެއްކަން ފާހަގަކުރައްވާ އާޒިމް ވިދާޅުވީ ހުރިހާ ރައްޔިތުންނަށް އޯގާތެރިކޮށް ޚިދުމަތް ދިނުމަށް އެމްޓީސީސީއަށް އެމަނިކުފާނު ނަސޭހަތްތެރިވެވަޑައިގެންފައިވާ ކަމަށެވެ.

އެމީހާގެ ޓުވީޓަށް ކޮމެންޓް ކުރި އެހެން މީހެއްގެ ވާހަކަތަކަށް ވެސް އާޒިމް ވަނީ ރައްދު ދެއްވާފައެވެ. އެގޮތުން އެމީހާ ވަނީ ޖަލްސާއަށް އެމްޓީސީސީގެ މުވައްޒަފުން ބޭނުންވެފައި ތިބި ނަމަވެސް ޖަލްސާއަށް ގޮސްފިނަމަ ކަނޑާލާނެ ކަމުގެ އިންޒާރު ދީފައިވާ ކަމަށެވެ.

މިކަމަށް ރައްދު ދެއްވާ އާޒިމް ވިދާޅުވީ އެއްވެސް މުވައްޒަފަކަށް އެގޮތަށް އަންގާފައި ނުވާނެ ކަމަށެވެ. އަދާކުރާ ވަޒީފާގެ ޒިންމާއަށް ބުރޫ ނާރާގޮތަށް އެމީހެއްގެ ފިކުރެއްގައި ކުރިއަށް ދެވޭނެ ކަމަށެވެ. އަދި މިއީ އަނިޔާވެރި، މަކަރުވެރި ރައީސް ޔާމީންގެ ވެރިކަން ނޫން ކަމަށާއި ކޯޓުތަަކަށް އަތް ބާނައިގެން އެންމެން ޖަލަށް ލާ ބިރު ދެއްކުމަށް ވެސް މިއީ އެ ވެރިކަން ނޫން ކަމަށް އާޒިމް ވިދާޅުވިއެވެ. މިހާރު މިނިވަން ކަމުގެ އިހުސާސް ކުރެވޭ ކަމަށް އާޒިމް ވިދާޅުވިއެވެ.