ކޮވިޑް-19ން ރައްކާތެރިވުމަށް ޖަހާ ވެކްސިންގެ ސަބަބުން އެއިޑްސް ޖެހުމަށް މަގުފަހިވާ ކަމަށް ބްރެޒިލްގެ ރައީސް ޖެއިރް ބޮޮލްސޮނާރޯ ވިދާޅުވި މައްސަލަ ތަހުގީގު ކުރުމަށް ބްރެޒިލްގެ ސުޕްރީމް ކޯޓުން އަމުރެއް ނެރެފިއެވެ.

ސޯޝަލް މީޑިއާގެ ލައިވް ބްރޯޑްކާސްޓެއްގައި ވާހަކަދައްކަމުން ޖެއިރް ވިދާޅުވީ ކޮވިޑުން ރައްކާތެރިވުމަށް ޖަހާ ވެކްސިންގެ ސަބަބުން ހީކުރި މިންވަރާ ޚިލާފަށް އަވަހަށް އެއިޑްސް ފެތުރެމުންދާ ކަމަށެވެ. އޭނާގެ މި ވާހަކަތަކާއެކު ފޭސްބުކް އަދި ޔޫޓިއުބުން ވަނީ އޭނާ ވަގުތީގޮތުން ސަސްޕެންޑު ކޮށްފައެވެ.

މި މައްސަލަ ބެލުމަށް ބްރެޒިލްގެ ސުޕްރީމް ކޯޓުގެ ފަނޑިޔާރު އަލެކްސަންޑްރާ ޑި މޮރާއިސް އަމުރު ނެރެފައިވަނީ ސެނެޓް އިންވެސްޓިގޭޝަން ކޮމިޓީއެއްކަމަށްވާ ސީޕީއައި އިން ކުރި ދައުވާއަކާ ގުޅިގެންނެވެ. ސީޕީއައި އިން ވަނީ ކޮވިޑްގެ ހާލަތުގައި ބޮލްސޮނާރޯ ކަންތައްކުރެއްވި ގޮތުގެ މައްޗަށް ނުވަ ދައުވާއެއް އުފުލާފައެވެ. މީގެ ތެރޭގައި އިންސާނިއްޔަތާ ދެކޮޅަށް ބޮލްސޮނާރޯ ކޮށްފައިވާ ކަންތައްތަކުގެ ދައުވާވެސް ހިމެނެއެވެ.

އެޗްއައިވީ އަދި އެއިޑްސްއާ ގުޅޭގޮތުން ހިންގި ޖޮއިންޓް ޔުނައިޓެޑް ނޭޝަންސް ޕްރޮގްރާމުން ބުނާ ގޮތުގައި މި ބަލިތައް ޖެހިފައިވާ މީހުންވެސް، ހުއްދަ ލިބިފައިވާ ކޮވިޑް ވެކްސިން ޖެހުމުން އިތުރު ރައްކާތެރިކަމެއް ލިބިގެންދާނެއެވެ.

ސީޕީއައި އިން ވަނީ މިދިޔަ އޮކްޓޫބަރ މަހު މި މައްސަލައާ ގުޅެގޮތުން 1،300 ސަފްހާގެ ރިޕޯޓެއް ބްރެޒިލްގެ ޕްރޮސެކިއުޓާ ޖެނެރަލްއަށް ފޮނުވާފައެވެ. ނަމަވެސް ޕްރޮސެކިއުޓަރ ޖެނެރަލްއަކީ ބޮލްސޮނާރޯ އައްޔަނުކޮށްފައިވާ ފަރާތެއް ކަމުން މި މައްސަލައަށް އެކަށީގެންވާ ފިޔަވަޅެއް އެޅޭނެކަމަށް ގިނަ ބަޔަކު ގަބޫލެއް ނުކުރެއެވެ.