2023 ވަނަ އަހަރުގެ ކުރިން އިއާދަކުރަނިވި ހަކަތަ ބޭނުންކުރާ ނިސްބަތް 20 އިންސައްތައަށް މަތިކުރުމަށް ހިފާފައިވާ އަމާޒަށް ވާސިލްވެވޭނެ ކަމުގެ ވަރަށް ބޮޑު ޔަގީންކަމެއް އެބައޮތް ކަމަށް މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީގެ ޑިރެކްޓަރ ޖެނެރަލް އެނަރޖީ އިންޖީނިއަރިން އަހުމަދު އަލީ ވިދާޅުވެއްޖެއެވެ.

ރާއްޖެޓީވިގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އަހުމަދު އަލީ ވިދާޅުވީ 2018 ވަނަ އަހަރު މި ސަރުކާރުން މި މަސައްކަތްތަކާ ހަވާލުވީއިރު، އިއާދަކުރަނިވި ހަކަތަ ބޭނުންކޮށްގެން އުފައްދަމުންދިޔައީ އެންމެ 16.8 މެގަވޮޓުގެ ކަރަންޓު ކަމަށެވެ. އެހެންނަމަވެސް ފާއިތުވި 3 އަހަރުތެރޭ ސަރުކާރުންނާއި، އަމިއްލަ ފަރާތްތަކާއި، ކަރަންޓު އުފައްދާ އެހެނިހެން ކުންފުނިތަކާއި، ރިސޯޓުތަކުން ކުރި މަސައްކަތުން މި އަދަދު 36.5 މެގަވޮޓަށް އިތުރުކުރެވިފައިވާކަމަށް އޭނާ ވިދާޅުވިއެވެ. ވޭތުވެދިޔަ 3 އަހަރު އެކަނި 45 އިންސައްތަ އިތުރުކުރެވިފައިވާކަމަށް އަހުމަދު އަލީ ވިދާޅުވިއެވެ.

މިހާރު ބިޑަށް ހުޅުވާލައިގެން އިވެލުއޭޓްކުރުމުގެ މަރުހަލާގައި 11 މެގަވޮޓެއް އެބައޮތް ކަމަށް އޭނާ ވިދާޅުވިއެވެ. އެއީ ކުޅުދުއްފުށި ސިޓީ، ބ. އޭދަފުށި، ޅ. ހިންނަވަރު، އައްޑޫ ސިޓީ، ފުވައްމުލައް ސިޓީ، ގދ. ތިނަދޫގައި ގާއިމްކުރާ ސޯލަރ ހަކަތަ ކަމަށް ވިދާޅުވިއެވެ. މީގެ އިތުރުން އައްޑޫ ސިޓީގައި އިތުރު 10 މެގަވޮޓުގެ ފްލޯޓިން ސޯލަރ ގާއިމްކުރުމަށްވެސް އިއުލާނުކޮށްފައިވާނެ ކަމަށް އަހުމަދު އަލީ ވިދާޅުވިއެވެ.

ލ. މުންޑޫ ފިޔަވައި އެ އަތޮޅުގެ އެހެން ހުރިހާ ރަށަކާއި، ޅ. ނައިފަރާއި. ދ. ކުޑަހުވަދޫ ހިމެނޭގޮތަށް ހޮވާލެވިފައިވާ ޖުމްލަ 14 ރަށެއްގައި އިތުރު 11 މެގަވޮޓުގެ ސޯލަރ ޕީވީ ހަރުކުރެވިގެންދާނެ ކަމަށް އަހުމަދު އަލީ ވިދާޅުވިއެވެ. އިތުރު 20 ރަށެއްގެ ބެޓްރީ އަދި ގްރިޑް އަޕްގްރޭޑްކުރުމުގެ މަސައްކަތާއި، ޕަބްލިކް ސެކްޓަރ އިންވެސްޓްމެންޓް ޕްރޮގްރާމުގެ ދަށުން ކ. އއ. އދ. ވ. މ. ފ. ދ. މި އަތޮޅުތަކުގައި ގާތްގަނޑަކަށް 9 މެގަވޮޓުގެ ކަރަންޓު އުފެއްދިގެންދާނެ ކަމަށް އޭނާ ވިދާޅުވިއެވެ.

އަހުމަދު އަލީ ވިދާޅުވީ މިހާރު ކުރަން ނިންމާފައިވާ މި މަސައްކަތްތަކާއެކު 50 މެގަވޮޓު އިތުރުވެގެންދާނެ ކަމަށެވެ. އެހެންކަމުން 2023 ވަނަ އަހަރުގެ ކުރިން އިއާދަކުރަނިވި ހަކަތަ ބޭނުންކުރާ ނިސްބަތް 20 އިންސައްތައަށް މަތިކުރުމަށް ހިފާފައިވާ އަމާޒަށް ވާސިލްވެވި، މިއަށްވުރެ އިތުރަށްވެސް ހާސިލްކުރެވޭނެ ކަމަށް އޭނާ ވިދާޅުވިއެވެ.

މިހާރު މަސައްކަތްކުރަމުންދަނީ 2030 ވަނަ އަހަރުގެ ކުރިން ރާއްޖެއަކީ ނެޓް ޒީރޯ ގައުމަކަށް ހެދުމަށް ކަނޑައަޅާފައިވާ އަމާޒަށް ވާސިލްވުމަށް ކަމަށާއި، މި އަމާޒަށް ވާސިލްވުމަށް ބޭރުގެ ފަރާތްތަކާ ގުޅިގެން އިތުރު މަސައްކަތްތައްވެސް ކުރުމަށް ނިންމާފައިވާކަމަށް އަހުމަދު އަލީ ވިދާޅުވިއެވެ.

ރާއްޖޭގެ ހުރިހާ އަތޮޅެއްގައިވެސް އިއާދަކުރަނިވި ހަކަތަ ބޭނުންކޮށްގެން ކަރަންޓު އުފެއްދުމުގެ ނިޒާމު ގާއިމްކުރުމަށް މިނިސްޓްރީން ވަނީ ޚާއްސަ ޕްރޮގްރާމެއް ފަށާފައެވެ. މިހާރުވެސް ބައެއް ސަރަހައްދުތަކުގައި މި ނިޒާމު ގާއިމްކޮށް ބޭނުންކުރަމުންދާއިރު، ބައެއް ރަށްރަށުގައި މި ނިޒާމު ގާއިމްކުރުމަށް ވާންޖެހޭ ތައްޔާރީތައް ދަނީ ވަމުންނެވެ. މިގޮތުން ބައެއް ރަށްރަށުގެ ބިޑިން މަރުހަލާ އަންނަ ޑިސެމްބަރު މަހުގެ ތެރޭގައި ނިމޭނެ ކަމަށް އަހުމަދު އަލީ ވިދާޅުވިއެވެ.