ޑްރަގުގައި ޖެހި "ލާޗާރުބިޗާރު" ވާ މީހުން ގިނަވަނީ
24 ނޮވެމްބަރު 2021 | ބުދަ 06:55މަސްތުވާތަކެތީގައި ޖެހި ޖީލެއް ދަނީ ހަލާކުވަމުން
މަސްތުވާތަކެތީގެ ވަބާގައި ޖެހިފައިވާ ބައެއް- ފޮޓޯ: މިހާރު، ސަން
މަސްތުވާތަކެތީގެ ވަބާއަކީ މި ކުޑަކުޑަ ރާއްޖޭގައި ފެތުރިފައި އޮތް އެންމެ ނުރައްކާތެރި ވަބާއެވެ. މިވަބާގައި ޖެހި، ޖީލެއް ހަލާކުވެގެން ދަނީއެވެ. އަންނަން އޮތް ޖީލުތައް ހަލާކުވެދާނެކަމުގެ ބިރު އުފެދެނީއެވެ. މަސްތުވާތަކެތި ބޭނުންކުރުން މިހާރު ވަނީ އާންމު ކަމަކަށް ވެގެން ގޮސްފައެވެ. މިކަމުގެ ވިޔަފާރިކުރާ މީހުން ގިނަވެ، މަސްތުވާތަކެތި ރާއްޖެ އެތެރެކުރާ މިންވަރުވެސް އިތުރުވަނީއެވެ.
ދިވެހިންގެ ތެރޭގައި ވަރަށް ބޮޑަށް އާންމުވެފައި އޮންނަ ބަހެއް އޮވެއެވެ. "ލާޗާރުބިޗާރީ" އެވެ. މިބަސް އެކި ގޮތްގޮތަށް ބޭނުންކޮށް އުޅޭއިރު، މަސްތުވާތަކެތި ބޭނުންކޮށްގެން އެއް ބިތުން އަނެއް ބިތަށް ޖެހެމުންދާ މީހުންނަށް އަމާޒުކޮށްވެސް މި ބަސް "ލާޗާރުބިޗާރު" ބޭނުންކުރެއެވެ. މަސްތުވާތަކެތި ބޭނުންކޮށްގެން "ލާޗާރުބިޗާރީ"އަށް މަގުމަތީގައި މީހުން ގިނަވާ ވާހަކައެވެ. ހަމައެކަނި ވެރިރަށް މާލެއަށް ބަލައިލިޔަސް މަސްތުވާތަކެތި ބޭނުންކޮށްގެން މަގުމަތީގައި ގިނެވެގެން އުޅޭ މީހަކު ނުފެންނަ ދުވަހެއް ނުދާނެއެވެ.
ރާއްޖޭގައި މި ވަބާ ފެތުރިފައި އޮތް މިންވަރު ބަލައިލި ކޮންމެ ދިމާލަކުންވެސް ފެނެއެވެ. ޖަލުތަކަށް ބަލައިލި ނަމަވެސް މެއެވެ. މިވަގުތު ޖަލުގައި ތިބި ގިނަ މީހުންނަކީ މަސްތުވާތަކެތީގެ މައްސަލަތަކުގައި ޖަލުގައި ތިބި މީހުންނެވެ. އެހާ ހިސާބުން މިކަން ނިމުނީކީވެސް ނޫނެވެ. ޖަލުގެ ތެރެއިން ވެސް މަސްތުވާތަކެތީގެ ޑީލްތައް ހަދަނީއެވެ. މިހާހިސާބުން މި މުޖުތަމައުން މަސްތުވާތަކެތީގެ މައްސަލަތައް މަދުވެގެންނެއް ނުދެއެވެ. ރާއްޖެއަށް މަސްތުވާތަކެތި އެތެރެކުރާ މިންވަރުވެސް މަދެއް ނުވެއެވެ.
މިދިޔަ ފާއިތުވި ތިން އަހަރުތެރޭގައި ރާއްޖެއަށް މަސްތުވާތަކެތި އެތެރެކުރަން އުޅެ، އަތުލައިގަނެވުނު މިންވަރު ހާމަކޮށްދެއްވަމުން ހޯމް މިނިސްޓަރ އިމްރާން އަބްދުﷲ ވިދާޅުވީ 973 ކިލޯގެ މަސްތުވާތަކެތި ފާއިތުވި ތިން އަހަރުތެރޭގައި އަތުލައިގަނެވިފައިވާކަމަށެވެ. މީގެ ތެރެއިން އަތުލައިނުގަނެވި، ކިހާ އަދަދެއްގެ މަސްތުވާތަކެތި ރާއްޖެ އެތެރެވެފައި ހުންނާނެތޯ ސުވާލު އުފެދެއެވެ. ޔަގީނުންވެސް އެނގޭ ކަމަކީ މަސްތުވާތަކެތި ބޭނުންކުރާ މީހުން ދުވަހަކަށްވުރެ ދުވަހެއް އިތުރުވަމުންދާ ކަމެވެ.
