އިންޑިޔާއިން ވެސް އޮމިކްރޯން ވޭރިއެންޓް ފެނިއްޖެ

ކޮވިޑް-19ގެ ނުރައްކާތެރި ވޭރިއެންޓެއް ކަމަށްވާ އޮމިކްރޯން އިންޑިޔާއިން ވެސް ފެނިއްޖެއެވެ.

ބޭރުގެ މީޑިއާތަކުގައި ރިޕޯޓު ކޮށްފައިވާ ގޮތުގައި އިންޑިޔާއިން ފެނިފައިވަނީ ދެ ކޭހެއެވެ. އެއީ އިންޑިޔާގެ ކަރުނާޓަކާގައި ދަތުރުކޮށްފައި އައި ދެމީހުންނެވެ.

އިންޑިޔާގެ ހެލްތު މިނިސްޓްރީން ބުނީ އޮމިކްރޯން ޖެހިފައިވަނީ 46 އަހަރުގެ ފިރިހެނަކަށާއި 66 އަހަރުގެ ފިރިހެނަކަށެވެ. ނަމަވެސް އެއީ ކޮން ގައުމެއްގެ ބައެއް ކަމެއް މިނިސްޓްރީން ހާމަކޮށްފައެއްނުވެއެވެ. އަދި މި ދެ ކޭހާ ގުޅިގެން އިތުރަށް ބަލަން ޖެހޭ ކަންކަން ބަލަމުންދާ ކަމަށް މިނިސްޓްރީން ބުނެފައިވެއެވެ.

އޮމިކްރޯން ވޭރިއަންޓް އެކިއެކި ގައުމުންތަކުން ފެންނަމުންދާއިރު، މި ވޭރިއެންޓްގެ ނުރައްކާ ވަރަށް ބޮޑު ކަމަށާއި، ގައުމުތަކުން އެކަމަށް ތައްޔާރުވުމަށް ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ)އިން އެ ޖަމްއިއްޔާގެ މެމްބަރު ހުރިހާ ގައުމަކަށް ގޮވާލާފައިވެއެވެ.

އޮމިކްރޯން ވޭރިއެންޓުގެ 30 މިއުޓޭޝަންސް މިހާތަނަށް ފެނިފައިވާއިރު، މިވަގުތަށް ހޯދިފައިވާ މައުލޫމާތުތަކުން އެނގޭގޮތުގައި މި ވޭރިއެންޓްގެ ބައެއް މިއުޓޭޝަންސްތަކަކީ ކޮވިޑްބަލީގެ ހާލަތު އިތުރަށް ގޯސްކޮށްލާނެ މިއުޓޭޝަންސްތަކެއް ކަމަށް ބެލެވިފައިވެއެވެ.

މި ވޭރިއެންޓް ފެތުރުނަ ނުދިނުމަށް ގައުމުތަކުން ގެންދަނީ ދަތުރުފަތުރުކުރުމުގެ ހަރުކަށި ފިޔަވަޅުތަކެއް އަޅަމުންނެވެ.