އިތުރު 654 މީހަކު ބޫސްޓަރ ޑޯޒް ޖަހައިފި

އިތުރު 654 މީހަކު ވެކްސިންގެ ބޫސްޓަރ ޑޯޒް ޖަހާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން އާންމުކޮށްފައިވާ މައުލޫމާތުގައިވާގޮތުން، ބޫސްޓަރ ޑޯޒް ޖެހި 654 މީހުންގެ ތެރެއިން 404 މީހުން ވެކްސިން ޖަހާފައިވަނީ އަތޮޅުތެރެއިންނެވެ. މާލެ ސަރަހައްދުން ވެކްސިން ޖަހާފައިވަނީ 250 މީހުންނެވެ. މިއާއެކު ވެކްސިންގެ ބޫސްޓަރ ޑޯޒް ޖެހި މީހުންގެ ޖުމްލަ ވަނީ 7،947އަށް އަރާފައެވެ.

މީގެ އިތުރުން ހޯމަ ދުވަހު ވެކްސިންގެ ފުރަތަމަ ޑޯޒް ޖަހާފައިވަނީ 51 މީހުން ކަމަށް އެޗްޕީއޭއިން ހާމަކޮށްފައިވެއެވެ. އެއީ މާލެ ސަރަހައްދުން ވެކްސިންގެ ފުރަތަމަ ޑޯޒް ޖެހި 38 މީހުންނާއި، އަތޮޅުތެރެއިން ވެކްސިންގެ ފުރަތަމަ ޑޯޒް ޖެހި 13 މީހުންނެވެ. މިއާއެކު މިހާތަނަށް ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ ވަނީ 395،470އަށް އަރާފައެވެ.

މީގެ އިތުރުން އަންގާރަ ދުވަހު ވެކްސިންގެ ދެ ޑޯޒް ފުރިހަމަކޮށްފައިވަނީ 225 މީހުން ކަމަށް އެޗްޕީއޭއިން ބުނެފައިވެއެވެ. މާލެ ސަރަހައްދުން 140 މީހަކު ވަނީ ދެވަނަ ޑޯޒް ޖަހާފައެވެ. އަދި އަތޮޅުތެރެއިން ވެކްސިންގެ ދެވަނަ ޑޯޒް ޖަހާފައިވަނީ 85 މީހުން ކަމަށް އެޗްޕީއޭއިން ބުނެފައިވެއެވެ. މިއާއެކު ވެކްސިން ފުރިހަމަކުރި މީހުންގެ ޖުމްލަ ވަނީ 362،742އަށް އަރާފައެވެ.

މާލެ ސަރަހައްދުގައި 6 ސެންޓަރަކުން ގެންދަނީ ވެކްސިން ޖަހައިދެމުންނެވެ. އަދި ވެކްސިން ޖަހައިދިނުމަށް 3 މޮބައިލް ޓީމް ހަރަކާތްތެރިވަމުންދެއެވެ. އަތޮޅުތެރޭގައި 176 ސެންޓަރަކުން ވެކްސިން ޖަހައި ދެމުންދެއެވެ.

ކޮވިޑް-19ން ރައްކާތެރިވުމަށް ރާއްޖޭގައި ކުރިއަށް ގެންދާ ވެކްސިނޭޝަން ކެމްޕެއިނުގެ ތެރެއިން، ވެކްސިންގެ ތިންވަނަ ޑޯޒު (ބޫސްޓަރ ޑޯޒު) ޖަހަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާއިރު، މި ޑޯޒް ޖަހައިދެމުންގެންދަނީ އޭޑީކޭއާއި ހުޅުމާލެ ހޮސްޕިޓަލް އަދި އައިޖީއެމްއެޗުންނެވެ.

ތިން ވަނަ ޑޯޒްގެ ގޮތުގައި ޖަހަމުން އަންނަނީ ފައިޒަރ ވެކްސިން އެކަންޏެވެ. ބޫސްޓަރ ޑޯޒް ޖެހޭނީ ދެވަނަ ޑޯޒް ޖެހުމަށްފަހު 6 މަސްދުވަސްވެފައިވާ ފަރާތްތަކަށެވެ.