އުދައްޔުގެ މަރުގެ މައްސަލައިގައި ހިމެނޭ ކުޑަކުއްޖާ ގޭބަންދަށް ބަދަލުކުރި އަމުރު ހައިކޯޓުން ބާތިލްކޮށްފި
18 އަހަރުނުވާ ކުއްޖާގެ މައްޗަށް ދެ ދައުވާއެއް ކުރުމަށް ޖުވެނައިލް ކޯޓަށް ހުށައެޅި
ހައި ކޯޓު- ހައިކޯޓުން ވަނީ ޖުވެނައިލް ކޯޓުގެ ނިންމުން ބާތިލުކޮށްފައި
ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ކުޑަކުއްޖާ ގޭބަންދަށް ބަދަލު ކުރުމަށް ޖުވެނައިލް ކޯޓުން ނިންމި ނިންމުން ހައިކޯޓުން ބާތިލު ކޮށްފިއެވެ.
މި މައްސަލައިގައި ހިމެނޭ 18 އަހަރުނުވާ ކުއްޖާގެ މައްޗަށް ދެ ދައުވާއެއް ކުރުމަށް ޖުވެނައިލް ކޯޓަށް ހުށައެޅިއެވެ. އެއީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އާއި، ހަމަ އެ ގާނޫނުގެ ދަށުން މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
ޖުވެނައިލް ކޯޓުން އޭނާ ގޭބަންދަށް ބަދަލު ކޮށްފައިވަނީ ކުޑަކުދިން ބަންދު ކުރުމަށް ޤާނޫނުގައި ލާޒިމުކުރާ، އަދި ހުއްދަކުރާ މިންވަރުގެ އެކަށީގެންވާ ޖަލެއް މި ވަގުތު ރާއްޖޭގައި ނެތްކަމަށް ހިއުމަން ރައިޓްސް ކޮމިޝަނުން އެކުލަވާލާފައިވާ ރިޕޯޓަކަށް ރިއާޔަތްކޮށެވެ. އެގޮތުން ބައެއް މައްސަލަތަކުގައި ހިމެނޭ ކުޑަކުދިން ޖަލު ބަންދުން ދޫކޮށްލާފައިވާއިރު، އައްސޭރި ޖަލުގައި އެއްވެސް މައްސަލައަކާ ގުޅިގެން ކުޑަކުދިން ބަންދު ނުކުރުމަށް އެޗްއާރްސީއެމް އިން ވަނީ ކަރެކްޝަންސްއަށްވެސް އަންގާފައެވެ.
އޭނާ ޝަރުތުތަކާއެކު ގޭބަންދަށް ދޫކޮށްލީ ކުޑަކުދިންގެ ޖިނާއީ މައްސަލަތައް ބެލުމުގައި ޖުވެނައިލް ކޯޓުން އަމަލު ކުރާނެގޮތުގެ ގަވާއިދުގެ 65 ވަނަ މާއްދާގެ (ކ) އަށް ރިއާޔަތްކޮށް ގާޒީއަށް ލިބިދީފައިވާ އިހުތިޔާރުގެ ދަށުންނެވެ.
އެހެންނަމަވެސް، މި މައްސަލައިގައި ބުރާސްފަތި ދުވަހު ހައިކޯޓުން ނިންމި ނިންމުމުގައި ބުނެފައިވަނީ، ހިއުމަން ރައިޓްސް ކޮމިޝަނުގެ ރިޕޯޓުގައި އެ ކޮމިޝަނުން ފާހަގަކޮށްފައިވާ ކަންކަމަކީ 30 ދުވަހުގެ ތެރޭގައި އެކަންކަން ރަނގަޅުކުރުމަށްފަހު، މޯލްޑިވްސް ކަރެކްޝަނަލް ސަރވިސް އާއި، ހިއުމަން ރައިޓްސް ކޮމިޝަނާ ދެމެދު ވާހަކަ ދެއްކިގެން ޙައްލު ނުކުރެވޭނެ ކަންތައްތަކެއްކަމަށް ޝަރީއަތަށް ޤަބޫލު ނުކުރެވޭ ކަމަށެވެ. އަދި ކުޑަކުދިންގެ ޢަދުލުގެ ޤާނޫނުގައި ބަޔާންކޮށްފައިވާ މަރުކަޒުތައް ގާއިމު ކުރަންޖެހެނީ 20 މެއި 2022 ގެ ކުރިން ކަމަށްވާއިރު، އަދި އެ މުއްދަތު ފާއިތުނުވާކަން ވެސް ޝަރީއަތުން ވަނީ ފާހަގަ ކޮށްފައެވެ.
