ކައުންސިލްތަކުގެ މިލްކުވެރިކަމުގެ ދަށުގައިވާ ބިމުން ވިޔަފާރި ކުރެވޭ ގޮތަށް ބިމާއި ބެހޭ ގާނޫނަށް އިސްލާހު ގެނެސްފި
ބިން ދޭންވާނީ އެބިން އޮތް ރަށެއް ނުވަތަ ސިޓީއަކަށް ކަމާބެހޭ ގާނޫނުގައިވާ ގޮތުގެމަތިން ކަނޑައެޅިފައިވާ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިން
ހއ.އިހަވަންދޫ
އިގްތިޞާދީ ބޭނުމަށް އެކަށައަޅައި ކަމާބެހޭ މިނިސްޓްރީތަކާ ނުވަތަ ދައުލަތުގެ އިދާރާތަކާ ހަވާލުކުރާ ބިމުން ނުވަތަ ކައުންސިލުތަކުގެ މިލްކުވެރިކަމުގެ ދަށުގައިވާ ބިމުން, ހަދާ ގަވާއިދުތަކާ އެއްގޮތްވާ ގޮތުގެމަތިން ވިޔަފާރި އުސޫލުން މުއާމަލާތްކުރެވޭ ގޮތަށް ދިވެހިރާއްޖޭގެ ބިމާ ބެހޭ ގާނޫނަށް އިސްލާހު ގެނެސްފިއެވެ.
ބިމާ ބެހޭ ގާނޫނަށް އިސްލާހު ގެނައުމަށް ހުށަހެޅުއްވީ ސަރުކާރުގެ ފަރާތުން މަތިވެރި ދާއިރާގެ މެމްބަރ ހަސަން ޒަރީރެވެ. މި ބިލަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި ފުށުއަރާ ގާނޫނުތައް އިސްލާހު ކުރުމަށް ދީފައިވާ 6 މަސްދުވަސްތެރޭގައި އެއިސްލާހުތައް ގެނައުމަށް ހުށަހަޅާފައިވާ ބިލެކެވެ. މިބިލް ދިރާސާކޮށްފައިވަނީ ލާމަރުކަޒީ ކޮމިޓީންނެވެ.
މިއިސްލާހުގެ ބިލްގެ ކޮމިޓީ ރިޕޯޓް މަޖިލީހުން ފާސްކޮށްފައިވާއިރު ބިލުގައި ބުނެފައިވަނީ އެކި ބޭނުންތަކަށާއި ކަންކަމަށް އެކަށަަ އަޅާ ބިންތައް ކަމާބެހޭ މިނިސްޓްރީ ތަކާއި ދައުލަތުގެ އިދާރާތަކާއި ހަވާލުކުރާނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އެއްގޮތްވާ ގޮތުގެ މަތިންނެވެ. އަދި މިނިސްޓްރީ ތަކާއި ދައުލަތުގެ އިދާރާތަކާ ބިންތައް ހަވާލުކުރުމާއި ވަކިކުރުމާއި ގުޅޭ އުސޫލުތައް މިގާނޫނުގެ ދަށުން ހަދާ ގަވާއިދުގައި ބަޔާންކުރަންވާނެއެވެ. އަދި މިގަވާއިދު ހަދަން ވާނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާ އެއްގޮތްވާ ގޮތުގެ މަތިންނެވެ.
މީގެއިތުރުން ބިމާބެހޭ މުއާމަލާތްކުރާނެ ގޮތް ކަމަށް ބުނެފައިވަނީ ބިން ހަވާލުކުރެވޭ މިނިސްޓްރީތަކާއި ދައުލަތުގެ އިދާރާތަކުން ބިން ދޫކޮށް ކުއްޔަށްދީ ބިމާބެހޭ އެހެނިހެން މުއާމަލާތްކުރަންވާނީ މިގާނޫނާއި އެކި ބޭނުންތަކަށާއި ކަންކަމަށް އެކަށައަޅާ ބިންބިމާ ބެހޭގޮތުން އަމަލުކުރެވޭ ގާނޫނުތަކާއި ގަވާއިދުތަކުގައި ބަޔާންކޮށްފައިވާ ގޮތުގެ މަތިންނެވެ.