މިފަހަކުން ފުލުހުން ހިންގި އޮޕަރޭޝަންތަކެއްގައި މަސްތުވާތަކެތި ބޭނުންކުރާ ބޮޑެތި އައްޑާތައް ވަނީ ބަންދުކޮށްފައެވެ. އަދި އެތަންތަނުގައި ޑިއުޓީކުރަންވެސް ވަނީ ފަށާފައެވެ. އެހެންކަމުން އެތަންތަނުގައި މަސްތުވާތަކެތި ބޭނުންކޮށް، ނިދައި، ފާހާނާކޮށް އުޅުނު މީހުން މަގުމަތިވީއެވެ. މަގުމަތިން މިގޮތަށް ލާޗާރުބިޗާރީ ވެގެން ގިނަވާ މީހުން ފެންނަ މިންވަރު އިތުރުވީ މިހާހިސާބުންނޭ ބުންޏަސް ދޮގަކަށް ނުވެދާނެއެވެ.
އެހެންނަމަވެސް އެއް ގޮތުުން ނުވަންޏާ އެހެން ގޮތެއް ހޯދާ އުސޫލުން މިހާރު އެމީހުން ޖަމާވަމުންދަނީ ހުޅުމާލެ ފޭސް 2 ސަރަހައްދަށެވެ. މިހާރު އެމީހުން މަސްތުވާތަކެތި ބޭނުންކޮށް، ނިދައި، ފާޚާނާކޮށް ހަދަމުންދަނީ އެ ސަރަހައްދުގައިހުރި ހިޔާ ފްލެޓުތަކުގައެވެ. މިހާރު އެ ސަރަހައްދު ވެފައިވަނީ ކުށުގެ ވެއްޓަކަށެވެ. ހަމައެކަނި ހިޔާ ފްލެޓުތަކެއް ނޫނެވެ. މާލޭގެ ގޭގެއިންވެސް ފަސޭހައިން ވަދެވޭ ގޮތަށް ހުންނަ ތަންތަނަށް އެމީހުން ވަދެއެވެ.
މިއާއެކު މުޅި މުޖުތަމައު މިވަނީ ބޮޑު ބިރުވެރިކަމެއްގެ ތެރެއަށް ވެއްޓިފައެވެ. މިފަދަ މީހުން މަގުމަތީގައި ގިނަވެގެން އުޅޭއިރުވެސް ފުލުހުންނަށް އެކަންކަން ނުހުއްޓުވި، އަތްދަށުން ދޫވެގެންގޮސްފައިވާކަމީ ރައްޔިތުންގެ ބޮޑު ކަންބޮޑުވުމެކެވެ. މަސްތުވާތަކެތީގެ މައްސަލަތަކުގައި ހައްޔަރުކުރާ މީހުން އަނބުރާ މުޖުތަމައަށް ނެރުމުގެ ކުރިން ރިހެބިލިޓޭޓް ކުރި ނަމަވެސް މުޖުތަމައަށް ނިކުންނަ ދުވަސް ނޫން އަނެއް ދުވަހު ފެންނަނީ މަސްތުވާތަކެތި ބޭނުންކޮށްގެން ކޮންމެވެސް ތަނަކަށް ވެއްޓިފައި އޮންނަ ތަނެވެ.
އެހެންކަމަށްވާއިރު، މިކަން މިހާބޮޑަށް ބޮއްސުންލައިގެން ގޮސްފައިމިވަނީ މުޅި ނިޒާމުގެ ތެރޭގައި އޮތް މައްސަލައެއްގެ ސަބަބުންކަމަށް މިހާރު ވިސްނެން ފަށައިފިއެވެ. ރައްޔިތުން ބޭނުންވާފަދަ އަމާން މުޖުތަމައެއް ހޯދައިދެވޭނީ މިކަމަށް ދާއިމީ ހައްލެއް ހޯދިގެންނެވެ. މިފަދަ ކުށްތަކަށް އަރައިގަންނަ މީހުންނަށް ދޭންޖެހޭ ހައްގު އަދަބު އެމީހުންނަށް ދެވިގެންނެވެ.
