13 އަހަރުގެ ކުއްޖާގެ މަރު: ދެމީހުންގެ ބަންދުގެ މުއްދަތު ދަމަހައްޓައިފި

ހުޅުމާލެ ދެވަނަ ފިޔަވަހީގައި މަރާލާފައި މޫދަށް އެއްލާލާފައިފާ 13 އަހަރުގެ ފިރިހެން ކުއްޖާގެ މައްސަލަައިގައި ދައުވާ އުފުލާފައިވާ 2 މީހުންގެ ބަންދުގެ މުއްދަތު ކްރިމިނަލް ކޯޓުން ދަމަހައްޓައިފިއެވެ.

މިމައްސަލާގައި ދަޢުވާކޮށްފައިވަނީ ނ.ލަންދޫ، ބަގީޗާގޭ އިބްރާހިމް ޒިހާނާއި އުމުރުން 17 އަހަރުގެ ފިރިހެން ކުއްޖެއްގެ މައްޗަށެވެ. މި މައްސަލައިގެ ޝަރީއަތް ކުރިއަށްގެންދަން ނިންމާފައިވަނީ ސިއްރުކޮށްގެންނެވެ.

މިމައްސަލައިގައި ދައުވާ އުފުލާފައިވާ އުމުރުން 17 އަހަރުގެ ކުޑަކުއްޖާ މިވަގުތު ހުރީ ގޭބަންދުގައެވެ. ކުޑަކުދިން ބައިތިއްބާ ޖަލުތަކުގެ ހާލަތު ރަނގަޅުނޫންކަމަށް ހިއުމަންރައިޓްސް ކޮމިޝަނުން ފާހަގަކުރައްވާފައިވާތީ، ކޯޓުންވަނީ އޭނާ ގޭބަންދުގައި ބަހައްޓަން ކުރިން ކުރި އަމަރު ދަމަހައްޓާފައެވެ.

ޝަރީއަތް ނިމެންދެން ޒިހާން ބަންދުގައި ބެހެއްޓުމަށް ކުރި އަމުރުވެސް ކޯޓުންވަނީ ދަމަހައްޓާފައެެވެ.

ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލާފައިވާއިރު މި ދައުވާތައް ސާބިތު ވެއްޖެނަމަ 100 ވަރަކަށް އަހަރުގެ ޖަލު ހުކުމެއް އަންނާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވަނީ ވިދާޅުވެފައެވެ. ޕީޖީ ވިދާޅުވެފައިވަނީ، ދައުވާ ސަބިތުކުރެވޭ ވަރަށް ހެކި އެބަހުރި ކަމަށެވެ.

ޒިހާންގެ މައްޗަށް އުފުލާފައިވާ ދައުވާތަކުގެ ތެރޭގައި:

ގަސްތުގައި މީހަކު މެރުން

މަސްތުވާތަކެތި ދީގެން ޖިންސީ އަމަލު ހިންގަން އުޅުން

ގްރޫމްކުރުން

މައްޔިތާގެ ބޭނުން ނަހަމަގޮތުގައި ހިފުން

ހުއްދަ ނޫން ގޮތެއްގައި ހިފެހެއްޓުން

ޖިނާއީ ކުށެއްގައި ކުޑަކުއްޖަކު ބޭނުންކުރުން

ޖިންސީ ނިޔަތެއް އޮވެގެން އަތްލުމުގެ ފަސް ދައުވާ

ކުޑަކުދިންނަށް ޖިންސީ ގޯނާކުރުމުގެ އިތުރު ދައުވާތަކެއް

ކުޑަކުއްޖާގެ މައްޗަށް އުފުލި ދައުވާތަކުގެ ތެރޭގައި:

ގަސްތުގައި މީހަކު މެރުން

ހުއްދަ ނޫން ގޮތެއްގައި ހިފެހެއްޓުން

މައްޔިތާގެ ބޭނުން ނަހަމަ ގޮތެއްގައި ހިފުން

ކުޑަ ކުއްޖާ މަރާލުމަށްފަހު ފޮއްޓަކަށް ލާފައި އޮއްވައި ފެނުނީ ހުޅުމާލޭ ދެވަނަ ފިޔަވަހީގެ މޫދުންނެވެ. އެ ކުއްޖާގެ ހަށިގަނޑު ފެނިފައިވަނީ މިދިޔަ ޖޫން މަހުގެ 21 ވަނަ ދުވަހުގެރޭ ދަންވަރުގެ ވަގުތެއްގައެވެ. މި މައްސަލައިގެ ދައުވާ އުފުލާފައިވަނީ އޮގަސްޓު މަހުގ 19ވަނަ ދުވަހުއެވެ.

13 އަހަރުގެ ފިރިހެން ކުއްޖާގެ ޕޯސްޓްމޯޓަމް ހަދަން ފޮނުވީ ޖުލައި 5 ވަނަ ދުވަހުއެވެ. ޕޯސްޓްމޯޓަމް ހެދުމަށްފަހު މާލެ ގެނެސް ވަޅުލާފައިވަނީ ޖުލައި 12 ވަނަ ދުވަހުއެވެ.