އަދި އެކި މިނިސްޓްރީތަކާއި ދައުލަތުގެ އިދާރާތަކާ ހަވާލުކުރެވޭ ބިންތައް ބޭނުންކުރަންވާނީ އަދި އެކި ފަރާތްތަކަށް ދޫކުރަންވާނީ ނުވަތަ ކުއްޔަށް ދޭންވާނީ އެބިން އޮތް ރަށެއް ނުވަތަ ސިޓީއަކަށް ކަމާބެހޭ ގާނޫނުގައިވާ ގޮތުގެމަތިން ކަނޑައެޅިފައިވާ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިން އެ ބިމެއް އެކަށައަޅާފައިވާ ބޭނުމަކަށް ނުވަތަ ކަމަކަށެވެ.
ކައުންސިލްތަކުގެ މިލްކުވެރިކަމުގެ ދަށުގައިވާ ބިންތައް ބޭނުންކުރަންވާނީ އެކިއެކި ފަރާތްތަކަށް ދޫކުރަންވާނީ ނުވަތަ ކުއްޔަށްދޭންވާނީ އެބިން އޮތް ރަށެއް ނުވަތަ ސިޓީއަކަށް ކަމާބެހޭ ގާނޫނުގައިވާ ގޮތުގެމަތިން ކަނޑައެޅިފައިވާ ލޭންޑް ޔޫސް ޕްލޭނާ އެއްގޮތްވާ ގޮތުގެމަތިން އެ ބިމެއް އެކަށައަޅާފައިވާ ބޭނުމަކަށް ނުވަތަ ކަމަކަށެވެ.
މީގެއިތުރުން އިގްތިޞާދީ ބޭނުމަކަށް އެކަށައަޅައި ކަމާބެހޭ މިނިސްޓްރީތަކާއި ނުވަތަ ދައުލަތުގެ އިދާރާތަކާއި ހަވާލުކުރާ ބިމުން ނުވަތަ ކައުންސިލްތަކުގެ މިލްކުވެރިކަމުގެ ދަށުގައިވާ ބިމުން ގާނޫނުގެ ދަށުން ހަދާ ގަވާއިދުތަކާއި އެއްގޮތްވާ ގޮތުގެމަތިން ވިޔަފާރި އުސޫލުން މުއާމަލާތްކުރެވޭއިރު ކަމާބެހޭ މިނިސްޓްރީތަކާއި ނުވަތަ ދައުލަތުގެ އިދާރާތަކާއި ހަވާލުކުރެވޭ ބިން ނުވަތަ ކައުންސިލްގެ މިލްކުވެރިކަމުގެ ދަށުގައިވާ ބިން އެ ފަރާތްތަކުން ގާނޫނުއަސާސީ އާއި މިގާނޫނާއި ޚިލާފުނުވާ ގޮތުގެމަތިން ދެ ވަނަ ފަރާތަކަށް ވިއްކައި ނުވަތަ ކުއްޔަށް ދެވިދާނެކަމަށްވެސް ފާސްކުރި ބިލްގައި ބުނެފައިވެއެވެ.
އެއްވެސް މީހަކު ނުވަތަ ބަޔަކު އެމީހެއްގެ ނުވަތަ އެބައެއްގެ އަމިއްލަ ބިމެއްގައި ނުވަތަ ބަންޑާރަ ގޯއްޗެއްގައި ހަދާފައިވާ އިމާރާތް އެއްމެދު އިމާރާތަކަށް ބަދަލުކުރުމަށް ބޭނުންނަމަ މިގާނޫނުގެ ދަށުން ހަދާ ގަވާއިދުގައި ބަޔާންކުރާ ގޮތުގެމަތިން އެ އިމާރާތެއް އެއްމެދު އިމާރާތެއްގެ ގޮތުގައި ރަޖިސްޓްކުރަންވާނެކަމަށްވެސް ފާސްކުރި ބިލްގައި ބުނެފައިވެއެވެ.
މިގާނޫނަށް ގެނައި އިސްލާހު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 54 މެމްބަރުންގެ އިއްތިފާގުންނެވެ.
