ހޯމް މިނިސްޓަރ "ސްޓްރެޓީޖިކް ޕޮލިސިންގ ރިކުއަޔަރމަންޓް" ކަނޑައަޅުއްވައި، ސީޕީއަށް އަންގަވައިފި
ސްޓްރެޓީޖިކް ޕޮލިސިންގ ރިކުއަޔަރމަންޓް ކަނޑައެޅުއްވުމުގައި މިނިސްޓަރ ރިޢާޔަތްކުރައްވާފައިވަނީ، ދިވެހި ފުލުހުންގެ ޚިދުމަތުގެ ޤާނޫނުގެ ރޫޙަށް
ޕޮލިސް ކޮމާންޑަރުން ހަމަޖެއްސުން
ދިވެހި ފުލުހުންގެ ޚިދުމަތަށް މަތިކޮށްފައިވާ އެންމެހާ ޒިންމާތަކާއި މައްސޫލިއްޔަތުތައް އަދާކުރުމުގެ މަސައްކަތް، ކަނޑައެޅޭ ވަކި ތަރުތީބަކުން ރާވައިގެން ކުރިއަށް ގެންދިޔުމަށްޓަކައި، މިނިސްޓަރ އޮފް ހޯމް އެފެއާޒް ކަނޑައެޅުއްވުމަށް ދިވެހި ފުލުހުންގެ ޚިދުމަތުގެ ޤާނޫނުގައި ބަޔާންކުރާ "ސްޓްރެޓީޖިކް ޕޮލިސިންގ ރިކުއަޔަރމަންޓް" ކަނޑައަޅުއްވައި، ހޯމް މިނިސްޓަރ، ކޮމިޝަނަރ އޮފް ޕޮލިސް މުޙައްމަދު ޙަމީދަށް އަންގަވައިފިއެވެ.
އެކަމާ ގުޅިގެން ހޯމް މިނިސްޓްރީން ބުނީ، ސްޓްރެޓީޖިކް ޕޮލިސިންގ ރިކުއަޔަރމަންޓް ކަނޑައެޅުއްވުމުގައި މިނިސްޓަރ ރިޢާޔަތް ކުރައްވާފައިވަނީ ދިވެހި ފުލުހުންގެ ޚިދުމަތުގެ ޤާނޫނުގެ ރޫޙަށާއި، ދިވެހި ފުލުހުންގެ ޚިދުމަތުގެ މިހާރުގެ ޙާލަތަށާއި، ދިވެހިރާއްޖޭގެ ދާޚިލީ ސަލާމަތާއި ރައްކާތެރިކަމަށް މެދުވެރިވަމުން އަންނަ ގޮންޖެހުންތަކަށާއި، ދިވެހިރާއްޖޭގެ ކުށުގެ މާޙައުލު ބަދަލުވަމުން އަންނަ ގޮތަށްކަމަށެވެ. ކުރިއަށް އޮތްތަނުގައި، ދިވެހި ފުލުހުންގެ ޚިދުމަތުގެ އެންމެހާ ކަންކަން ތަރުތީބުކޮށް އިންތިޒާމުކުރުމާއި، ދިވެހި ފުލުހުންގެ ޚިދުމަތުގެ ކަންކަން ޕްލޭންކޮށް ރޭވުމުގައި، ޤާނޫނުގައި ބަޔާންކުރާ ގޮތުގެމަތިން ކޮމިޝަނަރ އޮފް ޕޮލިސް މަސައްކަތް ކުރައްވާނީ ކަނޑައެޅިގެންދިޔަ ސްޓްރެޓީޖިކް ޕޮލިސިންގ ރިކުއަޔަރމަންޓްގައިވާ ކަންކަން ޙާސިލުކުރުމަށް ކަމަށެވެ.
އަދި ސްޓްރެޓީޖިކް ޕޮލިސިންގ ރިކުއަޔަރމަންޓްގައި ބަޔާންކުރާ އަމާޒަށް ދިވެހި ފުލުހުންގެ ޚިދުމަތުގެ މަސައްކަތް ބައްޓަން ކުރެވުމުން، ފުލުހުންގެ ޚިދުމަތް އިތުރަށް ތަރައްޤީވެ، ރާވައިގެން ހިންގާ ބޮޑެތި ކުށްތައް މަދުވެ، މުޖުތަމަޢުގެ އަމާންކަމާއި، ރާއްޖޭގެ ދާޚިލީ ސަލާމަތާއި ރައްކާތެރިކަން އިތުރު ވެގެންދާނެއެވެ.
ޤާނޫނުއަސާސީގެ 242 ވަނަ މާއްދާގެ ދަށުން ދިވެހި ފުލުހުންގެ ޚިދުމަތަށް ޒިންމާ މަތިކުރެވިފައިވާ ވަޒީރަކު ސްޓްރެޓީޖިކް ޕޮލިސިންގ ރިކުއަޔަރމަންޓް މުރާޖަޢާ ކުރައްވަންދެން، ނުވަތަ މުޅިން އައު ސްޓްރެޓީޖިކް ޕޮލިސިންގ ރިކުއަޔަރމަންޓް ތަކެއް ކަނޑައަޅުއްވަންދެން، ފުލުހުންގެ މަސައްކަތާ ގުޅޭގޮތުން ސަރުކާރުންދޭ އަސާސީ އިރުޝާދުކަމުގައި ބަލަންވާނީ މިސްޓްރެޓީޖިކް ޕޮލިސިންގ ރިކުއަޔަރމަންޓްގައި ބަޔާންކުރާ ކަންކަންކަމަށް ހޯމް މިނިސްޓްރީން ބުނެއެވެ.
