އައު ވޭރިއަންޓާ ގުޅިގެން އެފްރިކާގެ ދެކުނު ބިތުގެ ހަ ގައުމަކުން ލަންކާއަށް މީހުން އެތެރެވުން މަނާކޮށްފި

ދެކުނު އެފްރިކާއިން ފެނިފައިވާ ކޮވިޑް-19ގެ އައު ވޭރިއަންޓް ކަމަށްވާ އޮމިކްރޯން ވޭރިއަންޓާ ގުޅިގެން އެފްރިކާގެ ހަ ގައުމަކުން ލަންކާއަށް މީހުން އެތެރެވުން މަނާކޮށްފިއެވެ.

އާދިއްތަ ދުވަހުން ފެށިގެން މީހުން އެތެރެވުން މަނާކޮށްފައިވަނީ ދެކުނު އެފްރިކާ، ބޮޓްސްވާނާ، ޒިމްބާބުވޭ، ނެމީބިއާ، ލެސޯތޯ އަދި އެސްވަޓީނީން އަންނަ މީހުންނަށެވެ. އަދި ނޮވެމްބަރު މަހުގެ 27 ވަނަ ދުވަހު އެ ސަރަހައްދުތަކުން ލަންކާއަށް އެތެރެވާ މީހުން ޚާއްސަ ކަރަންޓީނުގެ މުއްދަތެއް ފުރިހަމަކޮށް އެ ގައުމުގެ ހެލްތް މިނިސްޓްރީން ހުއްދަ ދީފައިވާ ލެބޯޓްރީއަކުން ހަދާފައިވާ ނެގެޓިވް ޕީސީއާރް ނަތީޖާއެއް އޮންނަ ޖެހޭ ކަމަށް ވަނީ ބުނެފައެވެ.

ލަންކާއިން މިފަދައިން ނިންމާފައިވާއިރު ދެކުނު އެފްރިކާއިން ފެނިފައިވާ ކޮވިޑް-19ގެ އައު ވޭރިއަންޓް ކަމުގައިވާ އޮމިކްރޯންގެ ސަބަބުން އެފްރިކާގެ 8 ގައުމަކުން އެމެރިކާއަށް މީހުން އެތެރެވުން ވެސް މަނާކުރުމަށް ނިންމާފައިވެއެވެ.

އެމެރިކާއަށް އެތެރެވުން މަނާކޮށްފައިވާ އެފްރިކާގެ ގައުމުތަކަކީ ދެކުނު އެފްރިކާ، ބޮޓްސްވާނާ، ޒިމްބާބުވޭ، ނެމީބިއާ، ލެސޯތޯ، އެސްވަޓީނީ، މޮޒަމްބީގް އަދި މަލާވީއެވެ. ފާއިތުވި 14 ދުވަހު އެގައުމުތަކަށް ދަތުރުކޮށްފައިވާ އެމެރިކާ ނޫން ރައްޔިތުންނަށްވެސް އެމެރިކާއަށް އެތެރެއެއް ނުވެވޭނެއެވެ.

ދެކުނު އެފްރިކާއިން ފެނުނު މިވޭރިއަންޓާމެދު ސައިންސްވެރިން އެންމެ ބޮޑަށް ކަންބޮޑުވަނީ މިވޭރިއަންޓްގައި ހުރި މިޔުޓޭޝަންތަކުގެ އަދަދުގެ ސަބަބުންނެވެ. އިނގިރޭސިވިލާތުގެ ހެލްތު އޮފިޝަލަކު ވިދާޅުވީ މިވޭރިއަންޓްގައި ހުރި ސްޕައިކް ޕްރޮޓީން މިޔުޓޭޝަންގެ އަދަދު 30ށް ވުރެ ގިނަ ކަމަށެވެ. ސްޕައިކް ޕްރޮޓީން އަކީ ވައިރަސް އިންސާނާގެ ސެލްތަކަށް ވަނުމަށް ބޭނުންކުރާ އެއްޗެކެވެ.

މިއީ ޑެލްޓާ ވޭރިއަންޓްގައި ހުރި ސްޕައިކް ޕްރޮޓީން އަށްވުރެ ދެގުނަ އަދަދެކެވެ. އަދި ކޮވިޑް-19ގެ އަސްލުގައި ހިމެނޭ ސިފަތަކަށް ބޮޑެތި ބަދަލުތަކެއް އައިސް ވައިރަސް ފެތުރޭ ގޮތަށް ބަދަލުތަކެއް ގެނުވާނެ ކަމެކެވެ.