އޭގެ އިތުރުން އޭނާގެ މައްޗަށް ތުހުމަތު ކުރެވިފައިވާ ކުށުގެ އަމަލުގެ ބާވަތަށާއި، އެ އަމަލު ހިންގާފައިވާ ގޮތަށް ބަލާއިރު، މިއީ އަނިޔާވެރިކަން ހިމެނޭގޮތަށް ކޮށްފައިވާ ކުށުގެ ޢަމަލެއްކަން އެނގެން އޮތުމުން، ޝަރީޢަތްކުރުމާބެހޭ ޖިނާއީ އިޖުރާއަތުގެ ޤަވާއިދަށް ރިއާޔަތްކޮށް ބަލާއިރު މިފަދަ ޢަމަލެއް ކުރިކަމުގެ ތުހުމަތުކުރެވޭ ފަރާތެއް ބަންދުން ދޫކޮށްފައި ބެހެއްޓުމަކީ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމެއް ކަމުގައި ބަލަންޖެހޭކަމަށް ޙުކުމުގައި ފާހަގަ ކޮށްފައިވެއެވެ. އަދި އެ ސަބަބުތަކުގެ މައްޗަށް ބިނާކޮށް ހައިކޯޓުން ވަނީ ޖުވެނައިލް ކޯޓުގެ ނިންމުން ބާތިލުކޮށްފައެވެ.
8 ފެބުރުވަރީ 2021 ދުވަހުގެރޭ ގއ. މާމެންދޫގައި، ހިންގި މާރާމާރީގައި، އުދައްޔުއާއި އޭނާގެ ބޭބެ ފިރުޝާން ޒާހިރުއަށް ޖިސްމާނީގޮތުން ބޮޑެތި އަނިޔާތަކެއް ލިބިފައިވެއެވެ. އެ ޒަޚަމްތަކަށް ފަރުވާ ދެމުން ދަނިކޮށް އުދައްޔު މަރުވެފައިވާއިރު، އޭނާ ވަޅުލާފައިވަނީ އިންޑިއާއަށް ފޮނުވައިގެން ޕޯސްޓްމޯޓަމް ހެދުމަށްފަހުއެވެ.
މިއަހަރުގެ ޖޫން މަހުގެ ތެރޭގައި ހުޅުމާލެ ފޭސް ދޭއްގައި، މަރާލާފައި ފޮއްޓަކަށްލުމަށްފަހު އެއްލާލައިފައި އޮއްވާ ފެނުނު 13 އަހަރުގެ ކުޑަކުއްޖާގެ މައްސަލައިގައި ދައުވާލިބޭ 17 އަހަރުގެ ކުއްޖާވެސް، ދާދި ފަހުން ވަނީ ގޭބަންދަށް ބަދަލުކޮށްފައެވެ. އެ ކުއްޖާގެ މައްޗަށް އުފުލާފައިވަނީ ގަސްތުގައި މީހަކު މެރުމުގެ ދައުވާއެވެ. އެގޮތުން ކުޑަކުދިން ބަންދުކޮށްފައި ބައިތިއްބަން އެކަށީގެންވާ ޖަލެއް މި ވަގުތު ރާއްޖޭގައި ނެތްކަމަށް ހިއުމަން ރައިޓްސް ކޮމިޝަނުން އެކުލަވާލާފައިވާ ރިޕޯޓަކަށް ރިއާޔަތްކޮށް، ޖުވެނައިލް ކޯޓުން އެކުއްޖާވެސް ގޭބަންދަށް ބަދަލުކުރީއެވެ.
